Ŋwà’ne Ngyà jʉ’ 14 - Nouveau Testament en Ngienboum

Azɔ́bɔ ntse pʉ̀a pie mé la cu’u wɔ́b ndá nkwɔɔn

¹ N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, n gyá Mûɔ *Njʉ̀njÿò, á tyé ndùm lekwɔ’ɔ́ Sioŋ. Pâ pʉ̀a ntsá’ nkÿo lê ntsá’ ntsɔ̀b lekùa lê móm lekùa gwɔ́ (144.000). Mbà mé la ŋwe’e lezíŋ Mûɔ *Njʉ̀njÿò mbɔɔ se Tá we á nà zǐ sɔ́b.

² N jú’ etsɔ̌ ngyè nyìŋ fóo tÿǒ lepwó, ńzẅɛ pá’ máamáa ntse gẅie é ne ńzyɛ́’ɛ la, ńgíŋe ńgwá’a lefaŋ sie é vɛ́te la, ńgíŋ ńgwɔ́ pá’ ngyè leluŋó gie pàpú’ tsɔ̌ ntí kèkÿɛ̀ ne ḿbú’u la.

³ Pɔ́ tyé mvfò lʉŋe lefùɔ, mbɔɔ mvfò menɔ̀ɔn pá lekùa lâ mvfò melÿò pɛ̌, ńne ńzɔbɔ tsɔ́ zɔ́bɔ ntse sẅé, é té ndà’ pʉ̀a ntsá’ nkÿo lê ntsá’ ntsɔ̀b lekùa lê móm lekùa (144.000) pie mé la cu’u wɔ́b ndá nkwɔɔn ndùmo ssé tsetsá’ wɔ́, mbà tsɔ̌ nyìŋ la tè wó tà ńku’u lézí’i yɛ̌ zɔ́bɔ ntse tà ńzɔb wɔ́,

⁴ ée pʉ̀a pie pâ panzwě la tè gÿo menò ncÿǒ wɔ́, pɔ́ gwɔ́ pɔ́ pʉ̀a pie pɔ́ laa mánzwě zsé. Mûɔ *Njʉ̀njÿò gʉa nzɔ̌ wɔ́, pɔ́ zse pɔ́ nzèm ye, ée pʉ̀a pie mé la gʉa tsetsɛ̀ɛ pʉ̀a mesoŋ ńcu’u wɔ́b, pɔ́ gwɔ́ mvfò Ssé mbɔɔ mvfò Mûɔ *Njʉ̀njÿò, ńgwɔ́ pɔ́ pá’ ntwó mmó gie é fǒ nká’ la,

⁵ mbà mé laa mé ńjú’ cÿɔ̌ nò kẅɛɛ ncwò pɔ́b wɔ́, *alɔ̌’ɔ yɔ́b té wó wɔ́.

Mecÿɔ́’ Ssé méntá

⁶ N gíŋe ńgyá tsɔ̌ tà’ *cÿɔ́’ Ssé gwɔ́ tàa tÿǒ lefaŋ ńne ńzie, ńgẅiin tsɔ́ nkʉ̀ mbòŋo gẅie ée we tèmì, pá’ à ge gʉa tsẅii mbwo pʉ̀a pie ée ndùmo ssé tsetsá’, á tsɛ̀ɛ mbɔɔ wɛ̌ ngwòŋ wɔ́, á mbwo yɛ̌ ngẅɛ̀ ndá wɔ́, á mbwo pàshwóŋó yɛ̌ ntí shwóŋè wɔ́, á mbwo yɛ̌ ntí ntí nyìŋ mesoŋ wɔ́.

⁷ Á ne ńdɔgɔ ngyè tetʉ́ʉ ńgɔɔn ngie: Pi pɔ́g Ssé, ńnáa legú’ mbwo yé. Á nue afʉ̀’ gie à ge ŋag pʉ̀a mesoŋ áa pá’ɔɔn, mbà á kǔ’. Pi gu’te nyìŋ gẅie à la nyɛte lepwó, ńnyɛte tsetsá’, ńnyɛte ntse té pàa, ńnyɛte mbɔɔ mesá’a ntse.

