Römer 16 - North Frisian New Testament (Clemens)

Dit 16. Kapitel.

¹ Ik befele ju üs Sester Föbe, di ön Tinst es bi dit Geminte ön Kenchrea.

² Omdat I hör âpnem ön di Herr sin nōm, üs-t skekkelk es foar di Helligen, en lestige hör Bistand ön alle Forrogtninger, hurtö jü ju nödig hed. For jü hēd uk Vulen Bistand leistet, uk mi sallew.

³ Gröt di Priscilla en Aquila, min Helpers ön Kristus Jesus.

⁴ Ja ha foar min Lewent jar Hals önböden; en ek alining jam, mar uk alle Geminten bi di Heiden.

⁵ Uk gröt dit Geminte ön hör Hüs. Gröt Epenetus, min Frindj, welk din Jest mung di Kristen ön Achaja wiär.

⁶ Gröt Maria, jü hed vul Meit en Arbed me üs hed.

⁷ Gröt Andronicus en Junias, min Frindjer, en min Megefangenen, welk üs Apostler berömt sen, en voar mi wessen hå ön Kristus.

⁸ Gröt Amplias, min lew Frindj ön di Herr.

⁹ Gröt Urbanus, üs Helper ön Kristus, en min lew Stachis.

¹⁰ Gröt Apelles, diär prowet es ön Kristus, gröt danen üt Aristobulus Hüs.

¹¹ Gröt min Frindj Herodion. Gröt jam üt Narcissus Hüs, diär ön di Herr sen.

¹² Gröt Tryfena en Tryfosa, di Wüffen, diär ön di Herr årbed ha. Gröt di lew Sester Persida, diär ön di Herr vul årbed hed.

¹³ Gröt Rufus, di Ütkwoart ön di Herr, en sin en min Moder.

¹⁴ Gröt Asyncritus, en Flegon, Hermas, Patrobas, Hermes, en di Brödhem bi jam.

¹⁵ Gröt Filologus en Julia, Nereus en sin Sester, en Olympus, en alle Helligen bi jam.

¹⁶ Gröt I arküder me en hellig Tåtj. Di Geminten van Kristus gröt ju.

¹⁷ En ik bed ju, lew Brödhem! dat I Agt ha üp danen, diär Twedragt en Argernis önrogt tögen di Lir, diär I van üs lirt ha, en ha nin Geminskep me jam.

¹⁸ For sokken tine ek us Herr Jesus Kristus, mar jar Bük, en dör Etermüdspreken en Smeigelei forleite ja di ünskildjig Harten.

¹⁹ For ju Harkin es alle Man bekänt uden. Diäraur frügge ik mi om ju wel; en ik wenske, dat I wis sen tö dit Guds, mar jenfoaldig tö dit Arigs.

²⁰ Mar Gott, diär Frēd skaffet, skel di Satan önder ju Fet trēd ön en Hast. Di Gnad van üs Herr Jesus Kristus wis me ju. Amen.

²¹ Timotheus, min Helper, en Lucius, en Jason, en Sosipater, min Frindjner gröt ju.

²² Ik Tertius, diär dös Brēf skrewwen hēd, gröt ju ön di Herr.

²³ Gajus, min Hüswiärt en Wiärt van dit hile Geminte let ju gröt. Erastus, di Stad Räntmeister en Quartus, di Brödher gröt ju.

²⁴ Di Gnad van üs Herr Jesus Kristus wis me ju altermål. Amen.

²⁵ Höm nü, diär ju stärk kjen, na min Evangilje en Prötji van Jesus Kristus eter di Ipenbåring van di Hjemmelkheid, wat van di ewig Tid forswügget wessen hēd.

²⁶ Mar nü ipenbåret es, en dör di Skreften van di Profeten, üp Befel van di ewig Gott, om di Befölliging üt di Glow mung di Heiden.

²⁷ Disallew Gott, diär alining wis es, di Iär dör Jesus Kristus ön Ewigheid. Amen.