2 Korento 5 - Nouveau Testament en Ngienboum

¹ Peg zɔɔn ne ńzsé ngie ntàb wɔɔn gẅie pege ee tsoló, é gwɔ́ mbùm yege lɔɔn, é lɔɔn fó lyɛ̌’ ńkeme, mbà pege gẅiin ndá tÿǒ lepwó, é gwɔ́ gie e ge lá’a gwɔ́ pɔ́ wó. Epʉ̀a mesoŋ zɔ la tè pwóon, e Ssé zɔ la pwóon.

² Áa mmó gie á gÿo pege ee fʉ̀’ɔɔn ne ńdʉa, ńtsɔ́ɔn légwɔ́ tsɛ̀ɛ ndá yege yé tÿǒ lepwó, á légwɔ́ tsoló pá’ nyìŋ gẅie aa tsɛ̀ɛ nzsǒ sẅé gie à ma’ la.

³ Yɛ̌ mbùm nnɛ́ lɔɔn ńkábte wégè, pege le gíŋ ńgwɔ́ mvfò Ssé ńgwɔ́ pàtè ma’ nzsǒ wɔ,

⁴ á nue áa fʉ̀’ gie pege nyé tsɛ̀ɛ wɔɔn ntàb, menò ne sẅɛɛ wégè, pege lʉa. Áa nénʉ́ ngie pege tè ne ńkwoŋo ngie mé fó ná pege ńkẅile yɔɔn mbùm nnɛ́ wɔ́, pege fa’a léma’ nzsǒ ye tÿǒ lepwó mǒ, légwɔ́ gie mbùm gie e té kwé ge mi mbùm gie é gẅiin lekwé.

⁵ E Ssé zɔ ka cwoŋte wégè ná wɛ̌ légwɔ́, ńnáa Zẅìge yé mbwo pege ńdɔg ńgÿo zyě ssé ná shúm sie à ge gÿo tá ná né pege.

⁶ Pú’u, tá pege ee fʉ̀’ ntsèm ńcʉ́’ ńnéŋe pɔ́ nê lekág pá’ɔɔn tɛ’. Pege té ne ḿmoŋe ngie pege lɔɔn ńdá’ ńnyé ńgwɔ́ pɔ́ tsɛ̀ɛ yɔɔn mbùm nnɛ́, mbà pege nyě tè gwɔ̌ lejʉ́ŋ Cʉ̀apʉ̀a, mbà pege gwɔ̌ pɔ́ ngʉ̀a shʉ̀shʉ̀a wɔ́.

⁷ Á lɔgɔ ńgɔɔn ngie pege nyě tè lɔg nÿɔ́g mégè ńgyá yé. Tá’, pege neŋé ne ńzẅí’te pá’ɔɔn, mélà’mie pege záb ntʉ́m ná yé.

⁸ Pege cʉ̌’ ńnéŋe pɔ́ nê lekág pá’ɔɔn, atwó mmó lÿò gie pege ne ńtsɔ́ɔn á gwɔ́ lékẅɛɛ tsɛ̀ɛ yɔɔn mbùm nnɛ́, ńgʉa ńcʉ́’ʉ ńnéŋe pɔ́ lejʉ́ŋ Cʉ̀apʉ̀a.

⁹ Á cʉa pú’u, ammó gie peg ne ńtsɔ́ɔn légÿo tɛ’ aa legÿo mmó gie á poŋo yé. Kà pɔ́ pá’ peg ee tsɛ̀ɛ yɔɔn mbùm nnɛ́ wɔ́, kà pɔ́ pá’ peg kẅɛ̌ tsoló wɔ́,

¹⁰ á nue á ne ńzɛ́te ngie pege metsèm cʉa mvfò Kristo à ŋaga wégè, à cʉa pú’u, awɔ̌wɔ́ɔ kẅé wé ntsɔ’ɔ́ fà’ ná mmó gie à la gÿo, á gwɔ́ ye mbòŋo kà ye tepòŋ wɔ́, á fʉ̀’ gie à laa tsɛ̀ɛ yɛ̌ mbùm nnɛ́.

E Ssé la lɔgɔ Kristo ḿmag mbù wɔ́ba pʉ̀a mesoŋ

¹¹ Pá’ peg ne ńzsé mmó gie mé tóŋo lê lepɔgɔ́ Cʉ̀apʉ̀a la, peg neŋé fa’ pɔ́ shÿó, ńgÿo pʉ̀a cwoŋo ńzsé pʉ̀a pie peg ee pɛ̌. E Ssé ne ńcwoŋo ńzsé pʉ̀a pie peg ee pɛ̌, mèŋ m biŋ ne ńkwaŋa ngie pi ee tsɛ̀ɛ ntʉ́m gẅi ne ńcwoŋo ńzsé gí pʉ̀a pie peg ee pɛ̌.

