Matthäus 28 - North Frisian New Testament (Clemens)

Dit 28. Capitel.

¹ Hen tögen Jend van di Sabbath, en Miärnem eder üp di jest Werkeldai, kam Maria Magdalena en di Üder Maria, om dit Grēw tö besen.

² En lukke hjir! em spört en stark Ördsjilwin. For üs Herr Gott sin Engel kâm diäl van Hemmel, kam hjårt, en wiäldert di Stin van di Dür, en sǟt sik diärüp.

³ En sin Gestalt wiär üs en Leid, en sin Kload sa wit üs Sné.

⁴ Di Wagters wåd diäraur sa forfīrt en ungstig, en ja wiär tö Mud alliküs wans doad wiär.

⁵ Mar di Engel swåret en said tö di Wüffen: “Forskrek ju ek! Ik wēt, dat I Jesus sjuk, diär krütsigt es.

⁶ Hi es hjir ek, hi es âpstönden, alliküs hi said hēd. Kom hjårt, en besé dit Steid, hur hi leid hēd.

⁷ En gung gau hen tö sin Lirlings en si tö jam: “Hi es van Doaden âpstönden, en lukke hjir, hi wel voar ju hengung ön Galiläa, diär wel I höm tö sen fo. Mark diärüp, ik hå-t ju van tö voâren said.

⁸ Ja ging hastig weg van dit Grēw, wi en wund voar lutter Frügged, en lȫp hen, om sin Lirlings di Tiding tö bringen.

⁹ En lukke hjir, diär kam Jesus jam öntögen en said: Guddai, ik gröt ju! Ja kâm hjårt tö höm, fåtet sin Fet ön, en fääl diäl voar höm.

¹⁰ Diär said Jesus tö jam: “Ūd ek forfirt! Gung hen en bring min Lirlings di Tiding, dat ja nå Galiläa gung; diär wel ja mi tö sen fo.

¹¹ Mar diär ja henging, betǟnk, da kâm er hokken van di Wagters ön di Stad, en brågt di Opperpröster di Tiding van Alles, wat-er voarfälen wiär.

¹² En ja kam me di Olderlid töhop, en rådslåget diäraur, en said tö di Soldaten, diär vūl Jild fing:

¹³ Si I: “Sin Lirlings kâm ön Nagtem en stjält höm, wedert wü slöp.”

¹⁴ En wan-t üt kom skuld voar di Vöged, da wel wü höm bald besnakke, en-t sa måke, da I fri sen.

¹⁵ Ja nōm dit Jild, en död dit, alliküs jam lirt uden wiär. En dit Gerügt es mung di Juden ön Omlōp kjemmen, bet delling tö.

¹⁶ Di elf Lirlings ging na Galiläa, en bejåw jam üp en Bârig, hur Jesus jam stewent hed.

¹⁷ En diär ja höm såg, fäl ja höm tö Fut, mar Sommen twiwelt.

¹⁸ Jesus kam nü naier, sprok tö jam en said: “Mi es alle Gewalt ön Hemmel en üp Örd aurdön.

¹⁹ Gung hen, en belīr alle Nationen, en döpe jam ön Gotts Noom: Våder, Seen en hellig Geist.

²⁰ En līr jam, dat ja hoald skel, wat ik ju befälen hå. En betänk, ik sen jå ark Dai bi ju bet tö Warlds Jenđ.” Amen.