Matthäus 27 - North Frisian New Testament (Clemens)

Dit 27. Capitel.

¹ En Miärnem kâm alle Opperpröster en di Olderlid van-t Volk tö hop om en rådslågten, hurdelling ja höm tö Doâd bring küd.

² En diär ja höm knewelt hed, fört ja höm hen, en aurlöwert höm ön Pontius Pilatus, di Lönđvöged.

³ Üs Judas, diär höm forrat hed, såg, dat hi tö Doad forordilet wiär, fing hi san Beruen diäraur, en brågt di dördig Sölwerling, en wild danen di Opperpröster en di Olderlid dö.

⁴ En said: “Ik hå gurt Senđ dön, dat ik ünskildig Blöd forrat hå.”

⁵ Ja sprok: “Wat råket üs dit? Sé dü tö foar di salw.” Diär smēt hi di Sölwerling ön di Tempel, ging weg, en hinget höm salw âp.

⁶ Mar di Opperpröster nōm di Sölwerlinger, en said: Hat es ek rogt, dat wü danen ön di Tempelkes li, foar hat es di Pris foar Blöd.

⁷ Mar nü rådslåget ja weder, en kopet foar dit Jild en Eker van en Pötjer tö en Sä̊rkhof foar di Främenden.

⁸ Diärom jit di Eker tö Delling tö: di “Blödeker.”

⁹ Sa est tö folling kjemmen, wat di Profet Jeremias said hēd, wan hi sprakt: Ja hå dördig Sölwerlinger nommen, hurme di Pris foar di forkopet Mensk betålet wåd, diär ja kopet hed van Israels Seens.

¹⁰ En hå danen hendön foar en Eker van en Potmåker, alliksa üs mi di Herr befälen hēd.

¹¹ Jesus stönd voar di Löndföged, en di Löndföged fraget höm, en said: “Sen I di Juden jår Könning?” Jesus said tö höm: “I si dit jå.”

¹² En diär hi van di Opperpröster en Olderlid önklåget wåd, swåret hi nönt.

¹³ Diär said Pilatus tö höm: “Hjerst dü ek, hurfoar dü beskildigt ūdst?

¹⁴ En hi swåret höm üp ek en Uurd, sadat di Löndföged sik wundert en ho̊g âpsåg.

¹⁵ Mar üp dit Fäst pleid di Löndföged, üs hi dit uun wiär, dit Volk jen van di Gefangenen loas tö dön, wat foar jen dat ja hå wild.

¹⁶ En hi hed di Tid en Gefangenen, en slimmeren üs alle üdern, hi hjit Barabbas.

¹⁷ En diär ja forsåmelt wiär, sprok Pilatus tö jam: “Hokken wel I, dat ik ju loas dö”, Barabbas, of Jesus, diär Christus nämt ūd?”

¹⁸ For hi wust nog, dat ja höm üt Mesgönst /(Nidskheid)/ aurlöwert hed.

¹⁹ En diär hi /üp di/ Rogtstöl seet, stjürt sin Wüf tö höm, en let höm si: “Nem dü nönt tö dön me di rogtfardig Mensk, ik ha aur Nagt vūl leden ön Drōm om sin wel.”

²⁰ Mar di Opperpröster en di Olderlid rat dit Volk, dat ja om Barabbas bed skuld, en Jesus ombring.

²¹ Diär swåret di Löndföged, en said tö jam: “Wat foar jen wel I nü van di tau, dat ik ju loâs dö skel? Ja sprok “Barabbas.”

²² Pilatus said tö jam: “Wat skel ik da me Jesus måke, diär Christus nämt ūd?” Ja said altermal: “Let höm krütsigt ūd!”

²³ Di Löndföged said: “Wat Arigs heed hi da dön?” Diär rȫp ja jit âriger: “Let höm krütsigt ūd!”

²⁴ Diär Pilatus nü såg, dat hi nönt ütrogt küd, mar di Larem jit vul gurtemer wåd, no̊m hi Weter, tauet sin Hunden voar dit Volk jår Ogen en said: “Ik sen ünskildig ön dit Blöd van dös rogtfardig Man. Diär mai I nü tösé.”

²⁵ Diär swåret di hile Kär Lid en said: “Sin Blöd kom aur üs en üs Biärner!”

²⁶ Diärüp let hi jam Barabbas loas, mar Jesus let hi gissele en aurlöwert höm, dat hi krütsigt ūd skuld.

²⁷ Nü nōm di Löndföged sin Soldaten Jesus tö jam ön-t Rogthüs, en forsåmelt di hile Kär Lid om höm.

²⁸ Ja kloadet höm of en hinget en Purpurmantel om höm.

²⁹ Ja tappet en Krånds van Tūrner, sǟt di üp sin Haud, död höm en Reid ön di rogt Hund, bōg di Knebiner voar höm en rȫp höm skempelk tö: “Guddai, Könning foar di Juden!”

³⁰ Ja spüttet höm ön, nōm sin Reidstok, en slog höm diärme üp Haud.

³¹ En diär ja höm sa forspottet hed, tōg ja höm di Mantel of, en tōg höm sin ein Kloader weder ön, en geleiteten höm hen, dat hi krütsigt ūd skuld.

³² En diär ja höm sa dit Geleit död, möt ja en Man van Cyrene, bi Nōm Simon, en twōng höm, dat hi höm sin Krüts drog.