¹² Peg tè pá’ɔɔn tá ńgíŋe fa’a léshwóŋó gẅi pʉ̀a pie peg ee pɛ̌ wɔ́, peg náa gẅi pɔ́ shÿó pá’ ńgwɔ́ pi kwaŋte wég, anò yég poŋo gẅi poŋ. À cʉa pú’u, pi zsé létsɔ́’ɔ nò mbwo pʉ̀a pie pɔ́ ne ńdɔgɔ shúm sie é gwɔ́ pɔ́ nzème pǐ ńŋá’te, tá mbà pɔ́ kɔ’ɔ́ lɔg pɔ́ sie é gwɔ́ pɔ́ tsɛ̀ɛ ntʉ́m é ŋá’te.

¹³ Mé lɔɔn ne ńgyá ngie peg ne ńgÿo pá’ mepʉ̀a la, mbà peg ee pɛ̌, pɔ́ pá’ nò Ssé ge giŋ, ńké ńgwɔ́ gie legyè ség ée wó, mbà pi zɔ ge zẅɛ́’.

¹⁴ Ayég gwɔ́ pɔ́ ngie pá’ Kristo kwoŋo wégè la, peg ne ńjú’u pɔ́ ncwò yé. Peg ne ńkwa’a ńzsé ngie tà’ nyìŋ wémɔ’ɔ́ la kwé nà twó mânyìŋ ntsèm. Á lɔgɔ pú’u, ńgwɔ́ ngie pâ pʉ̀a metsèm la pú ńkwé.

¹⁵ À la kwé nà twó mânyìŋ ntsèm, légwɔ́ gie pʉ̀a pie ée ntentʉ́ té gíŋe gwɔ́ wó pɔ́ pá’ pɔ́ ge gÿo mmó gie á poŋo wɔ́b gwɔ́. Pɔ́ ge cʉ́’ gwɔ́ wó, pɔ́ pá’ pɔ́ ge gÿo mmó gie á poŋo yé, á yé gẅie à la kwé nà twó sɔ́b tá Ssé zíme yé nà legwé.

¹⁶ Pá’ áa pú’u la, peg ee nà fʉ̀’ɔɔn ńcʉ́’ʉ ńzsé nyìŋ ná ntí gie pʉ̀a mesoŋ lɔg ńzsé nyìŋ wɔ́. Á lɔɔn ńgwɔ́ gie peg la zɔɔn ńzsé Kristo ná yɛ̌ ntí, mbà peg ee fʉ̀’ɔɔn peg tè gíŋe ne ńzsé yé pú’u wɔ́.

¹⁷ Nyìŋ gwɔ̌ tá ńda nnɛ́ ná Kristo, ńcʉ́’ ńgwɔ́ pɔ́ nyìŋ we sẅé, ńgwɔ́ tsɛ̀ɛ ntʉ́m yé à tè gíŋe ńgwɔ́ pá’ à ka zɔɔn ńgwɔ́ wɔ́, mbà à zyě léńnéŋe we sẅé.

¹⁸ Mɛ̌ menò ntsèm fóo mbwo Ssé gẅie à ka lɔgɔ Kristo ḿmag mbù gẅie é kaa tsetsɛ̀ɛ pege lâ yé Ssé, à ka piŋ ńcʉ́me fà’ mbwo peg, á gwɔ́ légʉa shwóŋ pʉ̀a ngie eshÿo lémag mbù gẅie é kaa tsetsɛ̀ɛ pɔ́b lâ Ssé é kẅɛ̌.

¹⁹ E Ssé zɔ la zɔɔn ńgwɔ́ ná Kristo, ńne ḿmaga mbù gẅie pâ pʉ̀a mesoŋ tsɛ̀ɛ njÿó gẅiin, pú’u, té gíŋe sáŋ menò tepòŋ mɔ́b, ńgÿo ńcʉ́me shwóŋè lɔg ḿmag mbù mbwo peg.

²⁰ Peg lɔgɔ pá’ɔɔn ńgwɔ́ memântúm Kristo tá ńgɔɔn nò. Áa pá’ɔɔn ńdɔgɔ ńgwɔ́ ngie e Ssé yé máŋwɛ́ zɔ tóŋo pʉ̀a. Peg lɔ̌g lezíŋ Kristo, ésẅíŋte ngie pʉ̀a zẅíŋ e Ssé gÿo pâ pɔ́ gíŋ ńgwɔ́ mbòŋ.

²¹ Pá’ ndòon laa twó pege la, e Ssé la kaa menò tepòŋ mégè, ńzába twó Kristo, mbà à la tè tsɔ́ nò tepòŋ gẅiin. À la gÿo pú’u, pá’ pege ge lɔgɔ léla nnɛ́ ná Kristo, é gwɔ́ pʉ̀a pie ée mbwo Ssé ńgwɔ́ ndʉŋ ndʉŋ.