⁸ Atsɔ̌ *cÿɔ́’ Ssé, ńgwɔ́ mbɔ́ɔntè yépʉ́a pɔ́ɔnte ńne ńgɔɔn ngie: À kéen ńgwe ssé, ńgie à kéen ńgwe ssé. N gɔɔn máamáa tÿǒsoŋo Mbabilonia, gẅie à ka ne ńgÿo ngwòŋo ngwòŋ ne ńnúu melù’ mpfwɔ́’ mé, é mpfwɔ́’ gie é pǔ ńtɔ́g ntí.

⁹ Atsɔ̌ *cÿɔ́’ Ssé, ńgwɔ́ mbɔ́ɔntè yétá pɔ́ɔnte wɔ́b, ńne ńdɔgɔ ngyè tetʉ́ʉ ńgɔɔn ngie: Nyìŋ lɔɔn ńgu’te nɔ̀ɔn mbɔɔ tútú we, ńzẅíŋ mé cÿɔ’ɔ liŋé nɔ̀ɔn ná zǐ yé kà ná pwó yé wɔ́,

¹⁰ angàŋ zsé ngie mbɔɔ yé yé ge gÿo nú melù’ gyáŋa lóŋ Ssé, é mie Ssé ge gÿo ńnéŋe tsɛ̀ɛ ntú’ gyáŋa lóŋ yé, tà fó le gwate. Angàŋ pɔ́ɔnte ńkú ngʉ̀ngʉ̀ á tsɛ̀ɛ mmɔ̌g *mekʉ̀a, á mvfò *mecÿɔ́’ Ssé pe ndʉalʉ̌a mbɔɔ mvfò Mûɔ *Njʉ̀njÿò.

¹¹ Ndyé mmɔ̌g gẅie pɔ́ ée tsoló e lá’a ńzɔ́gɔ ńkwɔ́’ɔ kwɔ̌’ nà ngù’ nkɔ́ɔn nê nkɔ̌ɔn. Awɔ̌wɔ́ɔ gẅie à ne ńgu’te nɔ̀ɔn, ńgíŋe ńne ńgu’te tútú nɔ̀ɔn ŋwɛ́, tà mbà mé cÿɔ’ɔ́ liŋé lezíŋ nɔ̀ɔn ná yé, á lá’a ńzɔ́gɔ légyá ngɔ́’ á zsǒ mbɔɔ tsẅɛ́’, atsɔ̌ lézẅɛte á le gwɔ́ wó wɔ́.

¹² Yɔɔn nò lɔgɔ ńgɔɔn ngie pʉ̀a Ssé, epʉ̀a pie pɔ́ kú’te *lepʉ̌ Ssé, ńzába ntʉ́m ná Yěsô, pɔ́ shÿɔg.

¹³ N jú’ tsɔ̌ ngyè nyìŋ fóo tÿǒ lepwó ńgɔɔn ngie: Ŋwe’e ngie: Á ge fó fʉ̀’ɔɔn, pà shÿó mbòŋo gwɔ́ pʉ̀a pie pɔ́ ge gwɔ kwé, é kwé ncwò fà’ Cʉ̀apʉ̀a: A Zẅìge ndʉalʉ̌a zẅíŋ ngie áa nò, pɛ̌ pʉ̀a ge gʉa zẅɛte ná mefà’ lÿò mɔ́b. Á nue pɔ́ ge lɔgɔ Píte mefà’ mɔ́b é gʉa.

