Heber 10 - Nouveau Testament en Ngienboum

¹ Mendendá’ mie ée nà *lepʉ̌ Mǒsê zɔɔn ńgwɔ́ pɔ́ jʉ́jʉ́ŋ shúm mbòŋo sie e Ssé la gÿo pá’ é ge lá’ tó, é téen ńdɔgɔ ńgwɔ́ kwà’ sɛ̌ shúm wɔ́. Áa mmó gie á gÿo, ńgwɔ́ *lepʉ̌ ŋwɛ́ é le lɔgɔ nò pwɔ́’ gẅie á né ńzɛ́te ngie me lɔg ńtóo mvfò Ssé ngù’ ntsèm, é ké ńgwɔ́ pɔ́ tà’ ntí, ńdɔg ńgÿo pʉ̀a pie pɔ́ ne ńtsɔ́ɔn létsóte nnɛ́ nê lejʉ́ŋ Ssé, ku’u légwɔ́ pà tè *lɔ̌’ wɔ́.

² Á laa pé’e lenùŋe pwɔ́’ mvfò Ssé ná yɛ̌ ntí kẅile *lɔ̌’ ná pʉ̀a tà ntʉ́m wɔ́b té gíŋe ńŋaga wɔ́b nà tsɔ́ nò wɔ́, mbà mé ée ńcʉ́’ʉ ńnuŋe tsɔ́ pwɔ́’ wɔ́.

³ Mé lɔɔn ńcwoŋo ńdíe mboŋó, mbà yɛ̌ ntí lenùŋe pwɔ́’ aa legwɔ̌ ngù’ ntsèm ńkímte mbwo pʉ̀a mesoŋ ngie pɔ́ ée pʉ̀a tepòŋ.

⁴ Á nue atsɔ̌ le gwɔ́ gẅie à lɔɔn ńgwɔ́ metse melúm mefòŋ mbɔɔ me mekùkwòon fó ná nyìŋ mesoŋ ńzyɛ́b menò tepòŋ á té wó wɔ́.

⁵ Áa mmó gie á la gÿo Kristo gwaa tóo tsɛ̀ɛ njÿó, ńgɔɔn mbwo Ssé ngie: Ɔ̀ la tè shúm pwɔ́’ kwoŋ, ńké tè menɔ̀ɔn pie mé zẅé ńdɔgɔ ńgu’te gú kwoŋ. Tá ńké ńná mbùm nnɛ́ né mèŋ

⁶ Ɔ̀ tè kwoŋ pwɔ́’ gẅie mé pǔ ńtuɔ nɔ̀ɔn pɔ́ ntsèm wɔ́, ńké tè kwoŋ pwɔ́’ gẅie mé nuŋe mvfò gù ńtí nò tepòŋ wɔ́.

⁷ Á cʉa pú’u, mèŋ n gɔɔn ngie: Wɔ́ɔn wɔɔn, mbà Ssé, n ne ńtóo légÿo mmó gie ɔ̀ ne ńkwoŋo. Á gwɔ́ ndʉŋ ndʉŋ mmó gie mé la ŋwe’e tsɛ̀ɛ lepu’ú ŋwà’ne jú ńtí wɔ̀ɔn.

⁸ À zɔɔn ḿvɔg ńgɔɔn ngie: «Ɔ̀ tè kwoŋ pwɔ́’ wɔ́, ńké tè kwoŋo mmó gie mé lɔg ńtóo mvfò gù wɔ́, ńké tè kwoŋo nɔ̀ɔn gẅie mé pǔ ńtuɔ yé pɔ́ ntsèm wɔ́, ńké tè kwoŋ pwɔ́’ gẅie mé nuŋe mvfò gù ńtí nò tepòŋ wɔ́, sɛ̌ shúm té gú poŋ, tá é ké ńgwɔ́ pɔ́ shúm sie *lepʉ̌ ne ńzɛ́te ngie mé gÿo».

⁹ Kristo pɔ́ɔnte ńgɔɔn ngie: «Wɔ́ɔn wɔɔn, n ne ńtóo légÿo mmó gie ɔ̀ ne ńkwoŋo», Kristo gɔɔn pá’ɔɔn, ńdɔg ḿbyága ndùŋ mvfò ntí lenuŋe pwɔ́’, ńdɔg ye sẅé ńkúbe.

