Titus 3 - North Frisian New Testament (Clemens)

Dit 3. Kapitel.

¹ Formåne jam, dat ja di Försten en Obrigheid önderdån en gehorsam sen, tö alle gud Werken wellig.

² Nemmen last, ek kiwe, sennig wīs, al Sagtmudigheid bewise tögen alle Mensken.

³ For wü wiär uk tövoaren ünforständig, ünfölligsom, forwildjigt, di Lesten en Wellest heniwen, en wandelt ön Bosheid en Nidskheid, en håtet arküder.

⁴ Mar da kam di Gudheid en di Lewde van Gott üs Seligmåker ön Sjün.

⁵ Ek aur di Werken üt di Geregtigheid, welk wü dön hå, mar eter sin Barmhartigheid måket hi üs selig dör dit Bad tö di Wedergeburt en Nimåking dör di hellig Geist.

⁶ Welk hi rikkelk ütgöten hed üp üs dör Jesus Kristus, üs Seligmåker.

⁷ Omdat wü dör disallew Gnad rogtfârdig sen, en Arwing tö dit ewig Lewent eter di Höp.

⁸ Dit es wes wår: Ik wel dat dü Sok standhaft lirst, omdat danen welk ön Gott glowig uden sen, me Iärnst en Iwer strewe gud Werken tö forrogten. Sok es gud en net foar di Mensken.

⁹ Mar hoald di fri van dössig Frågen, di Ofstammings-Berekening, di Krakel en Strid aur di Wet; for dit al es nönt wert.

¹⁰ En kettersk Mensk formide, wan hi jenlop, en weder en üderlop formånet uden es.

¹¹ En wet, dat sajen forkirt es en sik forsendigt, en mut sik sallew forordile.

¹² Wan ik Artemas of Tychicus tö di stjür, da kom hastig tö Nikopolis tö mi, for ik ha mi voarnommen, di Wunter aur diär tö bliwen.

¹³ Befördere Zenas, di Skreftgeliärter, en Apollon sörrigfoaldig, omdat ja nönt wånt.

¹⁴ Let uk üs Lid lir, dat ja iwrig sen, om gud Werken tö forrogten, al hur di üdern dit nödig ha, omdat ja ek ünfrugtbar sen.

¹⁵ Al dânen, diär bi mi sen, let di grot. Gröt al danen, welk üs lew hå ön di Glōw. Di Gnād wis me ju al! Amen.