Markus 16 - North Frisian New Testament (Clemens)

Dit 16. Capitel.

¹ En diär di Sabbat voarbi wiär, kopet Maria Magdalena, en Maria Jakobi en Salome Soalew, omdat ja kam, om höm tö salwin.

² En ja kam tö dit Grēw üp di jest Dai ön di Week, diär en Sabbat es, üs di Sen âpging.

³ En ja said tö arküder: Hokken wiäldert üüs di Stin weg van di Iingang tö dit Grēw?

⁴ En ja lukket diär hen, en wåd wår, dat di Stin ofwiäldert wiär; for hi wiär fålig gurt.

⁵ En ja ging iin ön dit Grēw, en såg en jung Mensk tö di rogt Hund setten, hi hed en lüng wit Kload ön; en ja wåd forfirt.

⁶ Mar hi said tö jam: Ud man ek forfirt. I sjuk Jesus van Nazareth, diär krütsigt es; hi es apstönden, hi es hjir ek. Se hjir dit Steid, hur ja höm leid hed.

⁷ Mar gung hen, en sīt tö sin Lirlings, en Petrus, dat hi voar ju hengeid nå Galiläa; diär wel I höm tö sen fo, alliküs hi tö ju said heed.

⁸ En ja ging hastig üt, en flögt weg van dit Greew; for diär wiär jam Sjilwin en Forfirels aurkjemmen; en ja said Nemmen wat, for ja fürgt sik.

⁹ Mar Jesus, diär hi âpstönden wiär, ön Miarnem eder, üp di jest Dai van di Sabbat, kâm hi alderjest Maria Magdalena ön Sjün, van welk hi sowen Düweler ütdrewwen hed.

¹⁰ En jü ging hen, en forkindigt et danen, diär me höm wessen wiär, welk Sörrig hed, en skroalet.

¹¹ En diär ja hjert, dat hi lewwet, en hör ön Sjün kjemmen wiär, liiwt disalwigen dit ek.

¹² Mar diär eter ipenbåret hi sik ön en üder Gestalt, diär tau van jam wandelt, en jat üp Mark ging.

¹³ En jat ging uk hen, en forkindigt et di Üdern; mar dânen liiwt ja uk ek.

¹⁴ Töleest, diär di Ellef bi Stål seet, ipenbåret hi sik; en forwit jam jår Unglōw, en jår Harts Hartheid, aurdat ja danen ek liiwt, diär höm sen hed, dat hi âpstönden wiär.

¹⁵ En hi said tö jam: Gung hen ön di hile Warld, en prötje dit Evangilje voar alle Kreaturen.

¹⁶ Hokken liiwt en döpet ud, di skel selig ud, mar di diär ek liiwt, di skel fordammet ud.

¹⁷ Di Teken, di dânen fölligt, welk liiw, sen: Ön min Noom wel ja Düweler ütdriw, me ni Tungen wel ja spreek.

¹⁸ Slangen wel ja fordriw. En wan ja wat Forgeftels drink, skelt jam ek skådige. Üp di Krånken wel ja di Hunden li, en da wel-t beter me jam ud.

¹⁹ En di Herr, eter dat hi tö jam spreken hed, wåd hi âphewen jen Hemmel, en set tö Gottes rogt Hund.

²⁰ En ja ging üt, en prötjet allerwegen, en di Herr wirket me jam, en bekraftigt dit Uurd döör Teken, welk diärüp fölligt. Amen.