Filipper 1 - North Frisian New Testament (Clemens)

Dit 1. Kapitel.

¹ Paulus en Timotheus, Jesus Kristus sin Tinstknegter, alle Helligen ön Kristus Jesus, diärön Filippi sen, samt di Upseers en Diners.

² Gnade wis er me ju, en Fred van Gott, üs Våder, en di Herr Jesus Kristus.

³ Ik danke min Gott, sa åft ik om ju tänk.

⁴ Wat ik altid dö ön al min Bödiger foar ju altermål, en me en blid Sen bödige ik foar ju.

⁵ Aur ju Geminskep ön-t Evangilje, van di jest of ön tö nu tö.

⁶ En ik sen diärvan aurtjügt, dat di, diär dit gud Werk ön ju begent hēd, di welt uk volför, tö üp di Dai van Jesus Kristus.

⁷ Allik üs-t da van mi rogt es, dat ik van ju altermal likvul hoald, diärom dat ik ju ön min Hart hå, on dös min Kettings, hurön ik dit Evangilje forswåre en bekraftige, en I altermal me mi di Gnåd dilaftig sen.

⁸ For Gott es min Tjüg, hurvul mi eter ju al forlangt eter min Hart en Sen ön Jesus Kristus.

⁹ En diärom bed ik tö Gott, dat ju Lewde al moar en moar tönem mai ön allerlei Wetenskep en Erfåring.

¹⁰ Dat I prowe mai, wat dit Bäst es, om dat I geregt sen, en sönder Onstöt tö iwen, tö üp di Dai van Kristus.

¹¹ Volap me Frügten van Geregtigheid, welk dör Jesus Kristus sken sen ön ju tö Gottes Iär en Low.

¹² Mar ik let ju wet, lew Brödhern, hurdelling et me mi es, hat tinet moar tö en gud Fortgang foar-t Evangilje.

¹³ Sadelling dat min Banden ön Kristus ipenbar ud, ön dit hile Rigthüs, en bi di üdern al.

¹⁴ En vul Brödhern ön di Herr dör min Banden Fortruen fingen ha, en fast beslöten ha, dit Urd sönder Fürgt tö spreken.

¹⁵ Sommen forkindige uk wel Kristus om Hat en Stridsjugts wel, mar Sommen me en gud Mining.

¹⁶ Di jündern forkindige Kristus üt Stridsjugt, en ek rin, for ja min, ja wel min Banden en Bedrüwwing öndö.

¹⁷ Mar dössen üt Lewde, for ja wet, dat ik hjir li, om dit Evangilje tö forswårin.

¹⁸ Wat måket dit? Dat Kristus allikwel üp allerlei Wis forkindjigt ud, hat geske me Forstelling, of üp di rogt Wis, da frügge ik mi dag, en wel mi ug frügge.

¹⁹ For ik wet dat et mi slåget tö Seligheid dör ju Gebet, en dör di hellig Geist van Jesus Kristus sin Help.

²⁰ Alliküs ik tölēst di fast Höp ha, dat ik ön nin Sak ek tö Skand ud, mar dat ik me Frimudigheid, alliküs uk altid, sa uk nü, Kristus hōgpriset ud ön min Lif, hat mai da wis dör-t Lewent, of dör di Doad.

²¹ For Kristus es min Lewent, en Sterwin es min Gewenst.

²² Mar aurdat ön-t Flesk tö lewwin diärtö tinet, om moar Frügt tö skaffin, da wet ik ek, wat ik wäle skel.

²³ For hat lid-t mi biding hart üp. Ik hå Lest oftöskäden, en bi Kristus tö wisen, wat uk vul beter wiär.

²⁴ Mar hat es nödiger, ön-t Fleesk tö bliwen om ju wel.

²⁵ En ön dit gud Fortruen wet ik, dat ik bliw skel, en bi ju al wis wel, omdat ju Glōw tönemt tö ju ein Frügged.

²⁶ Omdat I ju wel röme mai ön Kristus Jesus van mi, wan ik weder tö ju kom.

²⁷ Wandelt iärbår eter dit Evangilje van Kristus, om dat, wan ik kom, om ju tö sen, of wan ik fir van ju hir, dat I stun ön jen Geist en ön jen Gemüt, en me samt üs strid foar di Glōw ön-t Evangilje.

²⁸ En dat I ju ön nin Ding forskrek let van di Tögenparti; wat en Bewis diärvan es, jam tö di Fordamnis, mar ju tö Seligheid, en ditsalwige van Gott.

²⁹ For hat es ju om Kristus wel iwen, dat I ek allining ön höm liw, mar uk foar höm lid.

³⁰ En I hå disallew Strid, welk I ön mi sen hå, en nü van mi hīr.