Heber 2 - Nouveau Testament en Ngienboum

MÀbɔ́ɔn nyìŋ légwága nò letsẅɛ́ gie Mìŋ Ssé la lɔg ńtó

¹ Pú’u la, pege kwa’ ńgẅiin lé ké ńkú’te nò gie pege la jú’ kú’te, tà á té pú’u wɔ́, mbà pege ge fʉa mánzsè, é gʉa pyé,

² pege ne ńzsé ngie, nò gie *mecÿɔ́’ Ssé la lɔg ńtó fʉ̀’e mvfò, á la tè méjʉ’ʉ nò wɔ́. Wɔ̌wɔ́ɔ gẅie à lɔ̌ɔn fʉa yɛ̌ nò, ńtʉʉ twó mǒ, e Ssé lɔ̌ɔn ńnéŋe ngʉ̀ngʉ̀ ná ye pɔ́ ná pá’ á ne ńzɛ́te.

³ Pá’ á laa pú’u la, pege lɔɔn ńgwágte nò ná máamáa nò gẅie aa pá’ e Ssé la gÿo pege tsẅɛ́, e Ssé gǎ tà ńnyé wégè? Cʉ̀apʉ̀a Yěsô lê twó yé la vɔg ńzye létsẅii yɛ̌ nò. Epʉ̀a pie pɔ́ la jú’u ncwò yé, gÿo ńkwa’ shwóŋó wégè ngie aa kwà’ máamáa nò.

⁴ E Ssé gíŋ ńtóonte wɔ́b á nà nò gie pɔ́ ne ńgɔɔn, ńcʉa nà meliŋé, pâ menò mmɔɔn mmɔɔn, pâ mendàa gyá mentí mentí, ńgíŋ ńcʉa nà mefà’ mie à zába na we lekwoŋ ngie Zẅìge Ndʉalʉ̌a ge cÿó gʉm pʉ̀a pɔ́ ku’u léfa’.

Míŋ Ssé zɔ gÿo tá pʉ̀a mesoŋ tsẅɛ́ɛ

⁵ E Ssé la zɔɔn tè gÿo ngie mecÿɔ́’ pé gẅiin nò ná lesǎ’ ngwòŋ gẅie é ne ńtóo wɔ́, é ngwòŋ gẅie pege ne ńgɔɔn nò mǒ.

⁶ Tsɔ̌ nyìŋ la zɔɔn ńŋwe’e mmó ná yɔɔn nò á tsɛ̀ɛ tsɔ́ jʉ’ʉ ŋwà’ne Ssé ngie: E Ssé, nyìŋ mesoŋ aa pá’ɔɔn ńgwɔ́ kɔ́ tà ɔ̀ ńnéŋe ńkwaŋte yé? Múɔ gẅie nyìŋ mesoŋ zyě á gwɔ́ kɔ́ tà ɔ̀ ńnéŋe ńtÿɔ́’te yé?

⁷ Ɔ̀ la gʉa ná pá’ *mecÿɔ́’ Ssé gwɔ́, ésẅé’e yé ńnáa ssé pɔ́ méjʉ’ ńcÿó gʉm yé, ńtɔ’ɔ cÿɔ́’ɔ lefùɔ twó yé, á gie á gÿo á gẅiin legú’.

⁸ Ɔ̀ la lɔgɔ yé ńgÿo nyìŋ gẅie à sá’a shúm ntsèm sie ɔ̀ la nyɛte, ńgÿo ngie kɔ̀ɔkɔ́ɔ à jú’ ncwò wé. E Ssé la gwaa ye à kɔ̀ɔkɔ́ɔ jú’ ncwò nyìŋ mesoŋ pá’ɔɔn à těen ńgɔɔn ńtsẅe tsɔ́ gie á ge nyé té jú’ ncwò wé wɔ́. Á ké ńgwɔ́ fʉ̀’ɔɔn pá’ɔɔn, pege tè ne ńgyá ngie shúm ntsèm ne ńjú’u ncwò nyìŋ mesoŋ ŋwɛ́ wɔ́.

⁹ Tá’, ammó gie pege ne ńgyá fʉ̀’ɔɔn gwɔ́ pɔ́ ngie Yěsô gẅie e Ssé la sẅé’e yé ńnáa ssé tà *mecÿɔ́’ Ssé cʉa yé méjʉ’, e Ssé lêen ńtɔ́’ɔ cÿɔ́’ɔ lefùɔ twó ye, á gie á gÿo á gẅiin legú’, ḿbiŋ ńnéŋ mekù’ mé, mélà’mie à la zẅíŋe légyá ngɔ́’ tà ńkwé. Yěsô lɔ̌ɔn ńkwé ná twó pʉ̀a mesoŋ metsèm, á fó pɔ́ ná pá’ e Ssé tsɔ́ɔn mezìŋe pʉ̀a tɛ’.