Leŋag pʉ̀a gẅie à gwɔ́ pɔ́ pá’ lelag shúm la

¹⁴ N gyá sɔɔn shúm tà ńtsẅé jʉ’, e Ssé gíŋe ńnyɛ́’ nÿɔ́g mɔ́ɔn, ńgwóon ńgyá tsɔ̌ féfɔ́gɔ melɔ́ɔn, nyìŋ ńnéŋe ndumó ńgwɔ́ pá’ míŋ nyìŋ mesoŋ la, ńtɔ’ɔ cÿɔ́’ɔ lefùɔ gie mé la lɔgɔ tʉ̌ gɔ̂l ńnyɛte, ńgẅiin tsɔ̌ ntí nně gie mé lɔgɔ ńdaga shúm nká’, é ne ńdúmo tɛ’.

¹⁵ Atsɔ̌ *cÿɔ́’ Ssé fó tsɛ̀ɛ jʉ’e Ssé gie áa tÿǒ lepwó, ńdɔg ngyè tetʉ́ʉ ńtsẅii mbwo nyìŋ gẅie à ńnéŋe ndùm féfɔ́gɔ melɔ́ɔn la ngie: Lɔg nně ńdag shúm, ńdag shúm ndùmo ssé tsetsá’. Afʉ̀’e lélag shúm kǔ’, á nue shúm ée ndùmo ssé tsetsá’, mbà é tʉ̌.

¹⁶ Nyìŋ gẅie á ke ńnéŋe ndùm féfɔ́gɔ melɔ́ɔn la lêen ńké ḿma’ nně ye, ńdɔg ńdag shúm ndùmo ssé tsetsá’, tà shúm ndàg lag maga ndùmo ssé tsetsá’.

¹⁷ Wetsɔ̌ *cÿɔ́’ Ssé fó tsɛ̀ɛ jʉ’e Ssé gie áa tÿǒ lepwó ńkẅɛ, ńgíŋe ńgẅiin yé ntí nně ya gie mé lɔgɔ ńdaga shúm nká’ la, é ne ńdúmo tɛ’.

¹⁸ Wetsɔ̌ *cÿɔ́’ Ssé fóo jʉ’ gie mé nuŋo pwɔ́’ wó ńkẅɛ, ńgwɔ́ gẅie mé la cʉ́me nò mmɔ̌g mbwo yé, á lɔg ngyè tetʉ́ʉ ńtsẅii mbwo gẅie á kě ńgẅiin nně é ne ńdúmo tɛ’ la ngie: Ma’ nně jù gie e ne ńdúmo lɛ, ńdɔg ńzá’ mencùɔ mentɔ̌ɔn mie mé kyéen ńdɔg ńnyɛte melù’, é gwɔ́ ndùmo ssé tsetsá’, mbà é tʉ̌ lɛ.

¹⁹ *Cÿɔ́’ Ssé lɔg nně ye, ńgʉa ndùmo ssé tsetsá’, ńzá’ mencùɔ mie ée nà metÿǒ melù’, á tsɛ̀ɛ nká’a melù’ ndùmo ssé tsetsá’, ḿbÿɛɛ tsɛ̀ɛ máamáa gÿǒon, á jʉ’ gie mé tsẅɛ́’ɛ mentɔ̌ɔn wó, ńgẅiin melù’. Letsẅɛ’ɛ́ tsɛ̀ɛ gÿǒon ŋwɛ́ lɔgɔ ńda’te ngie e Ssé ne ńgyáŋa lóŋ ná pʉ̀a tepòŋ.

²⁰ Mé fó tsɛ̀ɛ tÿǒsoŋ ńkẅɛ tá ńgyá yɛ̌ gÿǒon. Mé lêen ńtsẅɛ́’ mentɔ̌ɔn ŋwɛ́ tsoló, metse zɔ̌ fó tsɛ̀ɛ gÿǒon ŋwɛ́ ńkẅɛ, ńcwóŋo nà mekílomíta nkÿo tá, lecǔ ssé gwɔ́ tà’ míta nê kèm.