Lukase 18 - Nouveau Testament en Ngienboum

Esagá nò nà mpfɔ̌g manzwě pɔ́ tepòŋ ntsɔ́’te mentsaŋ

¹ Yěsô saga tsɔ́ nò, ńdɔg ńda’te mbwo *ngàŋa kwò yé pà’ á poŋo lésẅíŋte Ssé fʉ̀’ ntsèm té kʉ́a.

² Ńgɔ́ɔn ngie: Atsɔ̌ ntsɔ́’te mentsaŋ gwɔ́ tsɛ̀ɛ tsɔ́ tÿǒsoŋ, à tè Ssé pɔ́g, ḿbiŋ tè líe nyìŋ mesoŋ pá’ tsɔ́ mmó wɔ́.

³ Atsɔ̌ mpfɔ̌g manzwě gíŋ ńgwɔ́ yé wó, ńnéŋe ńtóo fʉ̀’ ntsèm, ńgɔɔn mbwo yé ngie: Ŋag yɔ̀ɔn ntsaŋ, éfege wég ngàŋ mbù wɔ̀ɔn.

⁴ Ńké ńdá’a ńgwáa ńtóo tǒ à tě ńdíe yé wɔ́, tà fó lyɛ̌’ ńkwaŋa ntʉ́m ye ngie: Mèŋ, n tè Ssé pɔ́g, ḿbiŋ ńké tè líe tsɔ̌ nyìŋ mesoŋ pá’ tsɔ́ mmó wɔ́,

⁵ tá, manzwě wɔɔn la lá’ ńzye lépége wɔ̀ɔn tà ńkú lyɛ̌’ɔɔn, mèŋ n ge zá’ ntsaŋ ye, á le gíŋe ńgwá ńtó, ńcú’u twó yɔ́ɔn mɔ́.

⁶ Yěsô fó mǒ ngie: Pi cwoŋo ńjú’ gí nò gie ntsɔ́’te ntsaŋ wɔɔn gɔ̌ɔn, tá ńgwɔ́ tè pɔ̌g Ssé.

⁷ Tà ngʉ̀a shÿɔ́’ɔ nà Ssé? Á ge gǎ tá á le lwo ńtó ńkẅéte pʉ̀a pie à la tsɔ́’ɔ wɔ́b ńdɔg ńgÿo pé wɔ́? Tá pɔ́ ne ńdʉa ńtóŋo yé fʉ̀’e zsǒ pɔ́ tsẅɛ́’?

⁸ Tà mèŋ n ké shwóŋó gẅí, à tè láté létó ńkẅéte wɔ́b gwɔ́. Tá’, tà á pá’ɔɔn, *Míŋ Nyìŋ gÿo ńgwaa tóo ndùmo ssé tsetsá’, ńgyá pʉ̀a mesoŋ ne ńzába ntʉ́m nà Ssé?

Anò nyìŋ farisay pɔ́ nkẅè ncùb

⁹ Yěsô gíŋ saga tsɔ́ nò ná pʉ̀a pie pɔ́ kwaŋ ngie pɔ́ zɔ̌ gÿo mmó gie Ssé ne ńkwoŋo, ḿbiŋ ńcʉ́’ʉ ńgwága petsɔ́ pʉ̀a gwǎg,

¹⁰ ńgɔɔn ngie: Tsɔ́ pʉ̀a mépʉ́a lá’ ḿbʉʉ *jʉ’ʉ Ssé lésẅíŋte Ssé, tà’ gwɔ́ nyìŋ nà nùɔ pà *farisay, wetsɔ̌ gwɔ́ nkẅè ncùb pà *Roma.

¹¹ Nyìŋ *farisay kúu wó, ńtyé mángyɛ̌ ńně sẅíŋte Ssé ngie: E Ssé yɔ̀ɔn, mèŋ n nǎ ndǎg mbwo gù tɛ’, ńtí pá’ ɔ̀ la gÿo mèŋ n tè gwɔ́ pá’ petsɔ́ pʉ̀a mesoŋ wɔ́. Pɔ́ ée metsǒŋ, pɔ́ té gÿo mmó gie ɔ̀ ne ńkwòŋo wɔ́, éfʉte mezwě pɔ́b, mèŋ n nǎ ndǎg mbwo gù, mélà’mie mèŋ n tè pá’ nkẅè ncùb pà *Roma ŋwɛ́ wɔ́.

¹² Mèŋ, n gee ńkwoŋo kwoŋ ńzɔ́gɔ nzyè ngʉ̀a mbʉ́a nà ngàba lá’, ńgíŋe ńgabte shúm sɔ́ɔn nzsè legém, ńnáa tà’ nzsè mbwo gù.

¹³ Ankẅè ncùb ŋwɛ̌ tyé yé pɔ́ taa nzèm, éfó tè ku’u lépʉ’ʉ twó yé ńdíe tÿǒ wɔ́, ńcʉ́’ sɔbɔ twó yé ssé ńgɔɔn ngie: E Ssé yɔɔn, tsɔ́ɔn mezìŋe mɔ́ɔn, mèŋ n deen ńgwɔ́ pɔ́ nyìŋ tepòŋ.