¹⁰ E Ssé la gÿo shúm ntsèm sie ée tsɛ̀ɛ njÿó é gwɔ́ wó, ńgwɔ́ pɔ́ shúm sé. Pá’ à la piŋ ne ńkwoŋo ngie pʉ̀a tà ńgyɔ́ɔn ge cʉ́’ púɔ pé, é gwɔ́ tsɛ̀ɛ legú’ we la, Yěsô zɔ̌ piŋ ńgẅiin légÿo pɔ́ tsẅɛ́ la, á la ne ńzɛ́te ngie à gÿo Yěsô fó nà ngɔ́’ gie à gyǎ, ńku’u nyìŋ gẅie à ge gÿo pɔ́ tsẅɛ́.

¹¹ Yěsô gẅie à zɔɔn ńgÿo pʉ̀a ku’u pʉ̀a Ssé mbɔɔ pʉ̀a pie à kéen ńgÿo pɔ́ ku’, pâ pɔ̌ pú ńgwɔ́ pɔ́ pʉ̀a tà’ nyìŋ. Áa mmó gie á gÿo eshʉ́ té kúu yé létóŋo wɔ́b lê mefɛ́ pé wɔ́.

¹² À la zɔɔn ńgɔɔn mbwo Ssé ngie: Mèŋ n ge gÿo shwóŋ mefɛ́ pɔ́ɔn nyìŋ gẅie ɔ́ɔ wɛ̌. Mèŋ n ge gÿo tyé tsɛ̀ɛ cú’tè é gu’te gú.

¹³ Ńgíŋe ńgɔɔn ngie: Mèŋ n ge záb ntʉ́m wɔ̀ɔn nà Ssé. ńgíŋe ńgɔɔn ngie: Wɔ́ɔn wɔɔn, mbà pega gubé gie e Ssé la náa wɔ́b né mèŋ tǒ.

¹⁴ Ńgɔɔn pú’u, e gubé ŋwɛ́ gwɔ́ pʉ̀a mesoŋ. Pá’ pʉ̀a mesoŋ gwɔ́ pɔ́ tà’a mmó, ńgẅiin mbab nnɛ́, ńgẅiin metse la, yé lê twó yé la gíŋe ńcʉ́’ yé nyìŋ mesoŋ pá’ pɔ́b, légwɔ́ gie à ge táa fó nà legwé we, é gwoon nyìŋ gẅie à gÿo pʉ̀a kwéte, é kẅé metʉ̀ mé. Mé tóŋo ngàŋ lê Sátà

¹⁵ À la táa ńkwé, lélɔg pú’u, éfó tsɛ̀ɛ ndá nkwɔɔn, ńkẅile pʉ̀a metsèm pie tà fó pá’ mé la zyé wɔ́b, pɔ́ ée ńzɔ́gɔ ḿbɔ́gɔ lékwé tà mbà pɔ́ léen ńcʉ́’ ńgwɔ́ mbwo legwé ńgwɔ́ pɔ́ menkwɔɔn pé.

¹⁶ Á zɔɔn ńgwɔ́, kwà’ nénʉ́, ngie Yěsô la tè tó lékẅéte *mecÿɔ́’ Ssé wɔ́, à la tóo lékẅéte pʉ̀a ngẅɛ̀ ndá Ábalam.

¹⁷ Á laa pú’u, ńne ńzɛ́te ngie à gʉa nà kɔ̀ɔkɔ́ɔ ḿbú ńgwɔ́ yé pɔ́ pá’ mefɛ́ pé, à cʉa pú’u, à gwɔ́ *nùŋe pwɔ́’ we lÿò gẅie à neŋé ńtsɔ́ɔn mezìŋe pʉ̀a, ńzsé yé pɔ́ ndà’ léfa’a mbwo Ssé, légwɔ́ gie à ge gÿo e Ssé lege mefʉa pʉ̀a mesoŋ.

¹⁸ Á zɔɔn fó ná pá’ Yěsô lê twó yé la gyá ngɔ́’, nkwà’te gíŋe ńkúu yé, á ku’u lékẅéte pʉ̀a pie nkwà’te ne ńkúu wɔ́b yɔ́b.