1 Tesalonika 4 - Nouveau Testament en Ngienboum

Leńnéŋe gẅie e Ssé kwoŋ

¹ Mefɛ́ mefɛ́, anò gie peg ge lɔg cʉ́me á gwɔ́ pɔ́ ngie peg ka shwóŋó gẅi ntí gie à lɔɔn ńgwɔ́ pi lɔg ńnéŋe pú’u, anò gí poŋ Ssé. Á ge gǎ wɔ́ pi ne ńnéŋe pɔ́ pú’u. Tá’ peg giŋé ne sẅíŋte gẅí, tà ḿbú’u pɔ́ mbwo nà lezíŋ Cʉ̀apʉ̀a Yěsô ngie, pi gÿo pɔ́ pú’u, ńdɔg ńgee mvfò.

² Pi zɔɔn ne ńzsé mmó gie peg la lɔg lezíŋ Cʉ̀apʉ̀a Yěsô ńtsẅi ngie pi gÿo.

³ Ammó gie e Ssé ne ńkwoŋo á gwɔ́ pɔ́ ngie pi gwɔ́ ndʉalʉ̌a, tà mbàŋa fa’ pànzwě, tà pànzwě fa’ mbàŋa,

⁴ ńgie wɔ̌wɔ́ɔ tsetsɛ̀ɛ pi kú’te mbùm ye ná ntí gie e Ssé ne ńkwoŋo, ee ntí gie e gẅiin mekù’.

⁵ Tà á le zẅíŋ nkwaŋá tepòŋ jÿó yé pá’ é jÿó pʉ̀a pie é té Ssé zsé wɔ́.

⁶ Tá á gʉa nà nò manzwě, tà nyìŋ gÿo nò tepòŋ ná fɛ́ we, tà á zɔɔn fó fʉte yé fʉte, mélà’mie Cʉ̀apʉ̀a wege ge lá’ néŋ ngɔ́’ twó pʉ̀a pie pɔ́ gÿo pú’u. Peg la lá’ shwóŋó gẅi tà shwóŋ.

⁷ E Ssé la zɔɔn tè tóŋo wégè ngie pege gÿo menò mie é gẅiin ncÿǒ wɔ́, à la tóŋo wégè ngie pege gẅiin pɔ́ mà gẅie aa we pʉ̀a pé.

⁸ Pú’u la, nyìŋ gẅie à ju’ú yɔɔn nò ńdʉ’, à tě ńdʉ’ʉ pɔ́ nyìŋ mesoŋ wɔ́, à lʉ’ʉ pɔ́ Ssé gẅie à la náa zẅìge ndʉalʉ̌a yé mbwo pi.

⁹ Atsɔ́ mmó gie ngwɔ́ n ŋwe’e ńná né pi ńtí nkwòŋe tsetsɛ̀ɛ mefɛ́ mefɛ́ á té wó wɔ́, n gɔɔn nue pi ka zi’í pɔ́ kwà’ mbwo Ssé lékwoŋ mennɛ́ mí.

¹⁰ Pi piŋ ne ḿbú ńkwoŋo mefɛ́ mefɛ́ pie ée Makedonia ntsèm. Pú’u la, peg ne ńgɔɔn né pi ngie pi gíŋe ńkẅi’i ńdɔg ńgʉa né mvfò.

¹¹ Pi kag tʉ̀, ńnéŋe té cÿɔ́g tsetsɛ̀ɛ pi, nyìŋ gẅi gɔɔn nò pɔ́ nà nò gie á ne ńdíe yé. Pi lɔg ntóŋ mbwó mí éfa’ tá ńjÿó pá’ peg la gɔɔn ngie pi gÿo la,

¹² ńzsé ngie pʉ̀a pie é té pʉ̀a Kristo wɔ́, ge gyá pú’u, é gɔ’te gi ntí leńnéŋe. Pi piŋ ńké le cʉ́’ʉ pì’ mbwo tsɔ́ nyìŋ wɔ́.

Letó we Cʉ̀apʉ̀a

¹³ Mefɛ́ mefɛ́, peg ne ńkwoŋo ngie pi zsé nò nénʉ́ gie á líe mepfó, légwɔ́ gie pi tè ńnéŋe nê lemÿɔg pá’ petsɔ́ pʉ̀a mesoŋ pie pɔ́ té ne ńzẅí’te tsɔ́ mmó mbwo Ssé wɔ́ wɔ́.

¹⁴ Pege ne ńzẅíŋe ngie Yěsô la kwé ḿbiŋ ńzíme nà legwé. Áa pú’u, ńdɔgɔ ńgwɔ́ ndʉŋ ndʉŋ pá’ e Ssé ge lá’ lɔgɔ Yěsô gÿo pʉ̀a pie pɔ́ la gwaa kwé ńne ńzába ntʉ́m ná ye, é zím.

¹⁵ Pi zɔɔn ńjú’u yɔɔn nò gie peg gee ngɔ̌ɔn, á gwɔ́ tsɔ́ tà’a nò gẅie Cʉ̀apʉ̀a la shwóŋó wégè ngie: Epʉ̀a pégè pie Cʉ̀apʉ̀a ge lá’ gwaa tó, pɔ́ nyé pɔ́ ntentʉ́ té ge lá’ luŋ mvfò tá pʉ̀a pie é la kwé e pɔ́ɔnte wɔ́.

¹⁶ Á ge lá’a lyɛ̌’ áyɛ̌, mé jú’u mmó gie á pÿé, á gwɔ́ pá’ *cÿɔ́’ Ssé we lÿò ge ná ngyè ye tÿǒ gɔɔn nò, ńgwɔ́ pá’ mé ge jú’ ngyè ntàŋ Ssé, kwà’ Cʉ̀apʉ̀a Kristo à fó tÿǒ lepwó ésẅɛ́’, pʉ̀a pie é la gwɔ kwé ńne ńzába ntʉ́m ná ye vɔg ńzíme nà legwé.

¹⁷ Epʉ̀a pégè pie pɔ́ ge lá’ nyé ntentʉ́, e Ssé pɔ́ɔnte ńkaa wɔ́ba pɔ̌ á nà melɔ́ɔn, pâ pɔ̌ métsèm gʉa ńkẅɛ́te Cʉ̀apʉ̀a wege á tÿǒ. Pâ pɔ̌ lâ Cʉ̀apʉ̀a lá’a ńcʉ́’ʉ ńgwɔ́ pɔ́ lejʉ́ŋ ye.

¹⁸ Pú’u lá pi ńnéŋe ńdɔgɔ shwóŋè yɔɔn, ésele ńtÿɔ́gte mennɛ́ mí.