2 Korento 7 - Nouveau Testament en Ngienboum

¹ Mefɛ́ pɔ́ɔn pe ntʉ̀ nzẅìŋ, pá’ e Ssé la ka’ mɔɔn menò á mbwo pege la, á ne ńzɛ́te ngie kwà’ pege lê twó yégè kÿo menò mie é té Ssé poŋ, é mie mé gÿo gÿo, tà mbɔɔ mie mé kwaŋa kwaŋ, ńkẅi’i ńdɔgɔ légwɔ́ tè *lɔ̌’ ńgʉa lê mvfò tà ńcʉ́me, ńgwɔ gwɔ́ ne ḿbɔ́gɔ Ssé.

Lekág gẅie aa tsɛ̀ɛ ntʉ́m pɔl

² Á gíŋe ne ńzɛ́te ngie pi gÿo tà peg zsé ngie anò yég áa tsɛ̀ɛ ntʉ́m gẅí, peg laa fʉa nò mbwo tsɔ̌ nyìŋ wɔ́, peg laa gÿo nyìŋ fʉa mánzsé Ssé wɔ́, peg ké tè fʉʉ tsɔ́ nyìŋ, ńjÿó mmó yé wɔ́.

³ N ké tě ńgɔɔn pá’ɔɔn ńdɔgɔ ńgɔɔn ngie pi fʉ̌a tsɔ́ nò wɔ́. Mèŋ n ně ńzɔɔn ńdá’ shwóŋó gẅi ngie, anò gí áa tsɛ̀ɛ ntʉ́m wég. Peg jǔ’ pege pú ńgwɔ́ pɔ́ ná tà’a nùɔ, kà pege ne ńjú’u pɔ́ mboŋó wɔ́, kà pege gwɔ́ pɔ́ ncwò legwé wɔ́.

⁴ Mèŋ n déen ńtém nzèm yɔɔn ńná né pi, mèŋ n dɔg pɔ́ gẅi ńka’te tɛ’, mèŋ n nyě ńgẅiin pɔ́ shÿɔg tɛ’, lekág aa ntʉ́m mèŋ tɛ’ tà mbɔɔ pá’ peg ne ńgyá ngɔ́’ tɛ’.

⁵ Peg ka zɔɔn ńgʉa tà ńkúu Makedonia, atsɔ̌ lézẅɛte à tè wó wɔ́. Ngɔ́’ fó meshÿó meshÿó ńtó. Epʉ̀a gwɔ gwɔ́ nzème pǐ ne ḿma’a wég lê ncù, ntʉ́m wég gwɔ́ tsoló ḿbɔ́gɔ ńtí tsɔ́ menò.

⁶ Tá’, e Ssé tsí’i ntse nÿɔ́g még pá’ aa ńtsí’i ntse nÿɔ́g pʉ̀a pie pɔ́ ne ńdʉa. Á gwɔ́ pá’ à la gÿo Titus fɔ́ɔn ńtó ńgyá wég.

⁷ E Ssé tè lɔg pɔ́ ndà’ pá’ Titus tǒ wɔ́, á gíŋ ńdɔg mbɔɔ pá’ pi la tsí’i ntse nÿɔ́g Titus yé. Titus ka pité, éshwóŋó wég ntí gie pi ne ńtsɔ́ɔn légyá wɔ̀ɔn pú’u, ńgíŋ ḿbíte ntí gie pi ne ńdɔgɔ ḿmÿɔgɔ nò yɔ́ɔn pú’u, ńgíŋe shwóŋó wég pá’ pi tyé létág nzèm yɔ̀ɔn pú’u. Tà mèŋ n jú’, anò gíŋe ńkẅi’i ḿboŋo wɔ̀ɔn tɛ’.

⁸ Anò gẅiin lépoŋo wɔ̀ɔn tɛ’. Ŋwà’ne gie n ka vɔg ńtúmo mbwo pi, á ka gÿo pi mÿɔg, tá mèŋ n te ne ńgyá tsɔ́ *lɔ̌’ mǒ wɔ́. Á lɔɔn ńgwɔ́ gie n da gyá *lɔ̌’ mǒ, mbà á gwɔ́ pɔ́ pá’ n ka ne ńzsé ngie á ge gÿo pi zye ḿmÿɔg.

