2 Korento 10 - Nouveau Testament en Ngienboum

Pɔl ne ńda’te ngie fà’ yé té ye mwòonte mwòonte wɔ́

¹ Mèŋ Pɔl, mèŋ n ge lɔg pá’ Yěsô Kristo pʉ́le tɛ’ ńgíŋ ńgwɔ́ ngàŋa pòŋo ntʉ́m, éshwóŋó gẅi tà’a nò. Aa kwà’ mèŋ pɔl wá gẅie mé gɔɔn ngie mèŋ n ge fʉ̀’ gie mèŋ n gee tsetsɛ̀ɛ pi, ń nẅéen nẅéen, ńké ńgwɔ́ fʉ̀’ gie mèŋ n gee ngʉ̀a shʉ̀shʉ̀a, ńgɔɔn nò mbwo pi tsɛ̀ɛ ŋwà’ne té pɔ́g la.

² M bǔ’ mbwó mbwo pi ngie tà pi gÿo ná ntí gie mèŋ n ge gÿo tóo tsetsɛ̀ɛ pi, é gɔɔn nò pɔ́ lê cÿɔ́g. Mèŋ n ge ké gÿo cÿɔ́g pʉ̀a pie pɔ́ ne ńgyá yɔ́b pɔ́ ngie peg gÿo yég kɔ̀ɔkɔ́ɔ ńdɔgɔ fa’a pɔ́ pì pá’ wɔ̌wɔ́ɔ.

³ Peg tsɛ ńgwɔ́ pɔ́ pʉ̀a mesoŋ pá’ petsɔ́ tá’, e yeg ntí léma’ ncù e tè leen ńgwɔ́ pɔ́ ye pʉ̀a mesoŋ wɔ́.

⁴ Eshúm sie peg lɔgɔ ḿma’a ncù é té gwɔ́ pɔ́ se pʉ̀a mesoŋ wɔ́, metʉ̀ mie ée mǒ fóo mbwo Ssé, légwɔ́ gie peg ge lɔg tágte kɔ̀ɔkɔ́ɔ gie á tʉʉ twó. Peg ne ńjÿɔ́’ɔ menkwaŋá mie é gwɔ́ pɔ́ me cÿɔ̌ nò.

⁵ Peg ne ńnyɛɛ ngie meshwóŋè mie pʉ̀a lɔgɔ ńŋá’te, é ne ńtáte pʉ̀a lézsé nò Ssé, é té tsɔ́ nò wɔ́, ńkaga tʉ̀ ńkúbe mmó gie pʉ̀a gẅiin ntʉ́m pɔ́b, ńgÿo pɛ̌ pʉ̀a cʉ́’ʉ ńjú’u pɔ́ ncwò Kristo.

⁶ Pú’u la, pi kag tʉ̀, ńcʉ́’ʉ ńjú’u pɔ́ ndà’ ncwò Kristo ná kɔ̀ɔkɔ́ɔ, ńne ńzsé ngie nyìŋ lɔɔn ńké ńtʉʉ twó tʉ, ńgwɔ́ pɔ́ wɔ̌ wɔ́, mbà peg tyé lénéŋ ngɔ́’ twó yé.

⁷ Pi ne ńgyá kɔ̀ɔkɔ́ɔ pɔ́ nà nzème pǐ. Pá’ áa pú’u la, nyìŋ lɔɔn ńké ne ńgɔɔn ngie aa nyìŋ Kristo, à cwoŋo ńzsé ngie à lɔɔn ńgwɔ́ nyìŋ Kristo, mbà peg gǐŋ ńgwɔ́ yég pʉ̀a Kristo pá’ yé.

⁸ Cʉ̀apʉ̀a la zába wég, létyé mvfò ńgɔɔn nò né pi, lélɔg ńgÿo àcú’tè gí kẅi’i ńgʉa pɔ́ lê mvfò, á la tè lélɔg ńtág wɔ́. À lɔɔn fó ńgwɔ́ gie mèŋ n ne ńdɔgɔ wɛ̌ le gwɔ́ ńka’te tà á cʉa, mbà à lɔɔn ńgwɔ́ eshʉ́ le wɔ̀ɔn kú.

