Ŋwà’ne Ngyà jʉ’ 11 - Nouveau Testament en Ngienboum

Pʉ̀a mépʉ́a pie pɔ́ gɔɔn nò gie pɔ́ zsé nà nò Ssé

¹ Mé gɔɔn pú’u, tà á ku’, mé ná tsɔ́ ntí kekà’a, á gwɔ́ pá’ kème mmó gie mé lɔgɔ fʉ’ʉ mmó, ńgwɔ ná, ńne ńgɔɔn né mèŋ ngie: Lu ssé éfʉ’ʉ *jʉ’ʉ Ssé gie áa Yerósalem, éfʉ’ mbɔɔ jʉ’ gie mé nuŋe pwɔ́’ wó, ésáŋ nzẅìŋ pʉ̀a pie pɔ́ ée tsoló ńne ńgu’te Ssé.

² Tá à ké ńgʉa ná tetʉ́a jʉ’e Ssé gie áa nzème pǐ, ɔ̀ nyé té fʉ’. Á nue mé la náa yɛ̌ tetʉ́a mbwo mengwòŋ mie é té Ssé zsé, tà pɔ́ ge gÿo neŋte tÿǒsoŋ Ndʉalʉ̌a neŋte nà mesaŋ ntsɔ̀b pʉ́a lê móm lekùa,

³ ńgʉa ná pʉ̀a pɔɔn mépʉ́a pie pɔ́ ge gɔɔn nò gie pɔ́ zsé ná mèŋ, mbà mèŋ n ge gÿo náa wɔ́b metʉ̀ lélɔg ńtsẅi nkʉ̀ wɔ̀ɔn. Pɔ́ ne ńtsẅii, ḿma’ menzsǒ lɔg ńdúŋ legwé ma’ nà melyɛ’ɛ́ lá’ ntsá’ lê nkÿo pʉ́a lê móm ntɔgɔ́ (1.260).

⁴ Pɛ̌ pʉ̀a mépʉ́a pie pɔ́ gɔɔn nò gie pɔ́ zsé ná mèŋ, ée metÿǒ mèvɛ olive mémbʉ́a, ńgÿo melâm mémbʉ́a mie é tyé mvfò Cʉ̀apʉ̀a gẅie à sá’a njÿó ntsèm.

⁵ Nyìŋ lɔɔn ńne fa’a légege wɔ́b, á zsé ngie etsɔ́ mmɔ̌g ée fóo ncwò pɔ́b kẅɛ pyág megàŋ mbù pɔ́b. Áa nénʉ́ ngie nyìŋ lɔɔn fa’a légege wɔ́b, mbà ngàŋ ge kwé pɔ́ pú’u.

⁶ Pɔ́ gẅiin metʉ̀ lélɔg ńkíle mbʉ̀ŋ lefaŋ, á nà ntí gie mbʉ̀ŋ tě ge lúu nà melyɛ̌’ mie pɔ́ ne ńtsẅii nkʉ̀ Ssé wɔ́. Pɔ́ gíŋ ńgẅiin metʉ̀ lélɔg sele ntse é cʉ́’ metse, ńgíŋe ńku’ pá’ pɔ́ lɔɔn ńkwoŋ fʉ̀’ʉ kɔ́ wɔ́, pɔ́ gÿo ngɔ́’ ntí ntí tóo ndùmo ssé tsetsá’.

⁷ Tá’, pɔ́ ge gÿo ké gɔɔn nò gie pɔ́ ne ńzsé ná mèŋ tà tsẅé jʉ’, nkʉ̀’ʉ pà nɔ̀ɔn gie ee fóo tsɛ̀ɛ pÿé té lǎŋ ńkwɔ́’ɔ, à tó ḿma’a wɔ́b lê ncù, ńjÿó wɔ́b, ńzẅéte wɔ́b.

⁸ Mepfó mɔ́b ge gÿo nuŋte ná lǎŋ gie áa tsɛ̀ɛ máamáa tÿǒsoŋ. Mé lɔg ntí gie e Ssé lɔg ńgyá yé mmó, ńtóŋo wɛ̌ máa tÿǒsoŋ lê Sodom, mbɔɔ lê Egipto. Á gwɔ́ jʉ’ gie mé la zɔɔn ńkime Cʉ̀apʉ̀a wɔb ná tÿǒ nkǐ wó.

⁹ Epʉ̀a mesoŋ mentí mentí, epʉ̀a ná mengẅɛ̀ mengẅɛ̀, pàshwóŋó meshwóŋè ntí ntí, mbɔɔ pà tèzsé Ssé ge lá’ gyá pá’ mepfó mɔ́b nuŋte gyá nà lyɛ̌’ tá lê kèm, é piŋ ké le zẅíŋ ngie mé kaa pfó sɔ́b ńnéŋe tsɛ̀ɛ mesyè wó.

¹⁰ Epʉ̀a ndùmo ssé tsetsá’ ge gÿo kág é tí pá’ pʉ̀a pɔɔn mépʉ́a kwě. Anò poŋo wɔ́b. Nyìŋ túm lepu’ú ńnáa mbwo shǔ we, à gíŋe ńná sé. Pɔ́ yé lɔg pú’u, ńkág. Á nue pà ntsẅì nkʉ̀ ŋwɛ́ mépʉ́a ka ná pʉ̀a ngʉ̀ngʉ̀ á ndùmo ssé tsetsá’ tɛ’.

