Hebräer 2 - North Frisian New Testament (Clemens)

Dit 2. Kapitel.

¹ Diärom skel wü om sa vul moar dit Urd fast hoald, wat wü hjert ha, omdat wü ederst ek ofwik.

² For wan dit Urd, wat dör di Engel spreken es, fast uden es, en ark Aurskridden en Üngehorsam sin rogt Loan fingen hēd:

³ Hur wel wü henflögt kjen, wan wü sa en gurt Seligheid ek agt? Welk eterdat di Herr dit jest forkindjigt hed, uk tö üs kjemmen es, en befestigt van danen, welk höm hjert hå.

⁴ En Gott hed diärtö Tjügnis iwen me Teken, Wunder en manningerlei Kraften, en me di Ütdiling van di hellig Geist, eter sin Wel.

⁵ For hi hēd di tökommende Warld, hurvan wü sprēk, ek di Engeler önderdånig måket.

⁶ Mar diär es jen Man, hi betjügt ön jen Steid, en sprakt: Wat es di Mensk, dat dü om höm tänkst, en di Menskenseen, dat dü höm önnemst?

⁷ Dü hest höm en kurt Tid wat mender måket üs di Engeler, me Pris en Iär hest dü höm krönet, en hēst höm sät aur di Werken van din Hunden.

⁸ Dü hēst Alles höm önder di Fet leid. Dat hi höm Alles önderdånig måke hēd, diärme hēd hi nönt wegnommen, wat höm ek önderdånig wiär; mar nü se wü jit ek, dat höm Alles önderdånig es.

⁹ Mar wü se Jesus dör di Doads Liden me Pris en Iär krönet, diär en kurt Tid mender wiär üs di Engel, omdat hi dör Gottes Gnad foar alle di Doad smakt.

¹⁰ For hat skekket sik foar höm, om huns wel alle Dinge sen, diär vul Biärner tö di Herrelkheid fört hed, dat hi di Stifter van jar Seligheid dör Liden volkommen måket.

¹¹ For di, diär helligt, en dânen, diär helligt ud, stamme al van Jen of. Diärom skammet hi sik uk ek, jam Brödhern tö nämen.

¹² En said: Ik wel din Nom min Brödhern forkindjige, en medden ön dit Geminte di Low sjung.

¹³ En wederom: Ik wel min Fortruen üp höm sät. En wederom: Lukke diär, ik en di Biärner, welk Gott mi iwen hēd.

¹⁴ Eterdat nü di Biärner Flesk en Blöd hå, es hi dit alliksa dilhaftig uden, omdat hi dör di Doad höm di Magt nom, diär di Doads Gewalt hed, dit es di Düwel.

¹⁵ En måket danen fri, diär dör di Fürgt voar di Doad jår hile Lewent Knegter wis måst.

¹⁶ For hi nemt di Engeler gar ek ön, mar hi nemt Abrahams Ofkomst tö sik.

¹⁷ Diärom måst hi voar allen Dingen sin Brödhern lik ud, omdat hi barmhartig wiär, en tru Hogpröst voar Gott, om di Volks Send tö forsönin.

¹⁸ For hurön hi ledden hed en forsagt uden es, diärön kjen hi danen help, diär forsågt ud.