Malékuse 6 - Nouveau Testament en Ngienboum

Epʉ̀a Nǎzarɛd gwagá Yěsô.

¹ Yěsô la fóo jʉ’ó, ńgʉa né lá’ pɔ́b, pâ *ngàŋa kwò yé gwɔ́.

² *Alyɛ’ɛ́ nzsè yɔ́b gÿo ńgwɔ́, á gʉa *ndá cú’tè pɔ́b, ńzye lézí’i pʉ̀a nò Ssé, pʉ̀a tà ńgyɔ́ɔn jú’u shwóŋè yé, ḿmɔɔn, ńně ńgɔɔn ngie: Nyìŋ wɔɔn aa ńgwɔ́ pá’ɔɔn ńdɔgɔ yɔɔn ntí menò fóo pɔ́ nzɔ̌? Yɛ̌ ntí legyè fóo nzɔ̌ mbwo yé, à piŋ ngǎ tá ńku’u légÿo yɔɔn ntí menò mmɔɔn mmɔɔn?

³ À tè kápíndɔ́ɔn, ńgwɔ́ míŋ Malîɛ wâ? Ńgwɔ́ fɛ́ pà Jâg, ńgÿo Joses, ńgÿo Jẅide mbɔɔ Símo wâ? Mefɛ́ pé pe pànzwě té gwɔ́ pɔ́ lá’ pege wɔɔn wɔ́ le? Pɔ́ gɔɔn pá’ɔɔn, ńdʉ’ʉ lé jú’u nò yé.

⁴ Yěsô leen ńgɔɔn né pɔ́b ngie: Mé gÿo mekù’ *ntsẅì nkʉ̀ Ssé jʉ’ ntsèm, tà é cʉ́’ ndà’ lá’ pɔ́b, mé gwága yé nùɔ mefɛ́ pé, á ndá pɔ́b.

⁵ Á la gwɔ́ gwɔ̌ tà Yěsô pú tè gÿo tsɔ́ menò mmɔɔn mmɔɔn wó wɔ́, tà ńdí’ ndà’ pá’ à la záb mbwó mé nà tsɔ́ ntá’ megàŋa guɔ, ńgÿo pɔ́ zeŋe.

⁶ Á kʉ’ʉ Yěsô tɛ’, pá’ pɔ́ kaa záb ntʉ́m ná yé wɔ́. Yěsô gÿo fó jʉ’ó, ńgʉa ńzye légiŋe tsɛ̀ɛ melá’ shÿó jʉ’ó, ńně ńzí’i pʉ̀a nò Ssé.

Yěsô tǔm pʉ̀a pé ntsɔ̀b pʉ́a

⁷ Afʉ̀’ gÿo ńku’, á tóŋ pʉ̀a pé ntsɔ̀b pʉ́a nê legém, ńzye létúmo wɔ́b mépʉ́a mépʉ́a, ńná metʉ̀ mbwo pɔ́b lélɔg ńjwoŋ *messé tepòŋ mie é gwoon pʉ̀a ḿbúe wɔ́b,

^8-9 ńtsẅi né pɔ́b ngie: Tà pi gwɔ gʉa, ḿbíi tsɔ́ mmó, tà ńdí’ ndà’ léshÿɔ́g *mengùb mí, ḿbíi tÿǒ ńtẅi’. Tà pi tsẅág shúm léjÿó, ḿbɔ́ɔn nyìŋ lépíi pɔ̀ɔn. Tà nyìŋ gẅiin kà pɔ́ nkáb wɔ́, kà pɔ́ kúbe nzsǒ wɔ́.

¹⁰ Yěsô gíŋe ńgɔɔn né pɔ́b ngie, pi gʉa tà ńkúu jʉ’, mé gɔɔn ngie pi lá’a tsɛ̀ɛ yɛ̌ ndá wɔ́, pi ké ńtsẅé pɔ́ wó tà ńdá’ fó jʉ’ó ńgʉa.

¹¹ Pʉ̀a tsɔ́ lá’ lɔɔn ńdʉ’ʉ lékúe gẅí, ńdʉ’ʉ lé jú’u shwóŋè gí, pi fó wó ńgwaa gʉa, ḿbú’u pfepfɔ́b mekwò pi, lélɔg ńnyɛɛ wɔ́b ngie nò gie pɔ́ gÿǒ, á cʉ́’ʉ ńdíe pɔ́ wɔ́b.

¹² Pɔ́ gwá ńgiŋe jʉ’ ntsèm ńgɔɔn ngie: Á ne ńzɛ́te ngie mânyìŋ ntsèm kúbe mà.

