2 Korento 4 - Nouveau Testament en Ngienboum

Afù’u Ssé gie áa tsɛ̀ɛ mengwʉ̌ŋe tsa’á

¹ Pú’u la, pá’ e Ssé la lɔg pɔ́ tsɔ́ɔn mezìŋe yé, ńnáa yɔɔn fà’ mbwo peg la, peg tè kʉ́a wɔ́.

² Peg tè nà mentí lɔg fa’a fà’ mie ée me ntsèm, ńgíŋ ńgwɔ́ me shʉ́ wɔ́, atsɔ̌ nkÿonkÿo tè ná kwò legiŋ yég wɔ́, peg piŋ ńké tè ne ńdɔgɔ tsɔ́ menò ḿvoŋo shwóŋè Ssé wɔ́, tà ńcʉ́’ pú’u, peg lɔg pá’ peg ee mvfò Ssé ńdá’te pɔ́ nò nénʉ́ á mbwo pʉ̀a mesoŋ, tà ńgwɔ́ gie à lɔɔn ńgwɔ́ nyìŋ léla’a wég ná tsɔ́ nò wɔ́.

³ Á lɔɔn ḿbiŋ ńgwɔ́ gie Nkʉ̀ Mbòŋo gẅie peg tsẅii, ée mbwo tsɔ́ pʉ̀a ńnyé pɔ́ tsɛ̀ɛ nkǔɔ, mbà nkǔɔ pwoon pú’u, pɔ́ mbwo pʉ̀a pie pɔ́ ne ńkÿo Ssé ńgee ḿbyé pyé,

⁴ ée pà jú’u nò Ssé té záb ntʉ́m mǒ, pie e ssé yé yɔɔn njÿó kéen ńjÿɔ́’ legyè sɔ́b ńdɔg ńtɔ́’ɔ wɔ́b légyá kyɛ̀’ gie á fóo ná nkʉ̀ mbòŋo, pú’u, pɔ́ té zsé pá’ shʉ́shÿɔ́g Kristo aa pú’u wɔ́. Yé Kristo aa pá’ e Ssé gwɔ̌.

⁵ Peg tè ne ńgwɔ tsẅii nkʉ̀ mbòŋo, éfa’a pɔ́ pá’ mé ge zsé wég wɔ́, peg fa’a pɔ́ pá’ mé ge zsé ngie Yěsô Kristo aa Cʉ̀apʉ̀a. Peg tyé ńgwɔ́ pɔ́ pafa’a fà’ pie éfa’a mbwo pi ńtí Yěsô,

⁶ á nue e Ssé gẅie à la gɔɔn ngie: «Á poŋ ngie akyɛ̀’ kyɛ’ nzěm», yé lê twó yé kéen ńtó ńkyɛ’ɛ tsɛ̀ɛ mentʉ́m még, légÿo peg zsé pá’ shʉ́shÿɔ́g we aa pú’u, á shʉ́shÿɔ́g gẅie mé ne ńgyá ná shÿó Kristo.

⁷ Tá peg pie yɔɔn fù’ áa ná peg, peg gwɔ̌ pɔ́ pá’ megwʉ̌ŋ tsa’á la. Á fó mǒ mé gyá mboŋó ngie mɛ̌ metʉ̀ mie efʉ̀’ yé tè wó wɔ́, éfóo pɔ́ mbwo Ssé, é té fóo mbwo peg wɔ́.

⁸ Ngɔ́’ ne fóo meshÿó meshÿó ńtóo ná peg tá ńké tè ne ńgwɔ’ɔ wég wɔ́. Á gʉa tsɔ́ fʉ̀’ peg tè gíŋe ńzsé pá’ peg ge gÿo wɔ́, tá ńké tè gɔɔn ngie anò á zsòté wɔ́.

⁹ Mé kʉ́e wég e Ssé ké tè wég gwá’. Á gʉa tsɔ́ fʉ̀’ ńgwá’a fʉ̀’ gie mé temé wég ssé la, tá peg ké tè kwé.

¹⁰ Peg gwɔ́ fʉ̀’ ntsèm ne ńzẅíŋe ngie peg ge kwé ntí legwé gie Yěsô la kwé yɛ̌, pú’u, légwɔ́ gie mé ge gyá ngie le gwɔ́ we Yěsô aa yé soŋ nnɛ́ peg.

¹¹ Peg pie peg nyé wó, peg ee fʉ̀’ ntsèm ńgwɔ́ pɔ́ ncwò legwé, ńtí nò Yěsô. Áa pú’u, légwɔ́ gie mé ge líe wég, é gyá ngie le gwɔ́ we Yěsô aa nà mbùm yeg tà mbɔɔ pá’ e ge gÿo kwé.

¹² Á fó pú’u, legwé gwaa gwɔ́ soŋ nnɛ́ peg ne fa’a yé fà’, le gwɔ́ wó ne fa’a yé fà’ soŋ nnɛ́ pi.

¹³ Ŋwà’ne Ssé gɔɔn ngie: N ka záb ntʉ́m nà Ssé, áa mmó gie á ka gÿo mèŋ n gɔɔn nò, peg ka lɔg pá’ peg záb ntʉ̀m nà Ssé, á nà yɛ̌ ntí, ńgẅiin yég pɔ́ légɔɔn nò Ssé,

¹⁴ ńne ńzsé ngie Ssé gẅie à la gÿo Cʉ̀apʉ̀a Yěsô zíme ná legwé, ge gÿo gíŋe gÿo pege zím yégè, á nue pege la nnɛ́ ná Yěsô, e Ssé gÿo pege métsèm kẅɛ, pega Yěsô pú ńcú’te.

¹⁵ Peg zẅíŋe mɔɔn menò ntsèm mie e Ssé ne ńgyá ngie é ku’ még, ńdɔgɔ ńtsɔ́ɔn pɔ́ ngie pi zẅɛ́’. Pú’u, ńzsé ngie nzẅìŋ pàzsé ngie e Ssé kwoŋo wɔ́b ge kẅi’i gyɔ́ɔn, nzẅìŋ pàná ndǎg mbwo yé, mbɔɔ pàgù’te yé, é kẅi’i ńgyɔ́ɔn.

Lezáb ntʉ́m ná Yěsô ńdɔg ńnéŋe

¹⁶ Áa mmo gie á gÿo peg tè kʉ́a, mbùm nnɛ́ yèg tsɛ ne ńkẅi’i ńkʉ́a kʉ̌a tá’, ntʉ́m wég gwɔ́ tsoló ne shumo shum lyɛ̌’ ntsèm.

¹⁷ Múɔ méngɔ́’ gẅie peg ée fʉ̀’ɔɔn ne ńgyá, à cʉa cʉa. Mé lɔɔn ńgʉa ḿbí fʉ̀’ á le ku’u tsɔ́ mmó nà legú’ tendège gẅie à tě ńdà’a ḿmaga wɔ́, á gẅie yɛ̌ ngɔ́’ lɔgɔ ńtsɔ́’ɔ mánzsè ńnáa né pege wɔ́.

¹⁸ Peg tè ne fa’a pɔ́ mmó gie mé lɔg menÿɔ́g ńgyá wɔ́, peg ne fa’a pɔ́ gie mé té ne ńgyá lê nÿɔ́g wɔ́. Á zɔɔn ńgwaa wɔ́, ammó gie mé lɔgɔ nÿɔ́g ńgyá á té ńnéŋe tɛ’ wɔ́, tá gie mé té lɔg nÿɔ́g ńgyá wɔ́, áa ńdá’a ńgwɔ́ pɔ́ wó.