¹¹ Tá’, melyɛ’ɛ́ lá’ ma méntá lê kèm è gwɔ́ tà ńcʉa, a Zẅìge gie á gÿo mé gwɔ́ wó, à fó mbwo Ssé, ńtó ńkúu ná pɔ́b. Pɔ́ lu ssé ńtyé tyé. Ecÿɔ’ pú ńgwoon pʉ̀a pie pɔ́ la ne ńgyá mepfó mɔ́b.

¹² Pà *ntsẅì nkʉ̀ Ssé pa mépʉ́a jú’, etsɔ̌ ngyè tetʉ́ʉ fóo tÿǒ lepwó ńgɔɔn né pɔ́b ngie: Pi kwɔ́’ ńtó né jʉ’ɔɔn. Pɔ́ ne ńkwɔ́’ɔ, ńgwɔ́ tsɛ̀ɛ melɔ́ɔn, megàŋ mbù pɔ́b ne ńgyá.

¹³ Pɔ́ ne ńkwɔ́’ɔ pú’u, atsetsá’ pú ńcʉ’e tɛ’. Tà’ nzsè tÿǒsoŋ á nà nzsè legém á kème. Tsetsá’ cʉ́’e pú’u, ńzẅete pʉ̀a mesoŋ ntsá’ sɔɔn mbʉ́a. Apfwɔ́’ɔ pʉ̀a pie pɔ́ tsẅɛ̌, á gyá ḿbɔ́g, ńnáa legú’ mbwo Ssé gẅie à ńnéŋe tÿǒ lepwó.

¹⁴ Ngʉ̀ngʉ̀ mbɔ́ɔntè yépʉ́a lɔgɔ pú’u, ńcʉa. Á ké yɔɔn mbɔ́ɔntè yétá gwɔ́ mánzsè ńne ńtóo.

Ntaŋ mbɔ́ɔntè sɔɔn mbʉ́a

¹⁵ *Cÿɔ́’ Ssé mbɔ́ɔntè sɔɔn mbʉ́a tóŋ wé ntaŋ. Mé jú’ *Mecÿɔ́’ Ssé gwɔ́ tÿǒ lepwó ńdɔgɔ ngyè tetʉ́ʉ ńgɔɔn ngie: Lesǎ’ njÿó cʉ̌’ ńgwɔ́ pɔ́ nà mbwo Cʉ̀apʉ̀a wege mbɔɔ ná mbwo *Nzà’nkÿo gẅie à la tsɔ́’. Wɛ̌ lésá’ ge lá’ gwɔ́ nà ngù’ nkɔ́ɔn nê nkɔ̌ɔn.

¹⁶ Melÿò pá ntsɔ̀b lekùa lê móm mbʉ́a pie pɔ́ ńnéŋe nà melʉŋe lefùɔ mɔ́b á mvfò Ssé la, pɔ́ gwe ssé ésɔb shÿó wɔ́b ssé, ńne ńgu’te Ssé,

¹⁷ ńgɔɔn ngie: Peg nǎ ndǎg mbwo gù me Cʉ̀apʉ̀a Ssé Ngàŋa tʉ̀ ntsèm, Ɔ̀ɔ wó, mbà ɔ̀ laa wó, peg nǎ ndǎg nue ɔ̀ la’té metʉ̀ mú mie é fáŋ tɛ’, mbɔɔ nue gù zɔ cʉ’ʉ́ sá’a njÿó á nà fʉ̀’ɔɔn.

¹⁸ Ngwòŋo ngwòŋ é ka gyáŋa lóŋ, tá’, á júu fʉ̀’ gie ɔ̀ ge nyɛɛ jú gyáŋa lóŋ tǒ, ńgíŋe ńgwɔ́ fʉ̀’ gie ɔ̀ ge tsɔ́’te ntsaŋ mepfó ssé, ńgwɔ́ fʉ̀’ gie ɔ̀ gee ńtsɔ́’ɔ fà’ ngàŋa fà’ jú, é pà ntsẅì nkʉ̀ pú, é tsɔ́’ɔ fà’ pʉ̀a pú, é pʉa pie pɔ́ gu’te lezíŋ Shú, é penkʉ́ mbɔɔ melÿò, ńgíŋe ńgwɔ́ fʉ̀’ gie ɔ̀ ge cÿɔ́gte pʉ̀a pie pɔ́ zɔ́gɔ ńtágte ndùmo ssé tsetsá’.

¹⁹ Pɔ́ gɔɔn pú’u, tà ńgwɔ cʉ́me, ncwò jʉ’e Ssé gie áa tÿǒ lepwó tsɔ́’ɔ ńtyé, akʉ̀b gie e Ssé la lɔg ńgwaa *kʉ̀a kẅɛ ńtyé tsɛ̀ɛ jʉ’ yé ŋwɛ́. Menně mbʉ̀ŋ kyɛ’ jʉ’. Mé jú’ ngyè *mecÿɔ́’ Ssé, ńjú’ lefaŋ vɛ́te ngʉ̀a ngʉ̀a. Atsetsá’ cʉ’e. Megẅì pú ńgwe pá’ɔɔn tɛ’.