¹³ Pɔ́ lɔ́ɔn ńgíŋe ńjwoŋo *messé tepòŋ mie é pue pʉ̀a, ńtse mèvɛ nà meguɔ tà ńgyɔ́ɔn, pɔ́ zeŋe.

Anò fùɔ Herôd pɔ́ Jâŋ Mbabtis

¹⁴ À yɔɔn nò gÿo lezíŋ Yěsô sa jʉ’. Fùɔ *Herôd jú’ yé pá’ mé ne ńgɔɔn menò mie Yěsô ne ńgÿo, tsɔ́ pʉ̀a ne ńgɔɔn ngie Yěsô ŋwɛ́ ge gǎ wɔ́, é gwɔ́ Jâŋ Mbabtis, mbà à zǐm! Áa mmó gie á gÿo tá á ku’u légÿo menò mmɔɔn mmɔɔn.

¹⁵ Petsɔ́ pʉ̀a ne ńgɔɔn ngie aa *Elîɛ, petsɔ́ ne ńgɔɔn yɔ́b ngie aa tsɔ̌ *ntsẅì nkʉ̀ Ssé pá’ pe fʉ̀’ʉ mvfò.

¹⁶ Fùɔ *Herôd jú’ mɔɔn menò, ńgɔɔn yé ngie: Aa Jâŋ gẅie n da gÿo mé zá’a twó yé lá, mbà à zǐm.

¹⁷ Á la gwaa gwɔ́, mbà fùɔ *Herôd ka gÿo mé gwoon Jâŋ, ńkwɛ́ɛ yé ńgʉa ḿma’a ndá tsǎŋ, mélà’ *Herôdiad gẅie à laa nzwě fɛ́ we Filib, tá á kaa.

¹⁸ Jǎŋ ne ńkaga yé ngie: *Lepʉ̌ té ne ńzẅíŋe ngie ɔ̀ kaa nzwě fɛ́ gù wɔ́.

¹⁹ Á la fó pú’u, tá *Herôdiad pú ńzá’ lekwɔ̀ɔn sé, ńně fa’a shÿó légÿo mé zẅé yé, ńké tè ne ńgyá wɔ́. À tě ngyá shÿó wɔ́,

²⁰ mélà’mie fùɔ *Herôd lɔ̌ɔn ńgÿo mekù’ Jâŋ, ńně ńzsé ngie aa nyìŋ Ssé, ńgÿo pɔ́ nò gie á tyé ndʉŋ ndʉŋ, pú’u la, tá á ne ḿbɔ́ɔnte yé pɔ́ɔnte, ḿbiŋe ńnéŋe ńkwoŋo lézẅí’te shwóŋè yé tɛ’, tá’ á ke ńgege yé gege.

²¹ Atsɔ́ lyɛ̌’ gÿo ńgwɔ́, eshÿó kẅɛɛ mbwo *Herôdiad, á zẅɛ́’ pá’ mé ne ńjÿó máamáa línɔ́ɔn nɔ’ lélɔg ńkímte lyɛ̌’ gie mé la zyé fùɔ *Herôd, mbà fùɔ *Herôd tǒŋ mekěm, ńtóŋ metándá pàlÿɔ́’ ncù, mbɔɔ memáa pʉ̀a tsɛ̀ɛ ngwòŋ Galilea.

²² Mé ne ńgÿo línɔ́ɔn, míŋ *Herôdiad ŋwɛ́ we manzwě tó ńzíŋe mmó, ńzíŋ tà nò poŋo fùɔ *Herôd pâ pʉ̀a pie à ně ńtóŋo wɔ́b. Afùɔ gɔɔn né múɔ manzwě ŋwɛ́ ngie: Zɛ́te jú mmó gie ɔ̀ kwǒŋ ngie mèŋ n dɔg ḿma’a gú, tà à poŋo gú,

²³ ńgɔɔn tà fó ńkʉa ngie: Akɔ́ɔkɔ́ɔ wɔ́ gie ɔ̀ ge zɛ́te wɔ́, mèŋ n ge ná né gù. Ɔ̀ lɔɔn fó ńzɛ́te pɔ́ ngie pɔgɔ gab lefùɔ sɔ́ɔn tsetsɛ̀ɛ n zẅíŋ zẅǐŋ.

²⁴ Múɔ manzwě ŋwɛ́ kẅɛ, ńgʉa ńzɛ́te má we ngie: Mèŋ n tsẅi ngie fùɔ lɔgɔ kɔ́ ḿma’a wɔ̀ɔn? Má we tsɔ́’ ngie: Gʉa ńzɛ́te twó Jâŋ Mbabtis.

²⁵ Múɔ kÿote ńgʉa lejʉ́ŋ fùɔ ńgɔɔn né yé ngie: Mèŋ n kwoŋo twó Jâŋ Mbabtis, á tsɛ̀ɛ pàga káŋ, pɔ́ fʉ̀’ɔɔn.