¹⁴ Yěsô ma’a twó yɔɔn nò ngie: Tà mèŋ n ké shwóŋó gẅí, wɔ̀ɔn nkẅè ncùb la gwaa piŋ lê ndá yé, e Ssé tè nyé ne ńda’a yé wɔ́. Tá, ńké ńgʉa ná nyìŋ pà *farisay wɛ̌, e Ssé ké ne ńdá’a yé la’. Áa pú’u, tá ńgwɔ́ gie nyìŋ lɔɔn ńŋá’te nnɛ́, mbà mé ge sẅé’e yé náa ssé, ésẅé’e nnɛ́, mbà Ssé ge pʉ’ʉ yé tÿɔ́g tÿɔg.

Yěsô kwoŋo gígyé gubé

¹⁵ Etsɔ́ pʉ̀a gÿo ńdɔg mbɔɔ púɔ mepÿɛ́, ńtóo mvfò Yěsô légwɔ́ gie à ge záb mbwo twó pɔ́b, *ngàŋa kwò yé gyá ńne ńtɔ́’ɔ pɛ̌ pʉ̀a.

¹⁶ Tá Yěsô tsẅi mé lɔgɔ wɔ́b ńtó tó. Á gɔɔn ngie: Pi nyé gígyé gubé pɔ́ tó ńkẅɛ́te wɔ̀ɔn, tà pi táte wɔ́b. Epʉ̀a pie ée pá’ gubé zɔ̌ gẅiin nò nà *lefùɔ Ssé.

¹⁷ Mèŋ shwóŋó gẅí, kwà’ nénʉ́, nyìŋ lɔɔn tè cʉ́’ pá’ mûɔ mémúɔ, ńzẅíŋ ngie Ssé zɔ cʉ’ʉ́ sá’a yé wɔ́, mbà pɔ́ Ssé téen ńdá’a ńteme nò wɔ́, ńzẅíŋ *lefùɔ Ssé pá’ mûɔ wɔ́, mbà ngàŋ à tè ku’u lé lá’ ńkúu nà nò lefùɔ ŋwɛ́ wɔ́.

Anò ngàŋa mmó pɔ́ Yěsô

¹⁸ Atsɔ̌ ńkěm pà Yuda tó ńzɛ́te Yěsô ngie: Tsítsà we mbòŋo, à lɔɔn ńgwɔ́ mèŋ n gÿo lêkɔ́ tá ńgẅiin le gwɔ́ tèmì?

¹⁹ Yěsô tsɔ́’ ńzɛ́te yé ngie: Ɔ̀ tóŋo wɔ̀ɔn le nyìŋ mbòŋo mélà’a kɔ́? É té ndà’ Ssé wɔ́, mbà tsɔ́ nyìŋ mbòŋo tè wó wɔ́.

²⁰ Ɔ̀ tè ne ḿmoŋe mbʉ̌ Ssé wɔ́, e Ssé la záb ngie: Tè gÿo gÿɛ́, tè zẅé nyìŋ, tè jʉ, tè tÿɔ́g sóon twó nyìŋ, ná mekù’ tá gù pɔ́ má gù

²¹ Nyìŋ ŋwɛ́ tsɔ́’ ngie: Tà fó pá’ n dà nyé mûɔ shùm, mèŋ n gee ńké ńtsẅé ńkú’te mbʉ̌ mɛ̂ ku’té ntsèm.

²² Yěsô zẅí’te tà ńtsɔ́’ɔ mbwo yé ngie: Tà’a mmó kě ńnyé ńzága mbwo ɔ̀. Gʉa sẅiŋ shúm shú ntsèm, ńgab nkáb mbwo pàtèmmó, ńdeen ńké ńdá’ ńgẅiin shúm tʉ̀ nzẅìŋ tÿǒ lepwó, gʉa ńgÿo pú’u, ḿbiŋ ńtó ńcʉ́me nzèm mèŋ.

²³ Á jú’, eshÿó wé sẅɛ́’, mélà’mie à la gẅiin shúm nkáb tɛ’.

²⁴ Yěsô gyá ntí gie eshÿó wé lɔ̌g sẅɛ́’, ńgɔɔn ngie: Á pú ńtʉ pá’ à lɔɔn ńgwɔ́ ngàŋa mmó zẅíŋ ngie Ssé zɔ cʉ́’ʉ sá’a yé.

²⁵ Á zeŋe mbwo shÿóon léshúu tsɛ̀ɛ njwóŋ lesyɛ’ɛ́, ńcʉa ngàŋa mmó lézẅíŋ ngie Ssé zɔ cʉ́’ʉ sá’a yé.

²⁶ Epʉ̀a pie pɔ́ la ne ńjú’u yɔɔn nò gɔɔn ngie: Tà á lɔɔn ńgwɔ́ pɛ́’ɛ, mbà wɔ̌ ge lá’ tsẅɛ́?

