Filipper 4 - North Frisian New Testament (Clemens)

Dit 4. Kapitel

¹ Nü da, min lew Brödhern eter min Forlangen, min Frügged en min Krōn, bestun sa ön din Herr, I Lewsten.

² Ik formåne di Evodian, en di Syntyche, dat ja jens Sens ön di Herr sen.

³ Jå ik bed uk di, min tru Helper, stūn dös Wüffen bi, diär me mi streden ha foar dit Evangilje, me Clemens en din üdern van min Helpers, huns Nomer skrewwen stun ön dit Bok van-t Lewent.

⁴ Frügge ju langsen ön di Herr, en wederom si ik: Frügge ju.

⁵ Let ju Beskidenheid bi alle Mensken bekänt ud. Di Herr es naibi.

⁶ Wis ek ängstelk besörrigt, mar let ön alle Dingen ju Bodig en Wenskin me Danksien bekänt ud voar Gott.

⁷ En di Fred van Gott, diär bowen allen Forstand geid, bewåre ju Hart en Sen ön Kristus Jesus.

⁸ Firder, lew Brödhern! wat wårhaftig es, wat iärbar es, wat rogtfârdig es, al wat rin es, wat lewlik es, wat wel klinget, en meskin en Dögt es, munt en Low es, betänk dit Alles.

⁹ Wat I uk lirt, en fingen, en hjert en sen ha van mi, dit dö; da wel Gottes Fred me ju wis.

¹⁰ En ik sen vul blid ön di Herr, dat I weder wakker uden sen, foar mi tö sörgin; alhurwel I uk aft mi betågt hå, mar I sag jit nin Kands diärtö.

¹¹ Ik si dit, ek dat ik Gebrek hed hå; for ik hå-t lirt, me min Låg töfred tö wisen.

¹² Ik kjen lig, en ik kjen hōg wis. Ik kjen mi ön alle Dingen skekke en eter ark Wis, bid sat tö wisen, en Hunger tö liden, bid aurflödig tö haen, en Wånt lid.

¹³ Ik formai Alles dör Kristus, diär mi Kraft jewt.

¹⁴ I hå dag wel diärön dön, dat I ju min Bedrüwwing sa önnommen hå.

¹⁵ En uk I, Filipper! wet, dat ik van dit Evangiljes jest Begen of ön, üs ik van Macedonien ofreiset, nin Geminte mi wat medilet hed, om diäraur Rekening aur Ütjewten en Innemmen tö måkin, üs I alining.

¹⁶ For uk ön Thessalonik stjürt I tö min Bedârf eter dat ik nödig hed, jen lop, en da weder jenlop.

¹⁷ Hat es ek sa, dat ik di Gaw sjuk, mar ik sjuk di Frügt, dat di ön ju Rekening aurflödig es.

¹⁸ For ik hå Alles, en hå-t aurleidig. Ik ha volâp, sönt ik van Epafroditus dit fing, wat I mi stjürt hå, üs en dâlk Hârm, en lewlik Åfer, sa üs-t Gott håget.

¹⁹ O min lewwer Gott iw ju dag volâp tö ju Bedârf ön Noad eter sin Rikdom ön di Herligheid, ön Kristus Jesus.

²⁰ Üs Herr Gott en üs Våder wis Iär van Ewigheid tö Ewigheid. Amen.

²¹ Gröt alle Helligen ön Kristus Jesus. Di Brödhern, diär bi mi sen, gröt ju.

²² Alle Helligen gröt ju, en voarskel danen van di Kaisers Hüs.

²³ Üs Herr Jesus Kristus sin Gnad wis me ju al. Amen.