Ipenbaring 4 - North Frisian New Testament (Clemens)

Dit 4. Kapitel.

¹ Diäreter såg ik, en se, en Dür wåd er âplöken ön Hemmel, en di jest Stem, welk ik hjert hed me mi spreken, wiär üs en Basun, di said: Kom hjir âp, ik wel di wise, wat eter dössen ske skel.

² Metjens wiär ik ön di Geist; en se, ön Hemmel stond en Tron, en diär sēt Jen üp di Trön.

³ En di diärüp set, wiär öntösen alliküs di Stin Jaspis en Sardis; en en Rinbånk wiär rundom di Tron, öntosen üs en Smaragd.

⁴ En om di Tron wiär vjur en twundig Stöler; en üp di Stöler set vjur en twundig Olderlid me wit Kloader bekloadet, en hed üp jår Hauder gold Kronen.

⁵ En van di Tron ging üt Leid, Tönder en Stemmen; en sowen öntjendt Lampen broan voar di Tron, welk Gottes sowen Geister sen.

⁶ En voar di Tron wiär en gläsen See, alliküs Kristal; en medden ön di Tron vjur Dirten, vol Ogen, van voaren en van agteren.

⁷ En dit jest Dirt wiär alliküs en Löw, en dit üder Dirt wiär alliküs en Koalew, en dit träd hed en Önlet alliküs en Mensk, en dit vjart Dirt likket en Adler, diär flogt.

⁸ En ark van de vjur Dirten hed sogs Jükken rundom, en wiär van bennen vol Ogen, en hed nin Ru Nagt en Dai, en sprok: Hellig, hellig, hellig es Gott, di Herr, di Almagtig, diär wiär, en diär es, en diär komt.

⁹ En üs di Dirten Pris en Iär, en Dank höm jaw, diär üp di Tron sēt, diär lewwet van Ewigheid tö Ewigheid.

¹⁰ Fäl de vjur en twundig Olderlid djäl voar höm, diär üp di Stöl sēt, en bödigt tö höm, diär lewwet van Ewigheid tö Ewigheid.

¹¹ Herr! dü best et wert tö nemmen Pris en Iär, en Kraft, for dü hest alle Dinge skåpen, en dör din Wel wåd ja, en sen skåpen.