Galalater 5 - North Frisian New Testament (Clemens)

Dit 5. Kapitel.

¹ Bliw standhaft ön di Friheid, hurme Kristus üs fri måket hed, en let ju ek weder tö dit Slawen-Jok twing.

² Se, ik Paulus si ju: Wan I ju beskiär let, da es Kristus ju nin Net.

³ Ik betjüg weder Arkjen, diär sik beskiär let, dat hi jit skildjig es, di hile Wet tö dön.

⁴ I hå me Kristus nönt tö dön, for I wel dör di Wet rogtfârdig ud, en sen van di Gnåd offälen.

⁵ Mar wü sen dör di Geist ön di Glow di Rogtfardigheid forwagten, hurüp wü höpe mut.

⁶ For ön Kristus Jesus gelt nogweder Beskiäring of Voarhid, mar di Glōw, diär dör di Lewde wirket.

⁷ I wiär gud üp di Wei. Hokken hendert ju, di Wårheid tö harkin?

⁸ Sa en Töreden es ek van di, diär ju röpen hed.

⁹ En litjet Süring maket dit hile Jei sur.

¹⁰ Ik forlet mi üp üp ju ön di Herr, dat I ek Üder Sens ud. Hokken ju ön Twiwel bringt, skel sin Ordil drai, hi mai wis, hokken hi wel.

¹¹ Mar ik, lew Brödhem! wan ik di Beskiäring jit prötje, hurom lid ik da Forfölging? Da wiär dit Argernis van dit Krüts âphewen.

¹² Wilds Gott, dat dânen ütrottet wåd, welk ju forwirre.

¹³ Mar I, lew Brödhem! sen tö di Friheid röpen. Se tö, dat I di Friheid na dit Flesk ek mesbrük, mar dör di Lewde tine di jen di Üder.

¹⁴ For alle Wetten kom me jen Urd tö folling, namelk ön dit: Ha din Naist lew, üs disallew.

¹⁵ Mar wan I arküder bit en frēt, da se tö, dat ik arküder ek apit.

¹⁶ Mar ik si: Wandelt ön di Geist, da wel I di Lest na dit Flesk ek volbring.

¹⁷ For dit Flēsk begiärt tögen di Geist; en di Geist tögen dit Flēsk. En dânen sen biding tögen arküder, dat I ek dö, wat I wel.

¹⁸ Wan di Geist ju drewt, da sen I ek onder di Wet.

¹⁹ Di Werke nå dit Flesk sen ipenbår, üs: Eebrēk, Hureri, Ünrinheid, Üntügt.

²⁰ Ofgotten, Tråleri, Findskep, Kreteli, Nidskheid, Ofgönst, Töm, Strid, Ünjensheid, Rotten, Håt, Mūrd.

²¹ Drunkenheid, Prasseri en döslikken; hurvan ik ju tövoaren said hå, alliksa si ik jit weder tövoaren, dat dânen, diär sok dö, Gottes Rik ek arwe skel.

²² Mar di Frügt van di Geist es Lewde, Frügged, Frēd, Geduld, Mildheid, Gudheid, Glow, Sagtmudigheid, Küskheid.

²³ Tögen Sokken es di Wet ek.

²⁴ Dânen, welk Kristus töhir, krütsige jar Flesk samt di Lest en Begiärligheid.

²⁵ Lewwe wü ön di Geist, da let üs uk ön di Geist wandele.

²⁶ Let üs ek gitsig wis eter idel Iär, om üs tögen arküder aptöhitsen en tö håtin.