1 Timote 5 - Nouveau Testament en Ngienboum

Ntí gie Timoté gẅiin lélɔg ńdíe pʉ̀a cú’tè

¹ Ɔ̀ lɔɔn ńne shwóŋó nzẅìŋe ndÿò nò, tè cÿɔ́gɔ yé cÿɔ́g. Gɔɔn nò mbwo yé pá’ ɔ̀ gɔɔn mbwo tá gù. Líe ngwàshùm pá’ mefɛ́ pú pe mbàŋa,

² ńdíe mezẅìŋe pànzwě pá’ memá pú, ńdíe ngwàngùɔ pá’ mefɛ́ pú pe pànzwě, tè gẅiin tsɔ́ nkwaŋá ndyɛ̀’ɛ ntʉ́m gù.

Ntí gie cú’tè gẅiin lélíe mepfɔ̌g pú’u

³ Lɔg mekù’ ńkẅéte mepfɔ̌g pie nyìŋ tè nzèm pɔ́b wɔ́.

⁴ Ampfɔ̌g manzwě lɔɔn ńgẅiin penkʉ́, kà penkʉ́ penkʉ́ pé wɔ́, mbà á ne ńzɛ́te ngie pɔ́ kẅéte yé tá ńdíe mánzsè. Pɔ́ gẅiin léfó ná yɔb mbʉ̀a, ńzí’i légÿo mmó gie á poŋ Ssé, ńdíe metá pɔ́b pá’ pɔ́ la zɔɔn ńdíe wɔ́b yɔ́b. Á nue yɛ̌ nò áa mboŋ mvfò Ssé.

⁵ Ampfɔ̌g gẅie nyìŋ tè nzèm yé wɔ́, á gwɔ́ pɔ́ gílé yé, à ńnéŋe yé ńdíe mánzsè ńzẅí’te pɔ́ Ssé, ńne sẅíŋte yé zsó pɔ́ tsẅɛ́’ té kʉ́a, ngie à kẅéte yé.

⁶ Tá ńgʉa nà mpfɔ̌g gẅie à gwáa ńjÿo mbàŋte, mbà mé líe yé tà ne ngie manzwě wɛ̂, tá á gwɔ́ mbwo Ssé ńgwɔ́ mpfó.

⁷ Yɔɔn lɔgɔ ńgwɔ́ mmó gie ɔ̀ gẅiin létsẅii mbwo pɔ́b, ńzsé ngie mé tè kíme wɔ́b té poŋ wɔ́.

⁸ Á gʉa nà gubé mepfɔ̌g, mbà nyìŋ wɔb lɔɔn ńgwá’ pʉ̀a tsìŋe ndá yɔ́b, mé gɔɔn pʉ̀a pie pâ pɔ̌ tsẅé, mbà à lɔgɔ pú’u, ńdʉ’ʉ nò Yěsô gie pege zẅíŋe. Angàŋ lɔgɔ pú’u, ḿbú ḿbÿɔ́gɔ ńcʉa nyìŋ gẅie à kaa záb ntʉ́m wé ná Yěsô wɔ́.

⁹ Ampfɔ̌g gẅie à lɔɔn ńgwɔ́ ɔ̀ ŋwe’e lezíŋ sé nà mezíŋ mepfɔ̌g pie acú’tè ge ne kẅéte wɔ́b, á ne ńzɛ́te ngie à gwɔ́ gẅie à tɔ̌g ngù’ móm ntɔgɔ́, ńgwɔ́ gẅie à la zsé pɔ́ ndà’ ndǔm we.

¹⁰ Á zɛ́te ngie à gwɔ́ gẅie pʉ̀a ne ńzẅíŋe ngie aa ńgÿo mefà’ mbòŋo, á gẅie aa ńkwɔ́’te penkʉ́ pé mboŋó, á gẅie aa ńkúe megʉ̀ mbʉ̀a yé, á gẅie aa ńnáa nnɛ́ ssé, ńkẅéte pʉ̀a Kristo, ńgwɔ́ gẅie aa ńkẅéte megàŋ ngɔ́’, á gẅie aa ńgÿo pɔ́ nò mbòŋo.

¹¹ Tè ké ńŋwe’e mezíŋ mepfɔ̌g pie é nyé ńgwɔ́ pɔ́ pe mekʉ́ tsɛ̀ɛ ŋwà’ne mepfɔ̌g. Ɔ̀ lɔɔn ńgÿo pú’u, mbà pɔ́ ge ńnéŋe tà lézɔ́’ lu ssé twó pɔ́b, pɔ́ gwá’a fà’ gie pɔ́ ké ne fa’a nzèm Kristo, ńgʉa ńzɔ́’,

¹² é gÿo pú’u, é lɔg fʉa nò, mélà’mie pɔ́ kubé nò gie pɔ́ la ka’, á gwɔ́ ngie pɔ́ ge ńnéŋe té zɔ́’, éfa’a mbwo Kristo.