¹⁰ Kristo la gÿo mmó gie e Ssé ne ńkwoŋo. À la náa twó mbùm yé tà’ legʉ̀a á ku’. Á lɔg pú’u, ńgÿo peg ku’ pʉ̀a Ssé.

¹¹ Á gʉa ná nùŋe pwɔ́’ we nzẅìŋe *kʉ̀a, mbà à gwɔ́ lyɛ̌’ ntsèm, ńtyé pɔ́ ncwò fà’ ye, ńké ńnuŋe pɔ́ tà’ ntí pwɔ́’ gie e lɔɔn ńgwɔ́ é le lá’a tsɔ́ lyɛ̌’ ńku’u léfóo ná nyìŋ ńzyɛ́b menò tepòŋ mé wɔ́.

¹² Tá á ké ńgʉa ná Kristo, mbà à la nuŋe pwɔ́’ ńtí menò tepòŋ pʉ̀a mesoŋ, á tà’ legʉ̀a á ku’ pɔ́ ndà’ ndà’. Á gʉa sẅɛ́’ ńnéŋe nà gwǒŋo pwó Ssé ye tʉ̀.

¹³ Áa jʉ’ó tà ńkú fʉ̀’ɔɔn, ńne ńzẅí’te ngie Ssé lɔg megàŋ mbù pé ńgÿo ntÿɔgɔ́ mekwò mé.

¹⁴ Wɔɔn aa pá’ à la lɔg pɔ́ tà’a mmó wémɔ’ɔ́ gẅie à nǎ mbwo Ssé, ńgÿo pʉ̀a pie pɔ́ zẅɛ́’ɛ yé, ńku’ pʉ̀a Ssé, é gwɔ́ pà tè *lɔ̌’ pɔ́ ndà’ ndà’.

¹⁵ Ammó gie a Zẅìge Ndʉalʉ̌a gíŋe ńne shwóŋó wégè ngie áa nò. Á vɔg ńgɔɔn ngie:

¹⁶ Cʉ̀apʉ̀a gɔ̌ɔn ngie: Mɛ̌ melyɛ’ɛ́ lá’ ge lá’ gwɔ́ tà tɔ́g, À lii *kʉ̀a gie n ge lá’ gwaa tsetsɛ̀ɛ pega pɔ́, à yɔɔn, Mèŋ n ge lá’ gÿo letʉ́m sɔ́b tyé pɔ́ ná mbʉ̌ mɔ́ɔn. Mbɔɔ nkwaŋá wɔ́b tyé pɔ́ nà mbʉ̌ mɔ́ɔn

¹⁷ Ńgíŋ ḿbɔ́ɔnte ńgɔɔn ngie: «Á gʉa nà menò tepòŋ mɔ́b mbɔɔ nà menò mɔ́b mie é té tyé, n de lá’ ńgíŋ ńkímte wɔ́».

¹⁸ Á ké ńzɔɔn ńgʉa nà fʉ̀’ gie, e Ssé vɔ̌g tà ńdege mefʉ̀a nyìŋ ńnáa mbwo ye, agàŋ tè gíŋe ńtóo mvfò Ssé ńnáa tsɔ́ mmó ńtí menò tepòŋ wɔ́.

Pege sẅɛ’te nnɛ́ ńgʉa nê lejʉ́ŋ Ssé

¹⁹ Mefɛ́ pɔ́ɔn, pá’ áa pú’u la, pege ee fʉ̀’ɔɔn, ńkwa’ ne ńzsé mboŋó ngie atsɔ́ mmó cʉ́’ʉ ńne ńtáte wégè lécʉa ńkúu ná kwà’ jʉ’e Ssé wɔ́, pú’u, ńzẅɛ́’ɛ pá’ Yěsô la pfɛte metse mé.

