Hebräer 13 - North Frisian New Testament (Clemens)

Dit 13. Kapitel.

¹ Bliw fast ön di Lewde tö di Brödhern.

² Aurit ek, om gastfri tö wisen; for diärdör hå Sommen sönder jar Weten Engel beherbârigt.

³ Tänk om danen, diär bünden wiär, üs wan I sallew bünden wiär; en dânen welk Kemmer lid, üs sokken, welk sallew jit ön di Likhäm lewwe.

⁴ Di Ee skel iärelk hölden ud van alle; en dit Ee-Bäd sönder Plakken, di Hurer en Eebreker skel Gott rigte.

⁵ Di Wandel skel sönder Gits wis, en wis töfred me dit, wat diär es, for hi hēd said: Ik wel di ek forlet nog forsümme.

⁶ Sa dat wü getrost si dort: Di Herr es min Helper, en ik wel mi ek fürgte, wat skuld en Mensk mi dö?

⁷ Tänk om ju Liärers, diär ju Gottes Urd forkindjigt hå, en wan I di Jend van jår Wandel betragte, da föllige jår Glow eter.

⁸ Jesus Kristus, juster en delling, en disallew uk ön Ewigheid.

⁹ Let ju ek me manningerlei en främed Lir ombidriw. For hat es gud, dat dit Hart stark ud dör di Gnad, ek dör di Spisen, hurvan dânen nin Net hå, welk sik diärön hoald.

¹⁰ Wü hå en Ålter, hurvan ja nin Rogt hå tö iten, diär bi di Höt tine.

¹¹ For di Dirten, van danen dit Blöd dör di Hogpröst ön dit Helligdom foar di Send indrain ud, jar Krop ud bütten voar dit Lagersteid forbrant.

¹² Diärom hēd uk Jesus dör sin ein Blöd bütten voar dit Dōr ledden, omdat hi dit Volk hellig måke wild.

¹³ Diärom let üs ütgung tö höm, bütten dit Lågersteid, en sin Smoai drai.

¹⁴ For wü hå hjir nin bliwen Stad, mar di tökommen sjuk wü.

¹⁵ Sa let üs nü dör höm Gottes Low-Åfer langsen åwere, dit es di Frügt van di Leppen, diär sin Nom bekän.

¹⁶ En aurit dit Guddön ek en metödilen, for sok Åfer hage Gott wel.

¹⁷ Harke ju Liärers, en föllige jam, for ja wake aur ju Selen, üs danen, diar Rekenskep diäraur ofli skel, omdat ja dit me Frügged dö, en ek me Sikkin, for dit es ek gud foar ju.

¹⁸ Bödige foar üs. Wü tröste üs diärme, dat wü en gud Geweten ha, en bestrewe üs en gud Wandel tö fören bi alle.

¹⁹ Mar ik formåne ju om sa vul moar, dit tö dön, omdat ik om sa vul gauer weder tö ju kom.

²⁰ Mar Gott, diär di Fred hed, en van Doaden di gurt Hort aur di Sjip ütfört hed, dör dit Blöd on dit ewig Testament, üs Herr Jesus Kristus.

²¹ Hi måke ju klår tö alle gud Werken, om sin Wel tö dön, hi wirke ön ju, wat höm wel haget dör Jesus Kristus; höm skel di Iär wis van Ewigheid tö Ewigheid. Amen.

²² Mar ik bed ju, lew Brödhern! nem dit Urd van di Formåning gud ap; for ik hå ju kūrt skrewwen.

²³ Wet, dat di Brödher Timotheus loasletten es; me höm, wan hi bald komt, wel ik ju se.

²⁴ Gröt ju Liärers, en alle Helligen. Dânen van Italien gröt ju.

²⁵ Di Gnåd wis me ju al! Amen.