²⁶ Afùɔ jú’, shÿó wé leen sẅɛ́’ tá’, le gwɔ́ gie à ně ńgɔɔn mvfò megʉ̀ pé tà ńkʉa gÿo à tè zsé lélʉ’ wɔ́.

²⁷ Á gwóon ńtúmo feffò, ńtsẅi ngie à gʉa ńdɔgɔ twó Jâŋ ńtó. Feffò gʉa ndá tsǎŋ ńzá’a twó Jâŋ,

²⁸ ńnéŋe tsɛ̀ɛ káŋ ńdɔg ńtó, ńnáa mbwo múɔ manzwě ŋwɛ́, á kẅé ńgʉa ńnáa mbwo má we.

²⁹ *Ngàŋa kwò Jâŋ gÿo ńjú’ ngie mé zẅě tá wɔ́b, ńtó ńkaa pfó yé ńdɔg ńgʉa ńtúŋ.

Yěsô jÿɔ̌g pʉ̀a tsá’ tʉ̀a

³⁰ *Megàŋ ntúm Yěsô pɛ̌ gʉa tà ḿbiŋ, ńtó ńcú’te lejʉ́ŋ yé, ńně ḿbíte shúm ntsèm sie pɔ́ pǔ ńgÿo, éshwóŋó yé tà mbɔɔ mmó gie pɔ́ zi’í pʉ̀a.

³¹ Á gɔɔn né pɔ́b ngie: Pi tó pege fa’a jʉ’ gie nyìŋ tè wó wɔ́, pi ná’a ńzẅɛte. Á gɔɔn pú’u, mélà’mie alá’ la ne ńcʉate, petsɔ́ ne ńgee, petsɔ́ ne ńtóo, tà pâ *ngàŋa kwò yé pú tè gẅiin fʉ̀’ lépfɛ́ɛ mmó wɔ́.

³² Pâ pɔ̌ kúu tsɛ̀ɛ kanú’, ńně ńgee nà jʉ’ gie membʉ̀a té wó wɔ́.

³³ Ńgwaa gʉa, alá’ gyá wɔ́b, ńdiŋe wɔ́b, ńzá’te ńgiŋ nê mekwò, éfó metÿǒsoŋ ntsèm ḿbú ńkẅɛ, ḿvɔgɔ nà yetsɔ̌ nzǐŋ, ńzẅí’te Yěsô.

³⁴ Á kúu jʉ’ó, éfó tsɛ̀ɛ kanú’ ńkẅɛ, ńgyá nùɔ lá’, mezìŋe mɔ́b kúu yé, mélà’mie pɔ́ laa pá’ nùɔ *menjʉ̀njÿò gie ampfele tè wó wɔ́ la. Á zye lézí’i wɔ́b menò tà ńgyɔ́ɔn.

³⁵ Zà’ gÿo ńcʉa, *ngàŋa kwò yé tóo lejʉ́ŋ ye, ńne ńgɔɔn ngie: Pege ee jʉ’ɔɔn nkwòŋo tsẅɛ, mbà zà’ cʉ̌a,

³⁶ tsẅi né pʉ̀a pɔ́ gʉa tsɛ̀ɛ membʉ̀a mbaa tsɛ̀ɛ melá’ mie ée ngʉ̀ŋe jʉ’ɔɔn, ńjú shúm léjÿó.

³⁷ Á tsɔ́’ɔ mbwo pɔ́b ngie: Pi zɔ náa mmó pɔ́ pfɛ́, pɔ́ tsɔ́’ yɔ́b ngie: Áa pá’ɔɔn peg gʉa ńcʉŋte máamáa nkáb, tà e ne ńku’u medenie nkÿo pʉ́a, tá ńdá’ ńdɔg ńjÿɔ́gɔ lá’ yɔɔn keen?

³⁸ Yěsô zɛ́te wɔ́b ngie: Pi gẅiin mbelég mbu’ú shÿɔ́’ɔ? Pi gʉa ńdíe pege gyá. Pɔ́ gʉa ńdíe, ḿbiŋ nzèm shwóŋó yé ngie: Peg gẅiin mbelég mbu’ú ntʉ̀a ńgÿo messó mbàŋ pʉ́a.

³⁹ Á gɔɔn né pɔ́b ngie: Pi gÿo pʉ̀a néŋte nà megǐ menùɔ menùɔ.

⁴⁰ Mé sẅɛ́’ ńnéŋte ssé menùɔ menùɔ, tsɔ́ menkàŋ gwɔ́ pʉ̀a móm ntʉ̀a, metsɔ́ gwɔ́ pʉ̀a nkÿo.