²⁰ À la shʉa máamáa mmó nzsǒ gẅie mé la lɔg ńtsɛ́ nzsè lékúu kwà’ jʉ’e Ssé, ńdɔg pú’u, ńtsɔ́’ɔ mánzsè gẅie pege ge pfó mǒ kúu jʉ’ gie e Ssé ee wó. Á gwɔ́ we sẅé gẅie pege ge cʉa mǒ é gwɔ́ wó. Máamáa nzsǒ gie à la shʉa, e gwɔ̌ pɔ́ mbùm nnɛ́ ye gie mé la kime nà tÿǒ nkǐ.

²¹ Pege lɔgɔ pú’u, ńgẅiin *nùŋe pwɔ́’ we lÿò gẅie aa kwà’ wɛ̌, yé zɔ̌ líe pʉ̀a Ssé.

²² Pú’u la, pege gwɔ́ sẅɛ’te nnɛ́ nê lejʉ́ŋ Ssé, ńgẅiin ntʉ́m gẅie ée nénʉ́, ḿbiŋ ńzáb ntʉ́m nà Ssé kwà’ mboŋó, á nue Yěsô ka lɔg metse mé ésɔg letʉ́m ségè tà é té gíŋe ńne ńŋaga wégè wɔ́, à ka lɔg ntse gẅie é ne ńdʉ́a ésɔg mbùm yege.

²³ E Ssé ka ka’a mmó mbwo pege. Aa ḿbiŋe ńka’a mmó, ńdá’a ńgÿo pɔ́ yɛ̌. Pú’u la, pege ké ńne ńkẅi’i shʉa shʉa ńgɔɔn ngie, pege ne ńzẅí’te mmó gie à la ka’ tà pege é le ne mʉ́’te wɔ́.

²⁴ Tà nyìŋ wege gwá’a lÿɔ̀g á lélíe fɛ́ we, á gíŋ ńdíe yé yé, ńzsé ngie pege ge lɔg pú’u, kẅiŋte membùm mégè ná legẅiin nkwòŋe mbɔɔ ná lefa’ mefà’ mbòŋo.

²⁵ Tà pege nyé lé ké ńne ńtóo mecú’tè mégè tǒ, tà mbɔɔ pá’ letsǒ cú’tè à kéen ńcʉ́’ʉ mà mbwo tsɔ́ pʉ̀a la, tà ńcʉ́’ pú’u, nyìŋ wege kẅiŋte fɛ́ we, á kẅiŋte yé yé, á nue pi ne ńgyá pá’ lyɛ̌’ lá’ Cʉ̀apʉ̀a ne ḿbɔ́ɔnte.

²⁶ Mé lɔɔn ńzɔɔn ńnyɛɛ wégè nò nénʉ́ tà pege ne ńzsé mboŋó, ḿbiŋ ńgwá’, ńké ńgÿo pɔ́ nò tepòŋ tà ńne ńzsé zsě, mbà tsɔ́ pwɔ́’ ndyɛ̀’ɛ gẅie ńgwɔ́ mé nuŋe lélɔg ńzyɛ́b menò tepòŋ mégè, é té gíŋe ńgwɔ́ wó wɔ́.

²⁷ Pege cʉ̌’ ńgẅiin pɔ́ légwɔ zẅí’te mmó gie á ne ńtóo, ńgíŋe ne ḿvɛɛ, yɛ̌ mmó wɔ́ ngie mé ge gÿo ŋag pʉ̀a mesoŋ mbɔɔ ngie, nkʉ̀’ʉ pà mmɔ̌g e ge gÿo tuɔ pàtʉʉ twó mbwo Ssé.

²⁸ Mé zɔɔn ńzsé ngie, nyìŋ lɔɔn fʉa *lepʉ̌ Mǒsê, mé zẅé ngàŋ, pɔ́ tè tsɔ̌ɔn mezìŋe mé, pá’ pàjÿò ńgyá mépʉ́a kà métá wɔ́ lɔɔn ńgɔɔn ngie áa nò.

