Johannes 1 - North Frisian New Testament (Clemens)

Dit 1. Capitel.

¹ Van jest Begen of ön wiär dit Uurd, en dit Uurd wiär bi Gott, en Gott wiär dit Uurd.

² Dit wiär van jest Begen bi Gott.

³ Alle Dinge sen döör ditsallew måket uden; en sönder ditsallew es er niin Ding måket, wat måket es.

⁴ Ön höm wiär dit Lewent, en dit Lewent wiär dit Läägt ön di Mensk.

⁵ En dit Läägt skintj ön di Junkheid, en dit Junkens heed-t ek begreppen.

⁶ Diär wiär en Mensk van Gott stjürt, di hjit Johannes.

⁷ Disallew kâm tö en Tjügnis, dat hi van dit Läägt tjügt, omdat alle döör höm liiw skuld.

⁸ Hi wiär ek dit Läägt, mar hi wiär stjürt, om van dit Läägt tö tjügen.

⁹ Hi wiär dit wårhaftige Läägt, wat alle Mensken läägt måket, welk tö Warld kom.

¹⁰ Hi wiär ön di Wârld; en di Wârld es döör höm måket; en di Warld käänt höm ek.

¹¹ Hi kâm ön sin Ein; mar sin Einen noom höm ek âp.

¹² Mar hur Vulen höm önnoom, danen jåw hi Magt, Gottes Biärner tö uden.

¹³ Welk ek van dit Blöd sen, nog van Fleesk Wel, nog van en Mans Wel, mar van Gott geboren sen.

¹⁴ En dit Uurd wåd Fleesk, en unet mung ǖs, en wü såg sin Herligheid, en Herligheid üs di iningst tökjemmen Seen van di Vader, vol Gnåd en Wårheid.

¹⁵ Johannes tjügt van höm, rääpt en sprakt: Dös wiär-t, diär ik van said hå: Eter mi wel er jen kom, diär voar mi wessen heed, for hi wiär jer üs ik.

¹⁶ En van sin Volheid hå wü al nommen Gnåd om Gnåd.

¹⁷ For di Wet es döör Moses iwen; di Gnad en di Warheid es döör Jesus Christus uden.

¹⁸ Nemmen heed Gott jens sen; di iningst geboren Seen, welk ön di Våders Skoat es, di heed-t ǖs forklåret.

¹⁹ En dit es dit Tjügnis van Johannes, diär di Juden van Jerusalem Pröster en Leviten stjürt, dat ja höm fråge skuld: Hokken best dü?

²⁰ En hi bekäänt en loog ek; en hi bekäänt: Ik sen ek Christus.

²¹ En ja fråget höm: Wat da? Best dü Elias? /Hi sprok:/ Ik sen höm ek. Best dü en Profēt? En hi swaret: Nån.

²² Da said ja tö höm: Wat best dü da? Omdat wü en Swår iiw mai dânen, welk ǖs stjǖrt hå. Wat saidst dü van di sallew?

²³ Hi sprok: Ik sen di Stem van en Pröst, diär rääpt ön en wööst Ort: Måke di Herr sin Wei törogt, alliküs di Profet Jesaias said heed.

²⁴ En danen, diär stjürt wiär, ja wiär van di Farisäers.

²⁵ En ja fraget höm, en sprok tö höm: Hurom döpest dü da, wan dü ek Christus best, nog Elias, nog en Profet?

²⁶ Johannes swåret jam, en said: Ik döpe me Weter, mar hi stånt medden mung ju, diär I ek kään.

²⁷ Disallew est, diär nå mi komt, welk voar mi wessen heed, ik sen-t ek wert, dat ik höm di Skogrimen âplise.

²⁸ Dit ske tö Bethabara, üp di Üder Sid van di Jordan, hur Johannes döpet.

²⁹ Üp di Üder Dai såg Johannes, dat Jesus tö höm kâm, en sprok: Se, dit es Gottes Lum, welk di Warlds Send drait.

³⁰ Hat es höm, van welk ik said hå: Nå mi komt en Man, welk voar mi wessen heed, for hi wiär jer, üs ik.

³¹ En ik küd höm ek; mar omdat hi ön Israel ipenbåret wåd, diärom sen ik kjemmen, om me Weter tö döpin.

³² En Johannes tjügt, en sprok: Ik såg, dat di Geist diäldålet, alliküs en Düf van Hemmel, en blēw üp höm.

³³ En ik küd höm ek, mar di diär mi stjürt heed, om me Weter tö döpin, disallew sprok tö mi: Üp welk dü Gottes Geist diäldålin Sjogst, en üp höm bliwen; disalwige es dit, diär me hellig Geist döpet.

³⁴ En ik såg dit, en tjügt, dat hi di Seen van Gott es.

³⁵ Üp di Üder Dai stönd Johannes alweder, en tau van sin Lirlings.

³⁶ En diär hi Jesus gungen såg, sprok hi: Dit es Gottes Lum.

³⁷ En tau van sin Lirlings hjert höm spreken, en jat fölligt Jesus.

³⁸ Mar Jesus kirt sik om, en såg, dat jat höm eterfölligt, en sprok tö jam: Wat sjuk at? En jat said tö höm: Rabbi (dit hjit aursäät: Meister) hur uni I?

³⁹ Hi sprok tö jam: Kom en se dit. Jat kâm, en såg dit, en bleew disallew Dai bi höm. En hat wiär om Klok tīn.

⁴⁰ Jen van di tau, diär-t van Johannes hjert hed, en Jesus fölligt, wiär Andreas, di Brödher van Simon Petrus.

⁴¹ Disallew foand jest sin Brödher Simon, en sprok tö höm: Wü ha di Messias fünden, (dit es aursäät: Christus, di Soalewt.)

⁴² En hi fört höm hen tö Jesus. Diär Jesus höm såg, sprok hi: Dü best Simon, Jonas Seen, dü skedt Kephas hjit; dit es aursäät: Petrus, en Klep.

⁴³ Üp di Üder Dai wild Jesus weder hengung na Galiläa, en foand Filippus, en sprok tö höm: Fölge mi!

⁴⁴ Filippus wiär van Bethsaida; üt disallew Stad üs Andreas en Petrus.

⁴⁵ Filippus foand Nathanael, en said tö höm: Wü hå di fünden, van welk Moses ön di Wet en di Profeten skrewwen ha, nämmelk: Jesus, Josephs Seen van Nazareth.

⁴⁶ En Nathanael said tö höm: Wat Guds kjen er van Nazareth kom? Filippus said tö höm: Kom en se!

⁴⁷ Jesus såg Nathanael tö sik kommen, en said van höm: Se, wårelk, en rogt Israelit, ön welk niin Falskheid es!

⁴⁸ Nathanael said tö höm: Hurvan käänst dü mi? Jesus swåret, en said tö höm: Jerdat Filippus di rööp, diär dü önder di Figenboom wiärst, såg ik di.

⁴⁹ Nathanael swåret, en said tö höm: Rabbi, dü best Gottes Seen, dü best di Könning van Israel.

⁵⁰ Jesus swåret, en said tö höm: Dü liiwst, aurdat ik tö di said hå, dat ik di sen hå önder di Figenboom; dü skedt jit gurter Dingen tö sen fo.

⁵¹ En hi said tö höm: Forwår, forwår, ik si ju, van nü of ön skel I di Hemmel ipen se, en Gottes Engeler âp- en djälfåren üp di Menskenseen.