1 Tesalonika 5 - Nouveau Testament en Ngienboum

¹ Mefɛ́ mefɛ́, atsɔ́ nò gie peg ge gíŋe ŋwe’e mbwo pi lélɔg shwóŋó gẅi lyɛ̌’ kà pɔ́ fʉ̀’ gie mɔɔn menò ge lá’ cʉate wɔ́ á té wó wɔ́,

² á nue pi ne ńcwoŋo ńzsé gí ngie lyɛ’ɛ́ lá’ Cʉ̀apʉ̀a ge lá’ vege vege tó pá’ ntsǒŋ gẅie à tóo lêtsẅɛ́’ la.

³ Pʉ̀a mesoŋ ge lá’ gwɔ́ tà ne gɔɔn ngie: Mbʉ́lè ee tsɛ̀ɛ lá’, pɔ́ té gíŋ ne ńcÿɔ’ɔ wɔ́, tá máamáa ngɔ́’ lêen ńké ńtóo ná pɔ́b pá’ múɔ neŋé tà ńgwoon mánzwě shwòŋ la. Atsɔ̌ wɔb á le lÿɔ́’te tà ńtsẅɛ́ wɔ́.

⁴ Tá ńgʉa ná pi mefɛ́ mefɛ́, mbà pi tè nyé ńgwɔ́ pɔ́ tsɛ̀ɛ nzěm wɔ́, á nà ntí gie yɛ̌ lyɛ’ɛ́ lá’ gé tóo ná pi pɔ́ pá’ ntsǒŋ wɔ́.

⁵ Pi metsèm zɔɔn ńgwɔ́ pɔ́ pʉ̀a pie é giŋe ná jʉ’ gie áa ye kyɛ̀’, ńgwɔ́ pʉ̀a pie é giŋe pɔ́ zsǒ. Pege tè pʉ̀a pie é giŋe tsẅɛ́’ wɔ́, ńké tè pʉ̀a pie é giŋe lê nzěm wɔ́.

⁶ Pú’u la, tà pege lyé pá’ petsɔ́ pʉ̀a. Tà pege gwá’a lÿɔg ńdyé, pege jÿó mmó à ku’ ku’.

⁷ Pàlyé lelɔ́g lyé lêtsẅɛ́’, pànú melù’ tà ḿbʉ́a nú pɔ́ lêtsẅɛ́’.

⁸ Tá ńgʉa ná pege pie pege giŋe fʉ̀’ʉ zsó, mbà á ne ńzɛ́te ngie pege jÿó mmó à ku’ ku’, nkwòŋe mbɔɔ lézáb ntʉ́m nà Ssé e gwɔ́ yege nzsǒ ncù gie mé lɔgɔ tʉ̌ ńnyɛte. Lezẅi’té lyɛ̌’ gie e Ssé ge gÿo pege tsẅɛ́, à gwɔ́ yégè cÿɔ́’ɔ ncù gie mé lɔgɔ tʉ̌ ńnyɛte.

⁹ E Ssé la zɔɔn tè tsɔ́’ɔ wégè pɔ́ légyáŋa lóŋ ná pege, pege gyá ngɔ́’ wɔ́, à la tsɔ́’ɔ wégè pɔ́ légÿo pege cʉa nzèm Cʉ̀apʉ̀a wege Yěsô Kristo ńgẅiin letsẅɛ́.

¹⁰ À la kwé nà twó ségè, légwɔ́ gie pege lɔɔn fó ńkwé mbɔɔ kwě, kà ńnyé pɔ́ ntentʉ́ wɔ́, mbà pega pɔ́ zɔɔ pú’u, ńgwɔ́.

¹¹ Pú’u la, pi kẅiŋte mennɛ́ mí pi né pi, nyìŋ tóonte nyìŋ, nyìŋ tóonte nyìŋ, pá’ pi ne ńgÿo pú’u lɛ.

