Ipenbaring 15 - North Frisian New Testament (Clemens)

Dit 15. Kapitel.

¹ En ik såg en üder en wunderlik Teken ön Hemmel: Sowen Engel, ja hed di lēst sowen Plagen, for me danen es Gottes Fortörning vol måket.

² En dit såg üt üs en gläsen See me Jöld formängt; en dânen, diär di Wenbogt fingen hed aur dit Bēst en sin Bild, en sin Markteken, en sin Noms Getal, welk ön di gläsen See stönd, en hed Gottes Harpen.

³ En song dit Lēt van Moses, Gottes Knegt, en di Salm van dit Lum, en sprok: Gurt en wunderbar sen din Werken, Herr! almagtig Gott, rogtfârdig en wårhaftig sen din Weien, dü Könning aur di Helligen.

⁴ Hokken skel di ek fürgte, Herr! en din Nōm prise? For dü best alining hellig. For alle Heiden skel kom, en voar di önbödige; for din Ordile sen ipenbar uden.

⁵ Diäreter såg ik, en se, diär wåd di Tempel van di Hötten, hur di Ipenbåring ütkomt, ipenmaket.

⁶ En di sowen Engel, welk di sowen Plågen hed, ging üt di Tempel, en me en blank en rin Lennendok öntein, en jar Bresten wiär omgörtelt me forgilt Görteln.

⁷ En jen van di vjur Dirten jåw di sowen Engeler sowen gold Bekken, vol van Gottes Fortörning, diär lewwet ön al Ewigheid.

⁸ En di Tempel wåd vol van Rok üt Gottes Herrelkheid, en üt sin Kraft. En diär küd Nemmen ön di Tempel gung, bet dat di sowen Plågen van di sowen Engeler voljendigt wiär.