⁹ N te kwoŋo légwɔ́ mbwo pi, ńgwɔ́ pɔ́ pá’ fʉ̀’e mèŋ n kǔ’ pɔ́ létyé ngʉ̀a shʉ̀shʉ̀a ńŋwe’e ŋwà’ne ńdɔg ḿvege gẅi wɔ́.

¹⁰ Mèŋ n ne ńzsé ngie tsɔ́ pʉ̀a ne ńgɔɔn ngie pɔl túmo ŋwà’ne ńcÿɔ́gɔ tsoló tɛ’, ńgɔɔn nò á tʉ, ḿbiŋ ńtó tà ńtyé ssé ḿbÿɛ́, anò gie à gɔɔn té gíŋe ńcʉ́e wɔ́.

¹¹ Megàŋ gẅiin lézsé ngie, ammó gie peg gɔɔn tsɛ̀ɛ ŋwà’ne á fʉ̀’ gie peg ee ngʉ̀a shʉ̀shʉ̀a, peg ge gÿo tó tà tyé mvfò pi é ké gÿo pɔ́ yɛ̌.

¹² Á gʉa ná pʉ̀a pie pɔ́ sele ńda’te pʉ̀a pie pɔ́ ée pɛ̌, mbà peg tè gẅiin shÿɔg légɔɔn ngie peg ee pá’ pɔ́b wɔ́, ńgwɔ́ peg é le lʉŋte ntyě wég nà ntí pʉ̀a ápɛ̌ wɔ́. Atwó yɔ́b té tyé. Pɔ́ pí fʉ̀’ yɔb pɔ́ ná pɔ́b, ńdʉŋte mennɛ́ tsetsɛ̀ɛ pɔ́b.

¹³ Á gʉa ná peg, mbà ńgwɔ́ peg é le ka’te tà ńzyɛ́’ ndège wɔ́, ńcʉ́’ pú’u, peg gwɔ ka’te ńdɔg pɔ́ mejʉ’ mie e Ssé la cʉ́me mbwo peg pá’ peg ge gʉa wó. À la gÿo peg gʉa tà ńkúu mbɔɔ lá’ pi.

¹⁴ Peg tě ge zyɛ́’ ndège fà’ yég pɔ́ pá’ fʉ̀’ gie peg la zɔɔn tè gʉa tà ńkúu lá’ pi wɔ́ wɔ́. Peg pɔɔn zɔ la vɔg mvfò ńdɔg nkʉ̀ mbòŋo Kristo ńtóo lá’ pi.

¹⁵ Peg tě ge ka’te tà zyá’ wég ndège fà’, é lɔgɔ fà’ pʉ̀a mendyɛ̀’ɛ é ka’te wɔ́. Pá’ pi ee nà wég ndège fà’ la, peg ne ńzẅí’te ngie à gẅì lézáb ntʉ́m nà Ssé kẅi’i ńgʉa pɔ́ lê mvfò. Anò gie peg ka gɔɔn à cʉŋ menŋàŋ tsetsɛ̀ɛ pi pá’ á ne ńzɛ́te.

¹⁶ Peg lêen ńké fó pú’u, ńgʉa ńtsẅi nkʉ̀ mbòŋo ná metsɔ́ melá’ mie mé cʉa lá’ pi tá ńkúu wó, peg é le lɔgɔ fà’ gie petsɔ́ pʉ̀a ka fa’a nà yɔ́b gwǒŋo fà’ ńdɔg ńka’te wɔ́.

¹⁷ Mé ké kímte pá’ mé la ŋwe’e tsɛ̀ɛ ŋwà’ne Ssé ngie: «Nyìŋ lɔɔn ne ńkwoŋo léka’te, á lɔg pɔ́ mmó gie Cʉ̀apʉ̀a gÿǒ ńdɔg ńka’te.»

¹⁸ Á lɔgɔ ńgwɔ́ ngie nyìŋ gẅie mé zẅíŋe nò yé, à tè nyìŋ gẅie yé zɔ la’te mmó gie à gÿǒ wɔ́. À gwɔ́ pɔ́ nyìŋ gẅie Cʉ̀apʉ̀a zɔ la’te mmó gie ngàŋ gÿǒ.