1 Korento 16 - Nouveau Testament en Ngienboum

Ncùb gie mé ma’a ńtí mefɛ́ mefɛ́ pie ée Yerósalem

¹ Á gʉa nà nò ncùb gie mé ne ńcú’te lénáa mbwo pʉ̀a Kristo pie ée Yerósalem, pi gí pi gÿo pá’ n ka tsẅii mbwo mecú’tè mie ée Galatia.

² Á poŋ ngie à ńnéŋe ńgwɔ́ wɛ̌ sóondi, wɛ̌ nyìŋ gẅi wɔ́ à gee ná mmó gie à gẅǐin, ńdʉŋte ḿbí tsɔ́ nzẅìŋ nkáb mǒ, ńde’e ndá ye, ńzsé ngie mé té ge zẅí’te tà mèŋ n tó tá mé ma’ ncùb wɔ́.

³ Mèŋ n ge gÿo tó, é gwɔ́ ntúm pʉ̀a pie pi tsɔ̌’, ńná meŋwà’ne mbwó pɔ́b, pɔ́ lɔg ńgʉa Yerósalem ńná nkáb gie pi cu’té.

⁴ Á lɔɔn ńtó ne ńzɛ́te ngie n gʉa yɔ́ɔn wó, mbà pega pɔ́ ge gwɔ́ kwò.

Menò mie Pɔl ne ńkwaŋte légÿo

⁵ Mèŋ n ge gÿo gwɔ́ tóo lá’ pi, é zɔɔn pfó tsɛ̀ɛ paga ngwòŋ Makedonia, á nue mèŋ n gẅiin légʉa wó.

⁶ Ndyɛ̌’ mèŋ n ge gÿo ná’a láte lá’ pi, ndyɛ̌’ é ńnéŋe tà fʉ̀’e mbʉ̀ŋ lá’ ḿmag, à gwɔ́ pú’u, n gwɔ́ tà ńkwaŋte jʉ’ gie n gee né wó pi kẅéte wɔ̀ɔn.

⁷ N te ne ńkwoŋo légwaa gyá gẅi fʉ̀’ɔɔn, ńně ńcʉa cʉa wɔ́. Cʉ̀apʉ̀a lɔɔn ńzẅíŋ, mbà pege ge ná’a ńnéŋe.

⁸ Tá’ mèŋ n ne ńkwaŋa léneŋe Efeso wɔɔn tà línɔ́ɔn Paŋtekɔ̂d lá’ ńtɔ́g,

⁹ á nue tsɔ̌ mánzsè kéen ńtsɔ́’ɔ mbwo mèŋ jʉ’ɔɔn léfa’a fà’ gie á ge kẅéte tɛ’. Tà mbɔɔ pá’ pàlʉ’ʉ nò gie mèŋ n gɔɔn gyɔ́ɔn tɛ’.

¹⁰ Timoté lɔɔn ńtóo lá’ pi, pi kúe yé mboŋó. Légwɔ́ gie à ge ńnéŋe tsetsɛ̀ɛ pi, éjú’ mbùm ye poŋ, á nue à fa’a yé pɔ́ fà’a Cʉ̀apʉ̀a pá’ mèŋ.

¹¹ Pú’u lá, tà nyìŋ gwága yé. Pi náa yé shÿó pá’ à ge gwaa piŋ kẅɛ́te wɔ̀ɔn, é giŋe kága kǎg. Mèŋ n ne ńzẅí’te yé pá’ pâ mefɛ́ mefɛ́ ge tó.

¹² Á gʉa ná fɛ́ wege Apolos, mbà mèŋ n zyě ńkẅiŋte yé pá’ pâ tsɔ́ mefɛ́ mefɛ́ ge gʉa lá’ pi. Tá’ à tè ne ńkwoŋo légʉa fʉ̀’ɔɔn wɔ́, à ge gÿo gẅiin fʉ̀’ tá gʉa.

Atsyɛ’te pɔ́ lɔg ńkwɛ́ metwó

¹³ Tà pi gwá’a lÿɔ̀g ńdyé, pi záb ntʉ́m nà Ssé té kʉ́a, pi gwɔ́ mbàŋa, pi tʉ tʉ.

¹⁴ Pi lɔɔn ne ńgÿo pɔ́ kɔ́ wɔ́, pi lɔg pɔ́ nkwòŋe.

¹⁵ Mefɛ́ pɔ́ɔn, pi ne ńzsé ngie Stefanas pɔ́ tsìŋe ndá yé, pɔ́ ée melùŋ mvfò pàzáb ntʉ́m ná Kristo tsɛ̀ɛ lá’a gí Akay, pɔ́ ne ńnéŋe twó ńgÿo mmó gie cú’tè pʉ̀a Kristo ge zẅɛ́’. Áa pú’u, tá mèŋ n gíŋe ne ńzɛ́te mbwo pi ngie:

¹⁶ Pi jú’ ncwò pʉ̀a pá’ pɔ́b, mbɔɔ we pʉ̀a pie pâ pɔ́ pú ńtéŋe zì’i.

¹⁷ Anò ne ḿboŋo wɔ̀ɔn tɛ’ ńtí pá’ Stefanas, pɔ́ Fortunatus pɔ́ Akaikẅis tǒ tà ńgwɔ́ lejʉ́ŋ mèŋ. Pɔ́ ée jʉ’ɔɔn, ńkúbe twó gí lejʉ́ŋ mèŋ.

¹⁸ Pɔ́ ka néŋ ntʉ́m wɔ̀ɔn pá’ pɔ́ ka néŋ gẅi gí. Pi ná mekù’ á mbwó ntí pʉ̀a pá’ pɔ́b lɔɔn.

¹⁹ Mecú’tè pʉ̀a Kristo mie ée nà shÿó Azia é tsyɛ’té gẅí. Akilas pɔ́ Piriska mbɔɔ cú’tè pʉ̀a Kristo gie á jÿó ndá pɔ́b pɔ́ lɔ̌g lezíŋ Cʉ̀apʉ̀a ńtsyɛ’te gẅi tɛ’.

²⁰ Mefɛ́ mefɛ́ métsèm pie ée jʉ’ɔɔn é tsyɛ’té gẅí. Pi tsyɛ’te mennɛ́ mí, ńcʉ́’ʉ létsyɛ’te, ńtáŋte mennɛ́ mí nà ntí ye pʉ̀a Ssé.

²¹ Kwà’ mèŋ Pɔl, n dɔgɔ́ pwó yɔ́ɔn, ńŋwe’e yɔɔn tsyɛ’te.

²² Nyìŋ lɔɔn tè kwoŋo Cʉ̀apʉ̀a Yěsô wɔ́, e Ssé néŋ ndòon twó ngàŋ. Marana tha. Cʉ̀apʉ̀a weg, tóo!

²³ Cʉ̀apʉ̀a wege Yěsô Kristo néŋ mbʉ́lè ná pi métsèm.

²⁴ Mèŋ n dɔg pá’ pege puté ńgwɔ́ nzèm Kristo ńkwoŋo gẅi métsèm.