Johannes 7 - North Frisian New Testament (Clemens)

Dit 7. Capitel.

¹ Diäreter wandelt Jesus ombi ön Galiläa, for hi wild ek ön Judäa ombi wandele, aurdat di Juden höm eter-t Lewent tragtet.

² En dit Judenfääst, di Lōwröst, wiär naibi.

³ Diär said sin Brödhem tö höm: Måke di âp van hjir, en gung na Judäa, om dat uk din Lirlings di Werke se, welk dü dǟdst.

⁴ Nemmen dǟd wat ön Hjemmelken, en wel dag fri nōmkindig wiis. Wan dü sok dädst, da ipenbåre di voar di Warld.

⁵ For sin Brödhem liiwt uk ek ön höm.

⁶ Diär said Jesus tö jam: Min Tid es ek hjir; mar ju Tid es altid forhunden.

⁷ Di Warld kjen ju ek hate; mar jü hatet mi; for ik tjüg om hör, dat hör Werken boshaftig sen.

⁸ Gung I âp tö dit Fääst; Ik wel jit ek âpgung üp döt Fääst, for min Tid es ek jit voljendigt.

⁹ Diär hi dit tö jam said hed, bleew hi ön Galiläa.

¹⁰ Mar üs sin Brödhem âpgingen wiär, da ging hi uk âp tö dit Fääst, ek ipenbår, mar hjemmelk.

¹¹ Diär sågt di Juden höm ön-t Fääst, en said: Hur es hi?

¹² En diär wiär en gurt Gemurmel om höm mung di Kär Lid. Sommen said: Hi es gud. En di Üdern said: Naan, mar hi forfört dit Volk.

¹³ Mar Nemmen sprok fri van höm, aur di Fürgt voar di Juden.

¹⁴ Da ging Jesus medden ön-t Fääst âp ön di Tempel, en lirt.

¹⁵ En di Juden forwundert sik, en said: Hur weet dös di Skreft, hi heed-s jå ek lirt?

¹⁶ Jesus swåret jam en said: Min Lir es ek min, mar sin, diär mi stjürt heed.

¹⁷ So hokken sin Wel dö wel, di skel ön höm slå, of dös Lir van Gott es, of wederk ik van mi sallew spreek.

¹⁸ Hokken van höm sallew sprakt, di sjukt sin ein Iär. Mar hokken di sin Iär sjukt, diär höm stjürt heed, di es wårhaftig, en niin Ünrogt es er ön höm.

¹⁹ Heed Moses ju ek di Wetten iwen? En Nemmen van ju halt di Wetten. Hurom sjuk I mi doad tö slåen?

²⁰ Di Kär swåret, en said: Dü heest di Düwel; Hokken sjukt di doad tö slåen?

²¹ Jesus swåret en said: En iningst Werk hå ik dön, en I wundere ju al.

²² Moses heed ju diärom di Beskjäring iwen; ek, dat-s van Moses komt, mar van di Väders; en I beskjär di Mensk üp en Sabbat.

²³ Wan di Mensk di Beskjäring üp en Sabbat önnemt, omdat Moses Wet ek breken ud; törne I da üp mi, dat ik di Mensk üp di Sabbat sünd måket hå?

²⁴ Ordile ek diäreter, of er hokken mans nog es, mar ordile na di Wet.

²⁵ Diär said er hokken van Jerusalem: Es dit ek höm, diär ja sjuk doad tö slaen?

²⁶ En lukke, hi sprakt fri, en ja si höm nöndt. Skuld üs Oppersten nü wes weet, dat hi wårelk Christus es?

²⁷ Dag weet wü, hurvan hi es; mar wan Christus kom skel, da wel er Nemmen weet, hurvan hi komt.

²⁸ Diär rööp Jesus ön di Tempel, lirt, en said: Ja, I kään mi, en weet, hurvan ik sen; en van mi sallew sen ik ek kjemmen, mar Hi es wårhaftig, diär mi stjürt heed, welk I ek kään.

²⁹ Mar ik kään Höm, for ik sen van höm, en hi heed mi stjürt.

³⁰ Diär sågt ja höm tö grippen; mar Nemmen leid di Hund ön höm, for sin Stünd wiär jit ek kjemmen.

³¹ En Vulen van di Kär liiwt ön höm, en said: Wan Christus komt, da wel hi uk moar Teken dö, üs dös dön heed.

³² En hat kam voar di Farisäers, dat di Kär Lid van höm murmelt. Diär stjürt di Farisäers en di Opperpröster Knegter üt, omdat ja höm grip skuld.

³³ Diär said Jesus tö jam: Ik sen jit en kūrt Tid bi ju, en da gung ik hen tö di, diär mi stjürt heed.

³⁴ I skel mi sjuk, en ek finj; en hur ik sen, diär kjen I ek hen kom.

³⁵ Diär said di Juden tö arküder: Hur wel dös hengung, dat wü höm ek finj skel? Wel hi tö di Griken gung, diär hen en her ombisprat li, en di Griken lir?

³⁶ Watfoar en Rede es dit, dat hi said: I wel mi sjuk, en ek finj; en hur ik sen, diär kjen I ek hen kom?

³⁷ En üp di leest Dai van-t Fääst, welk di wigtigst es, stönd Jesus âp, rööp en sprok: Hokken törstig es, di kom tö mi, en drink.

³⁸ Hokken ön mi liiwt, üs di Skreft said, van sin Lif skel Stromer van-t lewendig Weter flēt.

³⁹ Mar dit said hi van di Geist, welk danen fo skuld, diär ön höm liiw; for di hellig Geist wiär jit ek diär, aurdat Jesus wiär jit ek forherligt.

⁴⁰ Vulen van di Kär Lid, welk dös Rede hjert, said: Dös es wårlik en rogt Profet.

⁴¹ Di Üdern said: Hi es Christus. En Sommen said: Skel Christus üt Galiläa kom?

⁴² Said ek di Skreft, dat Christus van Davids Stad, en üt di Flekken Bethlehem, hur David wiär, kom skuld?

⁴³ Sa kam er en gurt Forskel mung di Kär om sin wel.

⁴⁴ En Sommen wild höm grip, mar Nemmen leid di Hund ön höm.

⁴⁵ Di Knegter kam tö di Opperpröster en Farisäers; en said tö jam: Hurom ha I höm ek brågt?

⁴⁶ Di Knegter swåret: Older heed en Mensk sa spreken, üs dös Mensk.

⁴⁷ Diär swåret di Farisäers jam: Sen I uk forfört?

⁴⁸ Liiwt er uk hokken van di Oppersten of Farisäers ön höm?

⁴⁹ Mar dit Volk, diär van di Wetten nöndt weet, es forflökt.

⁵⁰ Nikodemus, diär bi Nagt tö höm kâm, en welk mung jam wiär, said tö jam:

⁵¹ Forordile üs Wetten uk en Mensk, jer em höm forhjert heed, en tö weten faid, wat hi dääd?

⁵² Ja swåret, en said tö höm: Best dü uk en Galiläer? Öndersjuk en se, dat er üt Galiläa niin Profet âpstånt.

⁵³ En arkjen ging hen tö sin Hüs.