²⁹ Tà á lɔɔn ńgwɔ́ pú’u, mbà pi kwǎŋ gí ngie ngʉ̀ngʉ̀ gie á ne ńzɛ́te ngie mé zába twó nyìŋ gẅie à lɔgɔ́ míŋ Ssé ńtóŋ sɛ̌ shúm e ge lá’ ńgwá’a la? Mé gɔɔn nyìŋ gẅie à gwagá nò metse mie e Ssé lɔgɔ ńgwaa *kʉ̀a, é gwɔ́ mie mé la lɔg ńgÿo á cʉ́’ʉ nyìŋ Ssé, á nyìŋ gẅie à zoonté Zẅìge Ndʉalʉ̌a gie á gÿo pege zsé pá’ ntʉ́m Ssé poŋo nzèm pege pú’u.

³⁰ Pege zɔɔn ńcwoŋo ne ńzsé nyìŋ gẅie à la gɔɔn ngie: «Mèŋ n zɔ gẅiin létsɔ́’ɔ nò tepòŋ ńnáa tsɔ́, mèŋ n zɔ gẅiin ntsɔ’ɔ́ fà’ we wɔ̌wɔ́ɔ». À la gíŋe ńgɔɔn ngie: «Cʉ̀apʉ̀a ge gÿo ŋag pʉ̀a pé».

³¹ Ammó gie ńgwɔ́ nyìŋ ńnéŋe ḿbɔ́g tɛ’, aa légwe ntsaŋ á mvfò Ssé gẅie aa ńgwɔ́ pɔ́ wó!

³² Tá’, tà pi lege pá’ á laa ná mendùŋ mvfò melyɛ̌’, á ná pá’ pi la gwɔ́ tà Ssé lɔgɔ kyɛ̀’ ńkyɛ’ɛ gẅí, pi gyá ngɔ́’ tɛ’. Mé ma’a gẅi lê ncù tɛ’, tá pi ke shÿɔg shÿɔg.

³³ Mé ne ńtyé mvfò lá’ ńzoon gẅí, ńkʉ́e gẅí, pi gíŋe ńgyá ngɔ́’ nue pi ne ńtága nzèm pʉ̀a pie mé ne ńgege wɔ́b pá’ pi.

³⁴ Megàŋa tsǎŋ la ne ńgyá ngɔ́’, pi kú gí nùɔ pɔ́b. Afʉ̀’ gie mé la gwoon shúm sí ńkẅé, pi lɔg pɔ́ lekág ńzẅíŋ mé kẅé, á nue pi la ne ńzsé ngie pi gẅiin tsɔ́ shúm é gwɔ́ sie é poŋ ńcʉa sɛ̌ ḿbiŋ ńgwɔ́ sie é ge lá’a gwɔ́ pɔ́ wó.

³⁵ Pú’u la, tà pi kʉ́a lézáb ntʉ́m nà Ssé, á nue máamáa ntsɔ’ɔ́ fà’ aa mǒ.

³⁶ Á zɔɔn ńne ńzɛ́te ngie pi ké ńkag pɔ́ tʉ̀, ńzsé ngie pi ge ne gÿo pɔ́ mmó gie e Ssé ne ńkwoŋo, à fó pú’u, pi gẅiin mmó gie à la ka’a lé náa mbwo pi.

³⁷ Á zɔɔn ńgwɔ́ tsɛ̀ɛ ŋwà’ne Ssé, mbà mé la ŋwe’e ngie: Á cʉ́’ʉ méjʉ’, á kwà’ mûɔ méjʉ’ nyìŋ gẅie à ne ńtóo, à tó. À tè láte wɔ́.

³⁸ Awɔ̀ɔn nyìŋ gẅie n gyǎ ngie aa ndʉŋ ndʉŋ mvfò mèŋ, ge gwɔ gwɔ́ wó, éfó ná pá’ à zǎb ntʉ́m ná mèŋ. Tá ńké ńgwɔ́ gie à lɔɔn ḿbiŋ nzèm, anò yé le gíŋe ḿboŋo wɔ̀ɔn mɔ́.

³⁹ Tá á ké ńgʉa ná pege, mbà pege tè ntí pʉ̀a pie pɔ́ piŋe nzèm, ńkúu pyé wɔ́. Pege ee pá’ɔɔn ńzába ntʉ́m nà Ssé, à cʉa pú’u, à gÿo ńgÿo pege tsẅɛ́.