⁹ Tá’, mèŋ n kě ńgwɔ́ fʉ̀’ɔɔn ne ńkága kǎg. N ké tě ńkága, pɔ́ mélà’mie pi ka mÿɔ̌g wɔ́, n kága pɔ́ mélà’mie lemÿɔg gẅi ka gÿo pi kúbe mà. Pi ka mÿɔgɔ nà ntí gie e Ssé ne ńkwoŋo, tà à lɔɔn ńgwɔ́ pi é le gɔɔn ngie peg ka gÿo tsɔ́ nò tepòŋ ná pi wɔ́,

¹⁰ á nue lemÿɔgɔ ná ntí gie e Ssé ne ńkwoŋo, à gÿo nyìŋ kúbe mà. Wɛ̌ lékúbe mà gÿo nyìŋ tsẅɛ́, tà ńgwɔ́ nò á le pÿɔ́gɔ yé pá’ à mÿɔ̌g wɔ́. Tá lemÿɔg ná ntí ye pʉ̀a njÿó, à ná pɔ́ legwé.

¹¹ Pi líe pɔ́ mmó gie yɛ̌ ntí lemÿɔg, á nà ntí gie e Ssé ne ńkwoŋo, e ka gÿo ná pi tá ńgyá. Gyá gẅi lésẅɛte á fʉ̀’ gie nò áa ssé, gyá gẅi lélúɔ ngie mé lege mefʉa mí ńná né pi. Gyá gẅi lemÿɔgɔ nò yɔ́ɔn, gyá gẅi lépɔ́gɔ nò, gyá gẅi létsɔ́ɔn légyá wɔ̀ɔn, gyá gẅi lézeŋe nnɛ́, gyá gẅi lézáb ngɔ́’ twó nyìŋ gẅie à fʉ̌a nò. Pi ka lɔg meshÿó ntsèm ńda’te ngie pi ka tè gíŋe ńne ńzsé tsɔ́ nò ná yɔ̀ɔn nò wɔ́.

¹² Pá’ n ka ŋwe’e ŋwà’ne ńnáa mbwo pi la, n kɔ̌ɔn tě ńŋwe’e ńtí megàŋ mefʉa wɔ́, ńké tě ńŋwe’e ńtí nyìŋ gẅie mé gÿǒ nò tepòŋ ná yé wɔ́. N kɔ̌ɔn ńŋwe’e pɔ́ ngie pi tyé mvfò Ssé, ńgyá ntí gie pi lɔg sẅɛte ná nó yég.

¹³ Yɔɔn áa mmó gie á ka tsí’i ntse nÿɔ́g még. Ntse nÿɔ́g még zɔ̌ ka tè me ntsi’í ndà’ wɔ́, peg ka giŋé ńkẅi’i ńkág tɛ’ ná nò gie Titus ka ne ńkága yé, mbà pi metsèm gÿǒ ntʉ́m wé sẅéte.

¹⁴ Á gwaa gwɔ́, mbà mèŋ n ka tyé mvfò Titus ńná’a ńdɔgɔ nò gí ńka’te. À piŋ fó lá’ pi, eshʉ́ ké té wɔ̀ɔn kú. Ammó gie peg kɔ̌ɔn ńdɔgɔ nò gí ńka’te mvfò Titus mǒ, á ka piŋ ńkẅɛ ńgwɔ́ pɔ́ nò nénʉ́, ndʉŋ ndʉŋ pá’ peg ee ńzɔ́gɔ shwóŋó gẅi pɔ́ nò nénʉ́.

¹⁵ Tá’, á fó pú’u, n gíŋe ńkẅi’i ńkwoŋo gẅi pɔ́ ndyɛ̀’ɛ ndyɛ̀’ɛ, ńnéŋe ne ńkímte pá’ pi metsèm ka pǔ ńtyé lé jú’ ncwò, mbɔɔ pá’ pi ka kúe yé, ḿbɔ́gɔ yé pá’ mé pɔ́gɔ mântúm, ńná nnɛ́ ssé mvfò yé.

¹⁶ Mèŋ m bǔ ńne ńkága tɛ’ pá’ à lɔɔn ńgwɔ́, n gʉa ná kɔ̀ɔkɔ́ɔ, ńtém nzèm yɔ̀ɔn ńná né pi, té pɔ́g.