Matthäus 18 - North Frisian New Testament (Clemens)

Dit 18. Capitel.

¹ Tö di salw Stünd kâm di Lirlings tö Jesus en said: “Hokken es wel di gurtst ön-t Hemmelrik?”

² Jesus rȫp en Biärn tö sik, en stelt et medden mung jam.

³ En said: “Wårelk, ik si ju, hat mai da wiis dat I omkir, en ūd üs di Biärner, da kjen I ek ön-t Hemmelrik kom.

⁴ For hokken höm salw forligert, üs dit Biärn, di es di Gurtst ön-t Hemmelrik.

⁵ En hokken sa en Biärn âpnemt ön min Nōm, di nemt mi âp.

⁶ Mar hokken jen van di Litj en, diär ön mi liiw, ârigt, hat wiär beter foar höm, dat höm en Mellenstiin iin /bi Hals/ hinget, en hi ön dit Dīpst van di See drǟngt wåd.

⁷ Wee di Warld, aur al di Argernis! Diär mut ja Argernis kom; dag wē di Mensk, dȫr hokken Argernis komt!

⁸ Mar wan din Hunđ of din Fut di ârgert, da hau en of, en smit en van di; hat es beter foar di, lam of forkröpelt ön-t Lewent tö gungen, üs tau Hunden en tau Fet tö håen, en ön-t Jöld ön di Hel smetten tö uden.

⁹ En wan din Oog di ârgert, da riiw-t üt en smit et van di; hat es beter foar di me jen Oog ön-t Lewent tö gungen, üs tau Oogen tö haen, en ön-t Jöld in di Hel smetten tö uden.

¹⁰ Nem ju in Agt, dat I niin van dös Litjen foragte, for ik si ju: Jår Engel ön Hemmel skaue altid dit Ansegt van min Vader ön Hemmel.

¹¹ For di Menskenseen es kjemmen, om selig tö måkin, wat forlesen es.

¹² Wat tinkt ju? Wan-er hokken höndert Sjip heed, en jen diärvan sik forirret, wel hi ek di nigen en negendig ön di Dälen let, geid hen en sjukt mung di Hoger dit forwildigt Sjip?

¹³ En wan-t höm slåget, dat hi-t fent, wårelk is si ju, hi frügget höm moar aur döt, üs aur di nigen en negendig, diär ek fordwålet wiär.

¹⁴ Alliksa est ju Våder ön Hemmel sin Wel ek, dat er /jen/ van dös Litjen forlesen geid.

¹⁵ Wan din Brödher sik tögen di forsendigt heed; da gung hen en stel höm diäraur tö Rede twesken höm en di alining, harket-er di da, da heest dü din Brödher wonnen.

¹⁶ Mar harket-er di ek, da nem jen of tau tö di; omdat di Såk na di Ütsåg van tau Tjügen forhandelt ūd.

¹⁷ Rekent hi uk ek üp jam; da si-t tö di hile Geminte; wan-er uk dit Geminte ek hir wel, da hoald höm foar en Heid of en Tolner.

¹⁸ Warelk! ik si ju: Wat I üp Warld bind wel, dit skel uk ön Hemmel bünden wiis, en wat I üp Warld lise wel, dit skel uk ön Hemmel liset wiis.

¹⁹ Farder si ik ju: Wan-er tau van ju jens ud üp Warld, om mearküder om wat tö bedden, da skelt jam nog tö Diil ud van min Våder, diär ön Hemmel es.

²⁰ For al hur tau of tri ön min Nōm töhop sen, diär sen ek medden mung jam.”

²¹ Diär kâm Petrus tö höm, en said: “Hur åft skel ik min Brödher, diär höm ön mi forsendigt, dit foriiw? Est nog sowen mal?”

²² Jesus said tö höm: “Ik si di, ek sowen mal, mar söwendig mal sowen mal.

²³ Diärom es dit Hemmelrik allik üs en Könning, diär me sin Knegter ofrekene wild.

²⁴ Diär hi begent oftörekenin, kâm er jen tö höm, di wiär höm tindüsend Pünd (Talents) skildig.

²⁵ Diär hi-t nü ek hed om tö betålin, befoal di Herr, höm en sin Wüf, en Jungen, en Al, wat er hed, tö forkopin, dat di Skild betålet wåd.

²⁶ Diär fǟl di Knegt höm tö Fut, en boad en said: “Herr ha Geduld me mi, ik wel di Alles betåle.”

²⁷ Di Herr hed Melid me dös Knegt; en let höm loas, en di Skild let hi fål.

²⁸ Diär ging di salw Knegt hen, en foand jen van di Tiinstknegter, diär me höm tinet, hi wiär höm höndert Penning skildig; en hi grēp höm ön, en wirrigt höm, en said: “Betåle mi, wat dü mi skildig best.”

²⁹ Diär fǟl sin Meknegt höm tö Fut, boad höm en said: Hå Geduld me mi! Ik wel di Alles betåle.

³⁰ Mar hi wild höm diärüp ek inlet, ging hen en let höm ön-t Tögthüs sǟt, tö dat hi di Skild betålet.

³¹ Mar diär di Meknegter dit såg, wåd ja vūl fortröttelk; ja ging hen, en brågt dit al voar jår Herr, wat er (passiäret) /sken/ wiär.

³² Diär fördigt di Herr höm voar sik, en said tö höm: “Dü Dögenigt, al din Skild hå ik fål letten, aurdat dü mi diärom boadst.

³³ Skudt dü di da uk ek aur din Meknegt erbarme, allik üs ik mi aur di erbarmet hå.”

³⁴ En sin Herr wåd wrēd, en aurlöweret höm ön di Gerigtsdiners, tö dat hi di hile Skild betålet.

³⁵ Alliksa wel uk min Vader ön Hemmel me ju forfår, wan ek ark sin Brödher van Harten töjewt.