²⁷ Yěsô gɔɔn ngie: Anò gie á cʉa pʉ̀a mesoŋ, á té Ssé cʉa.

²⁸ Piɛ gɔɔn mbwo Yěsô ngie: Tà peg léen ńnyé yég kɔ̀ɔkɔ́ɔ, ńcʉ́me nzèm gù pá’ɔɔn lá.

²⁹ Yěsô tsɔ́’ ngie: Tà mèŋ shwóŋó gẅí, kwà’ nénʉ́, nyìŋ lɔɔn ńnyé ndá ye, ńnyé nzwě we, ńnyé méfɛ̌ pé, ńnyé tá we pɔ́ má we, ńgwá’ gubé yé, ńtí léfùɔ Ssé,

³⁰ mbà ngàŋ ge zso pɔ́ fʉ̀’ɔɔn gíŋe gẅiin sɛ̌ shúm tà tɔ́g sie à ka nyě, é lá’ gwɔ́ tsɛ̀ɛ ngwòŋ sẅé, é gẅiin le gwɔ́ tèmì.

Yěsô giŋé ńgɔɔn ntí legwé gie à ge lá’ kwé yɛ̌

³¹ Yěsô fâg *ngàŋa kwò yé ntsɔ̀b pʉ́a nê legém, pâ pɔ̌ tyé, á gɔɔn né pɔ́b ngie: Pi jú’ mboŋó, pege ee mánzsè ńne ḿbʉʉ né Yerósalem pá’ɔɔn, é kúu wó, akɔ́ɔkɔ́ɔ gie *pàntsẅi nkʉ̀ Ssé la ŋwe’e ńtí *Míŋ Nyìŋ wɔ́ à pumte.

³² Mé ge zɔɔn kúu wó, ésẅiŋe yé mbwo pàtè zsě Ssé pie pɔ́ sá’a lá’ yɔɔn, pɔ́ zoonte yé, ńtém shʉ́ ná ye, ńtsɔg métyé ná ye,

³³ é lɔg ngwɔ̀ɔn cúa yé, é gÿo mé zẅé yé, à piŋ ńzíme nà legwé nà mbɔ́ɔntè lyɛ̌’ tá.

³⁴ Tá’, Yěsô gɔɔn pá’ɔɔn, *ngàŋa kwò yé pú tè jú’u tsɔ́ mmó nà nò gie à gɔ̌ɔn wɔ́, ashwóŋè yé ké ńtebe wɔ́b tebe, pɔ́ té jú’u nò gie à lɔgɔ ńgɔɔn mboŋó wɔ́.

Yěsô tǒ Yériko ńgÿo fʉ̀ menÿɔ́g gyá jʉ’

³⁵ Yěsô gʉa tà ne ńkúu tÿǒsoŋo Yériko, atsɔ̌ fʉ̀ menÿɔ́g ńnéŋe ngʉ̀ŋe mánzsè ńne ńdúɔ ndúɔ,

³⁶ ńjú’ pá’ alá’ ne ńzẅɛ́ɛ shwǒŋ ńcʉa, ńzɛ́te pʉ̀a ngie: Áa kɔ́?

³⁷ Epʉ̀a tsɔ́’ ngie: Aa Yěsô mûɔ Nǎzarɛd gẅie à cʉa.

³⁸ Á leen ńké ńzye léga’te lê ngyè tetʉ́ʉ ngie: Yěsô nyìŋ nà ngẅɛ̀ fùɔ Ndavíd, tsɔ́ɔn mezìŋe mɔ́ɔn.

³⁹ Epʉ̀a pie é ke ńgwɔ́ mvfò ńgiŋe, ne ńkaga yé ngie à láŋte. Tá á fó ḿmege ńná ngyè ye tÿǒ ngie: Yěsô, nyìŋ nà ngẅɛ̀ fùɔ Ndavíd tsɔ́ɔn meziŋe mɔ́ɔn.

⁴⁰ Yěsô tyé ńtsẅi ngie mé lɔgɔ yé ńtó ńná né yé, á tó tà ńkúu lejʉ́ŋ yé, Yěsô zɛ́te yé ngie:

⁴¹ Ɔ̀ tsɔɔn ngie mèŋ n gÿo lêkɔ́ ná gù? Afʉ̀ gɔɔn ngie: Andè, mèŋ n tsɔɔn légíŋe ńgyá jʉ’.

⁴² Yěsô gɔɔn né yé ngie: Pá’ ɔ̀ zǎb ntʉ́m ɔ́ ná mèŋ lá, gyá jʉ’!

⁴³ Fʉ̀ ŋwɛ́ gwoon ńgíŋe ńgyá jʉ’, ńcʉ́me nzèm Yěsô, ńgiŋe ńgu’te Ssé, alá’ gyá yɔɔn nò, ńgwóon ńzye lé pú ńgu’te Ssé.