³³ En diär ja nü üp di Plåts kâm, diär di Nōm Golgatha hed, dit bedüdet: Haudskroksteid.

³⁴ Död ja höm Ötj me Gal formǟngt tö drinken, en diär hi-t smakt, wild hi-t ek drink.

³⁵ Diär ja höm krütsigt hed, dilet ja dör dit Lot sin Kloader. En sa kam tö folling dit, wat di Profet said hēd: “Ja hå min Kloader önder arküder dilet, en om min Mantel hå ja lottet.”

³⁶ En nü seet ja diär, en bewagt höm.

³⁷ En bowen aur sin Haud stönd di Skild van sin Doad skrewwen: “Dit es Jesus, di Juden jår Könning.”

³⁸ Uk wåd er me höm tau Rowers krütsigt, jen tö di rogt Hunđ, en di üder tö di left Hunđ.

³⁹ Dânen diär nü voarbi ging, beskempet höm en skoddet jår Hauder.

⁴⁰ En said: “Dü kjenst ja di Tempel diälbrēk, en ön tri Dågen weder âpbeg; help di nü salw! Best dü Gottes Seen, da stēg diäl van-t Krüts.”

⁴¹ Alliksa di Opperpröster, di Skreftlīrten en Olderlid spottet aur höm en said:

⁴² “Üdern hēd er holpen, en kjen höm salw ek help. Es hi di Könning van Israel, da let höm nü diälkom van-t Krüts, da wel wü höm līw.

⁴³ Hi hēd sin Fortruen üp Gott sǟt, let Gott höm nü help, wan-t höm gefalt. For hi hēd said: “Jk sen Gottes Seen.”

⁴⁴ Alliksa smoait di Mūrdigers höm, diär me höm krütsigt wåd.

⁴⁵ En van di Klok sogs of ön, kam-er en Junkens aur dit hile Lönd, hen tö di Klok nigen.

⁴⁶ En om en Klok nigen rȫp Jesus gurtem, en said: “Eli, Eli, lama asabthani!” dit es: “Min Gott, min Gott, hurom hēst dü mi forletten?!”

⁴⁷ Sommen, welk diärbi stönđ, diär ja dit hjert, said: “Hi rǟpt Elias.”

⁴⁸ En gau lȫp er jen van jam hen, nōm en Swåmp, en let en vol süg van Ötj, en stat en üp en Reidstok, en död höm dit tö drinken.

⁴⁹ En di Üdern said: “Tēw! let sé, of Elias komt, en höm helpt.”

⁵⁰ En alweder me gurtem Stem röp Jesus en jåw di Geist ap en forskǟd.

⁵¹ En lukke hjir, di Voarhang ön di Tempel rēw ön tau Stekken, van bowen of ön bet tö bidiäl.

⁵² En di Öörd sjillewt en di Stīnkleppen splēt, en di Grewer īpnet jam, en di Likken van di Helligen, diär stürwen wiär, stönd âp.

⁵³ En ging üt di Grewer eter sin Âpstunen, en kâm ön di hellig Stad, en kam vulen ön Sjün.

⁵⁴ Mar di Haudman en dânen, diär bi höm wiär, om bi Jesus Wagt tö hoâlden, diär ja dit Öördsjilwin såg, en wat diär gebört, forskrok ja gewaltig, en said: “Di Man es wårhaftig Gottes Seen!”

⁵⁵ En diär wiär vuul Wüffen, welk van firens tösåg, ja hed Jesus eterfölgt van Galiläa, en hed höm betinet.

⁵⁶ Mung dânen wiär Maria Magdalena, en Maria, di Moder van Jakobus en Joses, en di Moder van di Seens van Zebedäus.

⁵⁷ Ön Indnem kâm-er en rik Man van Arimathia, di hjit Joseph, welk uk en Lirling van Jesus wiär.

⁵⁸ Hi ging hen tö Pilatus, en boad höm om di Lik van Jesus. Dådelkst befoal Pilatus, em skuld höm di dö.

⁵⁹ En Joseph nōm di Lik, en wikkelt en īn ön rīn Lennendok,

⁶⁰ En leid en īn ön sin ein ni Grēw, wat hi hed ön en Stīnklep hauen letten, en wiäldert en gurt Stīn voar di Grēwdür, en ging diärvan.

⁶¹ En Maria Magdalena, en di Üder Maria wiär diär, en sät jam lik aur voar dit Grēw.

⁶² Üp di Üder Dai, welk üp di Rastdei fölgt, kâm di Opperpröster en di Farisäers altermål tö Pilatus.

⁶³ En said: “Herr, wü tänk diärom, dat dös Forförer bi sin Lewentstid said: “Ik wel om tri Dågen weder âpstūn.”

⁶⁴ Diärom befele, dat em dit Grēw forwåret bet tö di trǟd Dai; om dat sin Lirlings ek kom en si tö di Lid: “Hi es van Doaden âpstönden en üp di Wiis di leest Bedrog ârger ūd, üs di jest.”

⁶⁵ Pilatus said tö jam: “Diär hå I Wagters, gung hen, en bewagt dit Grēw, sa üs ju gud tinkt.

⁶⁶ Ja ging hen, forwåret dit Grēw me Wagters, en forsegelt di Stin.