⁴¹ Yěsô kẅé mbelég ŋwɛ́ mbu’ú ntʉ̀a pɔ́ messó mbàŋ pʉ́a, ḿbʉ’ʉ twó yé, ńná ndǎg mbwo Ssé, ḿbwɔ́’te mbelég ńnáa mbwo *ngàŋa kwò yé, légwɔ́ gie pɔ́ ge gabte mbwo lá’, ńgíŋe ńgÿo pɔ́ pú’u, nà messó.

⁴² Pɔ́b metsèm pfɛ́, ńzẅɛ́.

⁴³ Mé lagte mekèm mbelég mbaa messó mie é vwɔ’ɔ́, é lúe metúŋ ntsɔ̀b pʉ́a nê legém.

⁴⁴ Pʉ̀a pie pɔ́ la pfɛ́ mbelég, la gyɔ́ɔn tɛ’, tà ndà’ mbàŋa gwɔ́ mmó ntsá’ tʉ̀a.

Yěsô giŋé ndùm ntse

⁴⁵ Yěsô gwoon ńtsẅii mbwo *ngàŋa kwò yé ngie pɔ́ kúu kanú’, ḿvɔg ńgwɔ́ mvfò, ńtúm né yetsɔ̌ nzǐŋ, á nà gwoŋó Mbetsayida, á cʉ́’ nzèm ńde’e lá’ á gʉa.

⁴⁶ Yěsô le’e lá’ tà pʉ̀a gwaa gʉa, á kwɔ́’ɔ ndùm tsɔ́ lekwɔ’ɔ́ lésẅíŋte Ssé.

⁴⁷ Nzěm gÿo ńgwaa síŋ, mbà kanú’ gʉ̌a tà ńgwɔ́ soŋ ntse, Yěsô nyé ńtyé pɔ́ ssé gílé ye,

⁴⁸ tá ńké ńgyá pá’ ntse ne ńgege pʉ̀a pé, mélà’mie fefà la ne fóo pɔ́ mvfò mvfò ńtóo. Á gÿo ńgwɔ́ nkwɔ́’ njÿó, Yěsô gwɔ jwoŋte wɔ́b, ńne ńgiŋe ndùm ntse, tà fa’a létɔ́gɔ wɔ́b,

⁴⁹ pɔ́ gyá pá’ nyìŋ ne ńgiŋe ndùm ntse, ńkwaŋ ngie áa gegÿɛ́ nyìŋ, ńzye léga’te lê tʉ̀.

⁵⁰ Pɔ́ metsèm la pú ne ńgyá yé pá’ à tóo, ḿbú ńcÿɔ’, tá Yěsô leen ńtóŋo wɔ́b, éshwóŋó wɔ́b ngie: Pi pʉ́le ńnéŋe, à gwɔ́ pɔ́ mèŋ, tà pi pɔ́g.

⁵¹ Á gɔɔn pú’u, ńkúu tsɛ̀ɛ kanú’, fefà zá’a, á cʉa wɔ́b,

⁵² mélà’mie legyè sɔ́b nyé ḿvɔ́g vɔ́g, ńzɔɔn ńgwɔ́ gwɔ́, mbà pɔ́ kaa liŋe mmó gie Yěsô kɔ’ɔ́ ńjÿɔ́gɔ lá’ ńdɔgɔ ńnyɛɛ wɔ́.

Yěsô gÿǒ meguɔ nzǐŋ Jenezared zeŋe

⁵³ Pɔ́ túm ntse, tà ńkúu nà nzǐŋ ye Jenezared, ńcʉŋe kanú’, éfó tsɛ̀ɛ wó ńkẅɛ,

⁵⁴ ńkẅɛ tà ńgwaa tyé ssé, mé liŋe Yěsô,

⁵⁵ ńgwóon ńkÿote ńgʉa tsɛ̀ɛ mbʉ̀a fa’ megàŋa guɔ, ńkaa wɔ́b nà mekǔ ńdɔg ńtó ne jʉ’ gie mé jǔ’ ngie aa wó.

⁵⁶ Á ne ńcʉa nzɔ̌ nzɔ̌ wɔ́, kà pɔ́ tÿǒsoŋ wɔ́, kà pɔ́ tsɛ̀ɛ mbʉ̀a wɔ́, mé ne ńkate meguɔ ńdɔgɔ ńtóo, ńnuŋte jʉ’ gie à ge cʉa wó, ésẅíŋte yé ngie à fó ńzẅíŋ pɔ́ kíbe pɔ́ ndà’ tsɔ́ɔn nzsǒ yé. Epʉ̀a pie pɔ́ kibé tsɔ́ɔn nzsǒ ŋwɛ́, pú ńzeŋe métsèm.