Kolosser 2 - North Frisian New Testament (Clemens)

Dit 2. Kapitel.

¹ For ik wel, dat I wēt skel, watfoar en Kamp ik hå om ju, en om dânen ön Laodicea, en alle, diär min Ansegt ön-t Flesk ek sen hå.

² Omdat jar Harten formånet, en me arküder ön di Lewde forbünden ud, tö al Rikdom van Forstand, om Gottes Hjemmelkheid, en di Våders en Kristus tö känen.

³ Ön welk alle Skatten van Wisdom en Känels forborgen li.

⁴ Mar ik si diärvan, dat ju Nemmen bedrait me listig Beredin.

⁵ For alhurwel ik me dit Flesk ek bi ju sen, da sen ik dag me min Geist bi ju, frügge mi, en se ju Ordning, en ju fast Glow ön Kristus.

⁶ Alliküs I nü di Herr Kristus Jesus önnommen hå, sa wandele ön höm.

⁷ Nu skel I inwortelt en âprogt wis ön höm, en ön di Glōw fast wis, alliküs I lirt uden sen, en wis diärbi rikkelk dankbår.

⁸ Se tö, dat Nemmen ju forfört dör di Wârldswisheid en loasket Bedraien eter di Lir van Mensken, en eter di Wârlds Fastsäting, en ek na Kristus.

⁹ For ön höm unet di hile Volheid van Gott lifhaftig.

¹⁰ En wis I ön höm volkommen, welk dit Haupt es van al Förstendommen en Obrigheid.

¹¹ Ön welk I uk beskaren sen, me di Beskjäring, welk sönder Hunden sken es, mar diärdör, dat I di sendelk Likhäm ön-t Flesk ofli, nämelk me di Beskjäring van Kristus.

¹² Diärön, dat I me höm begrewen sen dör di Döp, hurön I uk âpstönden sen dör di Glow, welk Gott wirket, diär höm âpwäkt hed van Doaden.

¹³ En hed ju uk me höm lewendig måket, üs I doad wiär on ju Send, en ön di Voarhid van ju Flesk, en hi hēd üs alle Send foriwen.

¹⁴ En hi hēd di Handskreft fortilgt, diär tögen üs wiär, welk ön Fastsätings bestönd, en üs öntögen wiär, en hēd disalwigen üt di Medden wegnommen, en ön dit Krüts fastspikkert.

¹⁵ En hi hēd di Förstendommen en di Gewaltigen di Magt ofnommen, en jam ipenbår tö Skau drain, en hi hēd en Triumf üt jam måket dör sik sallew.

¹⁶ Nu skel er Nemmen ju en Geweten måke aur dit It en Drink, of aur wes Fǟstdagen, of Nimūn, of Sabbatten.

¹⁷ Wat di Skår es van dit, wat ön di tökommen Tid wiär, mar di Likhäm sallew es Kristus.

¹⁸ Let ju van Nemmen dit Bop forskåke, diär eter sin ein Wal ön Nedrigheid en Geistelkheid üs di Engeler ombi geid, hurvan hi older wat sen hed, en es sönder Oarsåk foriws âpblögen ön sin fleskelk Sen.

¹⁹ En halt sik ek ön dit Haupt, dör welk di hile Likhäm me Lǟnken en Fugen töhop sät es, en töhophalt, en apwugset tö en voarskel Gurtens.

²⁰ Wan I nü di Fastsätings van di Wârld ofstürwen sen me Kristus, wat let I ju da fang me di Fastsätings, alliküs dat I jit ön di Wârld lewwe?

²¹ Diär si: Dü skedt dit ek öngrip, dü skedt dit ek smak, dü skedt dit ek önrör.

²² Welk Dinge dag al tö en Fordârew sen, wan ja brukt ud eter Mensken-Gebot en Lirdom.

²³ Sok Mensken hå en Skin van Wisheid, dör sallew wälet Geistelkheid en Demud, en diärdör, dat ja di Likhäm ek forskoanige, en dit Flesk ek di Iär öndö, om dit tö sådigen.