Ipenbaring 12 - North Frisian New Testament (Clemens)

Dit 12. Kapitel.

¹ En ön Hemmel kâm er en gurt Teken ön Sjün. En Wüf me di Sen bekloadet, en di Mun önder hör Fet, en üp hör Haud en Kron van twellew Stiären.

² En jü wiär grof, en röp, en wiär ön Biärens-Noad, en hed vul Wark voar di Geburt.

³ En diär kâm ön Hemmel jit en üder Teken ön Sjün, en se, en gurt road Drak, di hed sowen Hauder en tin Hurner, en üp sin Hauder sowen Kronen.

⁴ En sin Stört tōg di träd Dil van di Stiären, en smet-s üp di Örd. En di Drak stond voar di Wüf, diär bår skuld, omdat, wan jü geboren hed, hi dit forsling küd.

⁵ En jü bår en Sen, en Drängke, diär alle Heiden me di irsen Rōd weide skuld. En hör Biären wåd wegrükt hen tö Gott en sin Stol.

⁶ En di Wüf flögt ön di Wösteni, diär hed jü en Steid van Gott foar hör töred maket, omdat jü diär erniäret wåd düsend, tau höndert en söstig Dagen.

⁷ En diär öntstönd en Strid ön Hemmel. Migael en sin Engeler fegt me di Drak, en di Dråk en sin Engeler fegt.

⁸ En ja fing di Wenbogt ek, uk wåd jår Steid ön Hemmel ek moar fünden.

⁹ En di gurt Dråk wåd ütsmetten, nämelk di oald Slang, welk nämt ud di Düwel, en Satanas, diär di hile Warld forfört, en hi wåd smetten üp di Örd, en sin Engeler wåd uk diärhen smetten.

¹⁰ En ik hjert en gurt Stem, di sprok ön Hemmel: Nü es di Seligheid, en di Kraft, en dit Könningrik, en di Magt üs Gott sin en Kristus uden, wil di Forklager van üs Brödhern djälstört es, diär jam forklåget hēd Nagt en Dai voar Gott.

¹¹ En ja hå di Wenbogt aur höm fingen dör dit Blöd van dit Lum, en dör dit Urd van jar Tjügnis, en hå jar Lewent ek lew hed, bet hen tö di Doad.

¹² Diärom frügge I ju, I Hemmel, en danen, welk diärön une! We dânen, welk üp di Örd une, en üp di See, for di Düwel komt tö ju djäl, en hed en gurt Wredheid, for hi wet, dat di litjet Tid hēd.

¹³ En üs di Dråk såg, dat hi djälstört wiär üp di Örd, forfölligt hi di Wüf, welk dit Sēnkgen geboren hed.

¹⁴ En tau gurt Jukken van en Gūs-Arenk wad di Wüf iwen, omdat jü ön di Wösteni flö küd ön en Steid, hur jü erniäret ud küd tö en Tid, en tau Tid, en en hoalew Tid, fir van dit Gesigt van di Slang.

¹⁵ En di Slang skoat eter di Wüf, üt sin Müd, en Weter üs en Strom, om hör me di Strom wegtöspölen.

¹⁶ Mar di Örd holp di Wüf, en måket hör Müd ipen, en forslonk di Strom, welk di Dråk üt sin Müd skoat.

¹⁷ En di Dråk wåd fortörnt aur di Wüf, en ging hen om Krig tö begennen me hör üder Biärner, welk Gottes Gebot hoald, en Jesus Kristus standhaft bekän.

¹⁸ En ik stönd üp Söndwal bi Aur.