Hebräer 4 - North Frisian New Testament (Clemens)

Dit 4. Kapitel.

¹ Diärom let üs wel üppasse, dat wü di Tölöwing, tö sin Ru intökommen, ek forsümme, en Nemmen van üs töregblewt.

² For hat es üs uk forkindjigt uden, alliküs jam, mar dit Urd van di Forkindjiging holp jam nönt, wil danen ek liwt, diär dit hjert.

³ For wü, diär liw, gung in tö di Ru, alliküs hi said hed: Dat ik swor ön min Törn, ja skel ek tö min Ru kom; alhurwel di Werken van di Warlds jest Begen of ön volbrågt wiär.

⁴ Sprok hi ön en üder Steid van di sowenst Dai sa: En Gott röst üp di sowenst Dai van al sin Werken.

⁵ En hjir ön dit Steid wederom: Ja skel older tö min Ru kom.

⁶ Hat stånt jit bevoar, dat Sommen tö di Ru ingung skel, en dat dânen, welk dit jest forkindjigt uden wiär, ek tö di Ru kjemmen sen aur jar Ünglow.

⁷ Da bestemmet hi wederom en Dai eter en lung Tid, en said dör David: Delling, üs er said es, delling, wan I sin Stem hir, da skel I ju Harten ek forstokke.

⁸ For wan Josua jam tö Ru brågt hed, da hed hi ek van en üder Dai said.

⁹ Diärom es er jit en Ru aur foar Gottes Volk.

¹⁰ For hokken tö sin Ru kjemmen es, di rūt uk van sin Werken, alliküs Gott van sinnen.

¹¹ Let üs nü strewe, dat wü tö di Ru inkom, om dat er ek hokken ön dit sallew Voarbild van di Unglow falt.

¹² For Gottes Urd es lewendig en kraftig, en skarper üs en Knif me tau Eggen, wat deppelt skiärt, en dringt dör, tö dat et skäd Liw en Sil en Geist, uk Mark en Bin, en es en Rigter aur di Hartens Sen en Tågten.

¹³ En voar höm es nin Kreatur ünsigtbår, mar hat es Alles bloat en apdakket voar sin Ogen, tö di wü sprek.

¹⁴ Wil wü da en gurt Hogpröst ha, Jesus Kristus, Gottes Seen, diar ap tö Hemmel fären es, da let üs dit Bekänels fast hoald.

¹⁵ For wü ha ek en Hogpröst, diär ek Meliden me üs Swakheid hå küd, mar diär forsågt es allerwegen, alliküs wü, dag sönder Send.

¹⁶ Diärom let üs me en früggelk Tötruen hengung tö di Gnådenstöl, omdat wü Barmhartigheid fo, en Gnåd findj, tö di Tid, wan wü Help nödig hå.