¹³ Atsɔ́ mmó gie á gÿo mé té lwo ńŋwe’e mezíŋ mɔ́b wɔ́ áa pá’ mé lɔɔn ńŋwe’e pɔ́ cʉ́’ melǒŋ, ńgwá ńkʉ́’ʉ mendá mendá, á gwɔ́ mege pÿɔ́g pɔ́ gwá ńkaa mezíŋ pʉ̀a, ńgwá ńkyɛ́’ menò mie mé ée ntěen ńkyɛ́’ɛ wɔ́, ńgɔɔn nò ná menò mie é té ne ńdíe wɔ́b gwɔ́.

¹⁴ Áa mmó gie á gÿo tá mèŋ n gyá ngie á poŋ ngie mepfɔ̌g pie é nyé pe mekʉ́ pɔ́ zɔ́’, ńzyé gubé, ńtáŋte mendá mɔ́b, á cʉa pú’u, megàŋ mbù pégè é le gẅiin shÿó légɔɔn nò ná pege wɔ́.

¹⁵ N gɔɔn pá’ɔɔn nue tsɔ́ lelÿò mepfɔ̌g pe mekʉ́ kéen ńnyé nò Ssé, ńcʉ́me nzèm Sátà.

¹⁶ Manzwě lɔɔn ńgwɔ́ nyìŋ Kristo, mepfɔ̌g gwɔ́ nà tsìŋe ndá yɔ́b, mbà á ne ńzɛ́te ngie yé zɔ ne ńkẅéte wɔ́b tà á le náa yɛ̌ pì’ á mbwo cú’tè pʉ̀a Kristo wɔ́, ńzsé ngie cú’tè pʉ̀a Kristo ge kẅéte pɔ́ mepfɔ̌g pie nyìŋ tè nzèm pɔ́b wɔ́.

Ntí gie cú’tè gẅiin lélíe pàkẅé mvfò pú’u

¹⁷ Á gʉa nà pʉ̀a pie é kẅé mvfò ná cú’tè pʉ̀a Kristo, ńne fa’a mboŋó, mé gÿo mekù’ mɔ́b, ńná ntsɔ’ɔ́ fà’ gẅie é ńzɛ́te né pɔ́b, ńtʉʉ lelÿò ńgÿo me pʉ̀a pie pɔ́ shwóŋó nò Ssé ḿbiŋe ńzí’i pʉ̀a mmó.

¹⁸ Ashwóŋè Ssé zɔɔn ńgɔɔn ngie: Tà nyìŋ kwɛ́ ncwò fòŋ gẅie à gÿǒ, á ne ńnẅɛ’ɛ ngesáŋ ntsíŋ pá’ mé ge cʉ́’ fÿɔ́g fÿɔ́g. Á gíŋe ńgɔɔn ngie mé ná ntsɔ’ɔ́ fà’ mbwo nyìŋ gẅie à fa’á fà’.

¹⁹ Mé lɔɔn ńtó shwóŋó gú nò ná nyìŋ gẅie à kẅé mvfò cú’tè, ɔ̀ nyé té jú’u ncwò pʉ̀a mépʉ́a kà pʉ̀a métá wɔ́, tè lɔg ńtóŋo nò.

²⁰ Á gʉa nà pʉ̀a pie é kwǎ’ ńgÿo nò tepòŋ, ɔ̀ tyé pɔ́ tsɛ̀ɛ cú’tè ńkága wɔ́b, petsɔ́ pʉ̀a gyá pú’u, ḿbɔ́gɔ légÿo nò tepòŋ.

²¹ Mèŋ n dɔ̌g lezíŋ Ssé, ńdɔg lezíŋ Yěsô Kristo mbɔɔ lezíŋ *mecÿɔ́’ Ssé pie Ssé la tsɔ́’ ńgɔɔn mbwo gù ngie: Cwoŋo ńjú’u mmó gie mèŋ n gee ngɔ̌ɔn. Pɔ́ɔn lélíe shÿó nyìŋ, kà ńdɔg pɔ́ metùŋ wɔ́ ńgÿo mmó ná nyìŋ.

²² Tè sẅɛte ńzáb mbwo ná nyìŋ ńcʉ́me fà’a cú’tè pʉ̀a Kristo mbwo yé. Zɔɔn ḿvɔg ńtsa’a yé mboŋó, ḿbɔ́gɔ ngàŋ légÿo nò tepòŋ, á cʉ́’ʉ jú. Pɔ́ɔn kɔ̀ɔkɔ́ɔ gie ńgwɔ́ á cʉŋte gú.

²³ Tè gíŋe ńnú pɔ́ ndà’ ntse. Núu méjʉ’ʉ melù’, ńtí lepfòm shú sie ée ńgwá ńgege gú lɛ.

²⁴ Petsɔ́ pʉ̀a gÿo nò tepòŋ mé gyá pɔ́ lê nÿɔ́g. Petsɔ́ pʉ̀a fʉa mé lá’ ńŋaga wɔ́b tá ńzsé.

²⁵ Á gíŋe ńgwɔ́ pɔ́ ndʉŋ ndʉŋ ná mefà’ mbòŋo, ée ńzɔɔn ńkẅɛɛ pɔ́ menÿɔ́g, tà mbɔɔ mie mé té lwo ńgyá wɔ́, mé lá’ ńgyá gyá.