Ipenbaring 18 - North Frisian New Testament (Clemens)

Dit 18. Kapitel.

¹ En diäreter såg ik en üder Engel djälfaren van Hemmel, di hed en gurt Magt, en di Örd wåd lägt van sin Klårheid.

² En röp magtig me gurtem Stem, en sprok: Jü es fälen, jü es fälen, Babylon, di gurt, en es en Uning foar di Düweler uden, en en Åpbewårsteid foar alle ünrin en findsk Vüggeler.

³ For van dit Win üt di Törn van hör Hureri ha alle Heiden drunken, en di Könninger üp di Örd hå me hör Hureri drewwen, en hör Koplid sen rik uden van hör gurt Wellest.

⁴ En ik hjert en üder Stem van Hemmel, di sprok: Gung üt van hör, min Volk, omdat I hör Send ek dilhaftig ud; en omdat I ek wat fo van hör Plågen.

⁵ For hör Send längt bet âp ön Hemmel, en Gott tänkt om hör Ünrogtfârdigheider.

⁶ Betale hör, üs jü ju betälet hed; en fordeppelt hör dit eter hör Werken: En me disallew Kelk, hurme jü inskänkt hēd, diärme skänk I uk deppelt in.

⁷ Sa vul üs jü sik herrelk måket hed, en hör Wēld hed hed, sa vul skänk hör in van Kwoal en Lid; for jü sprakt ön hör Hart: Ik set üs en Könningswüf, en sen nin Inkewüf, en Sörrig skel ik går ek se.

⁸ Diärom skel hör Plågen kom üp jen Dai, nämelk: di Doad, Sörrig en Hunger, me Jöld skel jü forbronnen ud. For stark es di Herr Gott, diär hör rogt wel.

⁹ En di Könninger üp di Örd, welk me hör huret en Aurdadigheid drewwen hå, skel hör beskrole. En sik aur hör beklåge, wan jü di Rok van hör Brand se skuld.

¹⁰ En ja wel van firens stun üt Fürgt voar hör Pin, en sprek: We, we! di gurt Stad Babylon, di stark Stad! for din Gerigt es ön jen Stünd kjemmen.

¹¹ En di Koplid üp di Ord skel skroale, en Sörrig drai bi jam sallew, dat er Nemmen jår Wåren moar kope wel.

¹² Di Wåren van Gold, en Sölwer en Edelstin, en di Perlen, en Siden, en Lennen, en Purpur, en Skarlaken, en allerlei welharemt Tinken Holt, en allerlei Faten van kostbar Holt, en van Köper, en van Irsen, en van Marmorstin.

¹³ En Kanel, en Timian, en Soalew, en Wirok, en Öli, en Semmel, en Weten en Ausen, en Sjip en Hingster, en Wainer, en Slåwen, en Mensken-Silen.

¹⁴ En di Frügt, hureter din Seel lest, es van di ofweken, en Alles, wat vol en herrelk wiär, es van di ofweken, en dü skedt Sok ek moar findj.

¹⁵ Di Koplid me sok Wåren, diär van hör rik uden sen, skel van firens stun, üt Fürgt voar hör Kwal, skroale en klåge.

¹⁶ En si: We. we! di gurt Stad, welk me Siden en Purpur, en Skarlaken bekloadet wiar, en forsiret wiär me Gold, en Edelstin, en Perlen!

¹⁷ For ön jen Stünd es sa en gurt Rikdom tö Gründ gingen. En alle Herren van di Skepen, en di Hoppen Lid, di Küstenskeppers, en danen, welk üp di Skepen üs Boatslid handtire, en di Skeplid, welk üp See handele, stond van firens.

¹⁸ En röp, üs ja de Rok van jar Brand såg, en sprok: Watfoar en Stad es san en gurt Stad lik?

¹⁹ En ja smēt Stof üp jar Hauder, en röp, en skroalet en klaget, en sprok: We, we! di gurt Stad, hurön al danen rik uden sen, diär Skepen üp See hed me jår kostbar Wåren! For ön jen Stünd es jü forwöstet uden.

²⁰ Frügge di aur hör, Hemmel, en I hellig Aposteler en Profeten, for Gott hēd ju Ordil tögen hör ütfört.

²¹ En stark Engel lewt en gurt Stin ap, alliküs en Mellenstin, smēt en ön di See, en sprok: Alliksa skel me jen Storm di gurt Stad Babylon djälstört ud ön en Hast, en skel ek moar fünden ud.

²² En di Stem van di Sjungsters, en Harpenspöllers, di Pipers, en Posauners skel ek länger ön di hjert ud; en nin Handwerker skel er moar ön di fünden ud; en di Stem van di Melner skel ek moar ön di hjert ud.

²³ En dit Lägt üp dit Lägtstander skel ek moar lägt bren ön di, en di Stem van di Bridman en di Brid skel ön di ek länger hjert ud; for din Kōplid wiär di Gurten üp di Örd, for dör din Betrålin sen alle Heiden dössig uden.

²⁴ En dit Blöd van di Profeten en di Helligen es ön di Stad fünden uden, en van al danen, diär üp di Örd wirrigt uden sen.