Römer 5 - North Frisian New Testament (Clemens)

Dit 5. Kapitel.

¹ Nü sen wü da rogtfardig uden dör di Glow, en nü ha wü Frēd me Gott dör üs Herr Jesus Kristus.

² Dör höm ha wü nü uk fri Hengang ön di Glow tö dös Gnade, hurön wü stun, en röme üs ön di Höpning üp di tökommen Herligheid, welk Gott üs iw wel.

³ Mar ek alining dit, mar wü röme üs uk ön di Bedrüwwetheid, aurdat wü wēt, dat Bedrüwwetheid Geduld wirket.

⁴ En Geduld wirket Erfåring, Erfåring bringt Höp.

⁵ Mar Höpning let ek tö Skand ud, för Gottes Lewde es inoast ön üs Hart dör di hellig Geist, diär üs iwen es.

⁶ For uk Kristus, üs wü jit swak wiär, es tö sin Tid foar de Gottloasen stürwen.

⁷ Me nauer Noad sterrewt er nü hokken om dit Rogts wel; mögelk est, dat er hokken om wat Guds wel sterrewt.

⁸ Diärom bewiset Gott sin Lēwde tögen üs, dat Kristus foar üs stürwen es, üs wü jit Senders wiär.

⁹ Om sa vul moar skel wü dör höm bewåret ud voar Gottes Wredheid, aurdat wü dör sin Blöd rogtfardig uden sen.

¹⁰ For wan wü me Gott forsönet sen dör sin Seens Doad, üs wü jit Finder wiär; vulmoar skel wü selig ud dör sin Lewent, wan wü nü me höm forsönet sen.

¹¹ Ek alining dit, mar wü röme üs uk ön Gott, dör üs Herr Jesus Kristus, dör welk wü nü di Forsöning fingen hå.

¹² Diärom, alliküs dör jen Mensk di Send ön di Warld kjemmen es, en di Doad dör di Send, sa es uk di Doad tö alle inträngt, aurdat ja sik al forsendigt hå.

¹³ For di Send wiär wel ön di Warld, bet tö di Wet; mar hur nin Wet es, diär rekent em di Send ek.

¹⁴ Mar di Doad hersket van Adam tö Moses tö, uk aur danen diär jam ek forsendigt ha, me liksa en Aurskredding us Adam, diär en Voarbild van di, diär kom skel.

¹⁵ Mar hat forhalt sik ek me di Gåw, üs me de Send. For wān-er Vulen aur di Send van jen Mensk stürwen sen, da es Gottes Gnad jit vul moar rikkelk en Gnadejewt foar Vulen wessen, dör di Gnad van di jen Mensk Jesus Kristus.

¹⁶ En hat es ek me di Gåw üs me di Send, alliküs dat aur di jen Mensk sin Send di Fordamnis aur alle kam. For dit Ordil es üt jen Send tö di Fordamnis kjemmen, mar di Gåw helpt üt vul Mesdaden tö di Rogtfârdigheid.

¹⁷ For wan dör di jen Send di Doad hersket dör di Jen, sa hersket jit vulmoar di Rogtfârdigheid van Jen, nämelk Jesus Kristus bi danen, diär Gottes Gnad en Gåw aurflödig fo, tö di Rogtfârdigheid ön-t Lewent.

¹⁸ Alliiküs dör di Send van Jen di Fordamnis aur alle Mensken kjemmen es, alliksa es dör di Rogtfârdigheid dit Lewent aur alle Mensken kjemmen.

¹⁹ For alliküs dör jen Mensk, dat hi di Wet aurskrēd, vul Senders uden sen, sa ud er uk dör jen Mensk, diär di Wet befölligt, Vulen rogtfârdig.

²⁰ Mar di Wet es diärbi inkjemmen, omdat di Send magtig ud; en hur di Send magtig uden es, diär es Gottes Gnad jit vul magtiger.

²¹ Omdat, alliküs di Send hersket hēd tö di Doad, alliksa hersket di Gnåd dör di Rogtfârdigheid tö dit ewig Lewent, dör üs Herr Jesus Kristus.