Galalater 6 - North Frisian New Testament (Clemens)

Dit 6. Kapitel.

¹ Lew Brödhern! Wan en Mensk meskin van en Mesdåd aurilet ud, da, I Geistelken, help höm weder törogt me en sagtmudig Geist. En se üp disallew, dat uk dü ek forsjukt ud.

² Di jen drai di Üder sin Last, da dö I vol foar di Wet van Kristus.

³ Mar wan-er hokken tinkt, dat hi wat es, en hi es dag nönt, di bedrait höm sallew.

⁴ Ark prowe sin ein Werk, en da wel hi ön sik sallew Rüm hå, en ek ön udern.

⁵ For Ark skel sin ein Last drai.

⁶ Mar di diär lirt ud me dit Urd, di dile al dit Guds me ön di, diär höm lirt.

⁷ Twiwelt ek! Gott let sik ek forspotte. For wat di Mensk sä, dit skel hi bârige.

⁸ Hokken üp sin Flēsk sä, di skel van dit Flesk di Fordârew ârne. Mar hokken üp sin Geist sä, di skel van di Geist dit ewig Lewent arne.

⁹ Let üs dag Gud dö, en ek trät ud; for tö sin Tid skel wü uk arne, wan wü uk olter eder mat ud.

¹⁰ Wil wü nü Tid ha, da let üs Gud dö ön Arkjen, mar ollermist ön üs Einen, diär di Glōw ha.

¹¹ I se, me hur vul Urder ik ju skrewwen ha me min ein Hund.

¹² Danen welk sik Önsen na dit Flesk forskaffe wel, twing ju, dat I ju beskiär let skel, alining, omdat ja ek me dit Krüts van Kristus forfölligt ud.

¹³ For uk ja sallew, welk sik beskiär let, hoald di Wet ek; mar ja wel, dat I ju beskiär let, omdat van ju Flesk sik rüme mai.

¹⁴ Mar ik sen fir diärvan, om mi tö rümin, üs alining van üs Herr Jesus Kristus sin Krüts; dör höm es mi di Warld krütsigt, en ik di Warld.

¹⁵ For ön Kristus Jesus gelt nogweder Beskiäring, of Voarhid wat, mar en ni Kreatur.

¹⁶ En sa Vulen, üs er eter dös Regel wandele, aur danen wis Fred en Bârmhartigheid, en aur Israel van Gott.

¹⁷ Van nü of ön måke Nemmen mi firder Meit; for ik drai di Markteken van di Herr Jesus ön min Likhäm.

¹⁸ Di Gnåd van üs Herr Jesus Kristus wis me ju Geist, lew Brödhem! Amen.