Akẅìŋte lɔg ńkwɛ́ metwó nò mbɔɔ tsyɛ̀’te

¹² Mefɛ́ mefɛ́, peg sẅiŋté gẅi ngie pi ná mekù’ mbwo pʉ̀a pie pɔ́ fa’a fà’a Ssé tsetsɛ̀ɛ pi, á mbwo pʉ̀a pie Cʉ̀apʉ̀a la tÿɔ́gɔ wɔ́b á mvfò pi ngie pɔ́ tÿɔ́gte gẅí.

¹³ Pi gÿo mekù’ mɔ́b mboŋó, ńkwoŋo wɔ́b tɛ’, ńtí twó fà’ gie pɔ́ ée mǒ, ḿbɔ́ɔn cÿɔ́g tsetsɛ̀ɛ pi.

¹⁴ Mefɛ́ mefɛ́, peg ne sẅíŋte gẅi ngie pi tÿɔ́gte melóŋ, ńkẅiŋte pʉ̀a pie ntʉ́m wɔ́b nyé ḿvɛɛ vɛ, ńtóonte pʉ̀a pie pɔ́ nyé pɔ́ tè tʉte, ńgẅiin pɔ́ kwɔ́gɔ nnɛ́ nzèm wɔ̌wɔ́ɔ.

¹⁵ Pi pɔ́ɔn lélɔgɔ nò tepòŋ ńtsɔ́’ɔ nò tepòŋ. Pi gÿo pɔ́ nò mbòŋo tsetsɛ̀ɛ pi té tyɛ̀’te.

¹⁶ Pi ne ńkága kǎg fʉ̀’ ntsèm.

¹⁷ Pi ne ńtsyɛ’te Ssé fʉ̀’ ntsèm,

¹⁸ ńne ńnáa ndǎg mbwo ye nà kɔ̀ɔkɔ́ɔ. Áa mmó gie e Ssé kwoŋ ngie pi pie pia Yěsô Kristo léen ńcʉ́’ʉ tà’ nyìŋ la, pi ne ńgÿo.

¹⁹ Tà pi tɔ’ɔ Zẅìge Ssé léfa’a fà’.

²⁰ Tà pi gwága shwóŋè pʉ̀a pie pɔ́ ńnéŋe ńtsẅi nkʉ̀ gẅie é fóo mbwo Ssé,

²¹ ńgʉa nà kɔ́ wɔ́, ńtsa’ ḿbí pɔ́ ye mbòŋo,

²² ḿbú ńkÿo nò tepòŋ ntsèm.

²³ Peg ne ńdúɔ ngie e Ssé lê twó yé, gẅie aa ngàŋ mbʉ́lè, à gÿo pi gwɔ́ pʉ̀a pé tà ńcʉ́me, ńgie à pyɛ́bɛ zẅìge gí, ḿbyɛ́b ntʉ́m gẅí, ḿbyɛ́b mbùm gi, à gÿo ńgwɔ́ lyɛ̌’ gie Cʉ̀apʉ̀a wege Yěsô Kristo gé gÿo tó, pi gwɔ́ té sɔɔn *lɔ̌’ ná pi.

²⁴ E Ssé gẅie à la tsɔ́’ɔ gẅi pi cʉ́’ pʉ̀a pé ge gÿo à gwɔ́ pú’u, á nue à tè kúbe.

²⁵ Mefɛ́ mefɛ́, pi sẅíŋte Ssé mbɔɔ ná ség twó.

²⁶ Pi tsyɛ’te mefɛ́ mefɛ́ métsèm, ńcʉ́’ʉ létsyɛ’te ńtáŋte mennɛ́ mí nà ntí ye pʉ̀a Ssé.

²⁷ Á nà lezíŋ Cʉ̀apʉ̀a, n gɔɔn né pi ngie pi tóŋo yɔɔn ŋwà’ne á mvfò pʉ̀a Ssé métsèm.

²⁸ Cʉ̀apʉ̀a wege Yěsô Kristo ne ńgwɔ́ né pi.