2 Tesalonika 2 - Nouveau Testament en Ngienboum

Anò fùɔ menò tepòŋ

¹ Mefɛ́ mefɛ́, á gʉa ná nò gie á ne ńdíe lyɛ’ɛ́ lá’ gie Cʉ̀apʉ̀a wege Yěsô ge lá’ gíŋe tó, pege cú’te mvfò yé la, peg ne sẅíŋte gẅi ngie:

² Tà pi jú’ pá’ etsɔ́ pʉ̀a ne ńgɔɔn ngie lyɛ’ɛ́ lá’ Cʉ̀apʉ̀a tǒ, ḿvege vege. Tà pi pɔ́g. Tà mbɔɔ pá’ nyìŋ gẅie à neŋé ńtsẅi nkʉ̀ gẅie é fóo mbwo Ssé zɔ lɔɔn ńgɔɔn, tà fó ńgwɔ́ gie pi jǔ’ pɔ́ mbwo nyìŋ gẅie à ne shwóŋó nò Ssé, kà mé fó shwóŋó gẅi pɔ́ ngie mèŋ n zɔ ŋwe’é pú’u wɔ́, tà pi zẅíŋ.

³ Tà pi zẅíŋ nyìŋ fʉte gẅí, kà pɔ́ nê yɛ̌ ntí wɔ́. Yɛ̌ lyɛ’ɛ́ lá’ té lá’ tó té gwɔ́ gie etsɔ̌ ntí menò vɔ̌g ńcʉate wɔ́. Á lɔgɔ ńgwɔ́ pá’ pʉ̀a tá ńgyɔɔn ge lá’ lʉ’ʉ lé jú’ ncwò Ssé. Fùɔ menò tepòŋ kẅɛ ńtyé tá yɛ̌ lyɛ’ɛ́ lá’ lêen ńké ńtó. Á yé wá gẅie mé ge lá’ ma’a yé tsɛ̀ɛ mmɔ̌g la.

⁴ À ge lá’ kẅɛ tyé, é lêen ké zye létɔ’ pʉ̀a ngie tà pɔ́ gíŋe ńgu’te tsɔ́ mmó tà mbɔɔ Ssé, é ne gɔɔn ngie yé pú ńcʉa wɔ́b métsèm, é kú mbɔɔ tsɛ̀ɛ jʉ’e Ssé ńnéŋe, é gɔɔn ngie yé zɔɔ Ssé.

⁵ Tà pi tè ne ńkímte ngie afʉ̀’ gie n daa tsetsɛ̀ɛ pi, n da shwóŋó gẅi menó mɔɔn wɔ́?

⁶ Pi ne ńzsé mmó gie á táte fùɔ menò tepòŋ tá à těen ńkẅɛɛ ńtyé fʉ̀’ɔɔn wɔ́. Yɛ̌ fʉ̀’ ge gÿo ku’, tá à kẅɛ.

⁷ Menò mie fùɔ menò tepòŋ ge lá’ gÿo, é kěen ńzɔɔn ńzyéte, tá ńké ńnyé shúu shú, é cʉ́’ pɔ́ ndà’ pá’ mé ge pe’e nyìŋ gẅie à táte yé.

⁸ Yé fùɔ menò tepòŋ lêen ńké ńkẅɛ. Á yé gẅie Cʉ̀apʉ̀a Yěsô ge lá’ fÿɔ́gɔ zẅɛ̌ ncwò yé ná yé à kwé, ńtí gie Yěsô lɔ̌g ńtó, e gÿo à mag.

⁹ Fùɔ menò tepòŋ ge lá’ gwaa tó, Sátà néŋ metʉ̀ mé ná yé, à lɔg ńgÿo menò mmɔɔn mmɔɔn laa ndàa gyá menò mentí mentí, é lɔg fʉte pʉ̀a.

¹⁰ À ge lá’ lɔg menò mie é té nò wɔ́ mentí mentí, éfʉte pʉ̀a pie é ge lá’ pyé. Pɔ́ pyé pú’u, mélà’mie pɔ́ lʉ’ʉ lékwoŋo nò gie áa nénʉ́ gie á kě gÿo pɔ́ tsẅɛ́.

¹¹ Áa mmó gie á gÿo, e Ssé zẅíŋ atsɔ́ mmó tó ńgÿo pɔ́ cʉ́’ʉ ḿbúu pǔ, légwɔ́ gie nkwaŋá wɔ́b ge cʉ́’ tyé pɔ́ nà menò mie é té nò wɔ́.

¹² À cʉa pú’u, pʉ̀a pie pɔ́ kaa zẅíŋe nò gie áa nénʉ́ wɔ́, á nò gie á té nò wɔ́ zɔ cʉ́’ʉ ḿboŋo wɔ́b, pɔ́ lêen ńké ńgwe ntsaŋ.

E Ssé la tsɔ́’ɔ gẅi pá’ pi ge lá’ tsẅɛ́

¹³ Mefɛ́ mefɛ́, pie e Ssé kwoŋo wɔ́b, á gʉa ná peg, mbà peg gẅiin lésíe Ssé fʉ̀’ ntsèm ńtí gẅí, mélà’mie à la tsɔ́’ɔ gẅi tà fó nzyète légwɔ́ gie pi ge tsẅɛ́. Pi tsẅɛ́ɛ ńtí pá’ a Zẅìge Ndʉalʉ̌a ne ńgÿo pi gwɔ́ pʉ̀a Ssé, mbɔɔ pá’ pi záb ntʉ̀m nà nò gie áa nénʉ́.

¹⁴ Mɔɔn ée menò mie é la gÿo e Ssé lɔg Nkʉ̀ Mbòŋo gẅie peg la tsẅii mbwo pi, ńtóŋo gẅí, légwɔ́ gie pi ge kúu tsɛ̀ɛ legú’ Cʉ̀apʉ̀a wege Yěsô Kristo.

¹⁵ Pú’u la, mbà mefɛ́ mefɛ́, tà pi kʉ́a. Ammó gie peg ka zí’i gẅí, kà lê ncwò wɔ́, kà ńŋwe’e pɔ́ tsɛ̀ɛ ŋwà’ne wɔ́, pi kú’te mboŋó.

¹⁶ Tá wege Ssé la kwoŋo wégè, ńdɔgɔ lécÿó gʉm yégè, pege cʉ́’ pʉ̀a pé, ńkẅiŋte wégè ná ntí gie e těen ńdá’a ḿmaga wɔ́, ḿbiŋ ńgÿo pege ńnéŋe ne ńzẅí’te mmó mbòŋo gie à la ka’a mbwo pʉ̀a pé. Pú’u, peg ne ńdúɔ mbwo yé mbɔɔ mbwo Cʉ̀apʉ̀a wege Yěsô Kristo ngie:

¹⁷ Pɔ́ kẅiŋte gẅí, ńnáa gẅi tʉ̀ pi lɔg ńgÿo pɔ́ menò mbòŋo, ḿbiŋ ńgẅiin pɔ́ shwóŋè mbòŋo.