Hebräer 3 - North Frisian New Testament (Clemens)

Dit 3. Kapitel.

¹ Diärom, I hellig Brödhern! welk me beröpen sen dör di Berōp van Hemmel, mark üp Jesus Kristus, di Apostel en Hogpröst, welk wü bekän.

² Hi es höm tru, diär höm måket hed, alliküs Moses ön sin hile Hüs.

³ Mar dös es en gurter Iär wert üs Moses, alliküs di en gurter Iär van dit Hüs hed, diär-t begt hēd, üs dit Hüs.

⁴ For ark Hüs ud van hokken begt; mar di, diär Alles begt hēd, dit es Gott.

⁵ En Moses hed wel tru wessen ön sin hile Hüs, üs en Diner, om tö betjügen, wat forkindjigt ud skel.

⁶ Mar Kristus, üs en Seen aur sin Hüs, huns Hüs wü sen, wan wü dit Fortruen en di Höp bet tö Jend fast hoald, en di Rum.

⁷ Diärom üs di hellig Geist sprakt: Delling, wan I sin Stem hir.

⁸ Da forstokke ju Harten ek, üs dit ging ön di Bisterheid, üp di Dai, diär I forsågt wåd, on di Wösteni.

⁹ Üs di Väders mi forsågt, ja prowet mi, en såg min Werken ön viärdig Jåren.

¹⁰ Diäraur wad ik fortörnt üp döt Geslegt, en sprok: Ja gung altid wild ön jår Hart, ja kän min Weien ek.

¹¹ Da hå ik swären ön min Fortörning, dat ja ek tö min Ru kom skuld.

¹² Se tö, lew Brödhern! dat er ek hokken mung ju en arig, ünglowig Hart hēd, om van di lewendig Gott oftöwiken.

¹³ Mar formåne ju sallew alle Dagen, sa lung üs-t delling hjit, om dat er ek hokken mung ju forstokket ud, dör Bedrog van di Send.

¹⁴ For wü sen ön Kristus dilhaftig uden, wan wü di Begen van di fast Gründ bet tö Jend fast hoald.

¹⁵ Sa lung üs er said ud, delling, wan I sin Stem hir, da forstokke ju Harten ek, alliküs dit ön di Fortörning ske.

¹⁶ For Sommen, üs ja hjert, bewiset sik wederspenstig en fortörnt höm, mar dag ek al, welk van Egypten ütgingen wiär dör Moses.

¹⁷ Aur watfoar hokken wåd hi viärdig Jar fortörnt? Wiär-t ek sa, dat di Senders jar Likhämen ön di Wösteni ombistrit leid?

¹⁸ Mar hokken hed hi swären, dat ja ek tö sin Ru kom skuld, üs di Ünglowigen?

¹⁹ En wü se, dat ja hå ek inkom küd van wegen jar Ünglow.