Efeser 6 - North Frisian New Testament (Clemens)

Dit 6. Kapitel.

¹ Biärner, harke ju Åldern ön di Herr; for dit es rogt.

² Iäre Våder en Moder; dit es dit jest Gebot wat Tölöwing hed.

³ Omdat et di gud geid, en dü lung lewwest üp di Örd.

⁴ En I Väders, reitse ju Biärner ek tö Töm, mar ti-s ap on Tügt en Formåning tö di Herr.

⁵ I Knegter, harke ju Herren na dit Flesk, me Fürgt en Sjilwin, ön ju Hartens Jenfoaldigheid.

⁶ Ek me Tinst alining voar Ogen, om di Mensken tö hågin, mar üs Tinstknegter van Kristus, dat I van Harten Gottes Wel dö.

⁷ Hat mut ju altid diärom tö dön wis, dat I di Herr tine, en ek di Mensken.

⁸ En wet, wat Ark foar guds däd, dit skel höm van di Herr forgelt ud, hi mai en Knegt of en fri Man wis.

⁹ En I Herren, dö uk ditsalwige bi jam, en let dit Trüwwin, en wēt, dat uk ju Herr ön Hemmel es, en bi höm gelt nin Önsen van di Person.

¹⁰ Tölest, min Brödhem! wis stark ön di Herr, en ön di Stärkte van sin Magt.

¹¹ Ti de Rösting van Gott ön, omdat I stun kjen tögen di listig Önlöp van di Düwel.

¹² For wü hå ek me Flēsk en Blöd tö kämpfin, mar tögen di Försten en Gewaltigen, nämelk tögen di Herren üp dös Warld, welk ön Junkens van dös Warld herske, me di Geister ön di Logt.

¹³ Om di Wel, da grip nå Gottes Rösting, omdat I üp di slim Dai diär tögen âpstun, en Alles wel ütrogt, en Alles aurwen mai.

¹⁴ Stun nü da, en ha ju Lunken omgörtelt me Wårheid, en ön di Panser van Rogtfârdigheid.

¹⁵ En Stewel aur Fet, dat I klår sen, om dit Evangilje van di Fred tö bedriwen, hurme I bereitet sen.

¹⁶ Voar allen Dingen grip tö di Glōws Skelt, hurme I al fürig Pilen van di Bösewigt löske kjen.

¹⁷ En nem di Helm tö di Seligheid, en dit Geist-Swärt, wat Gottes Urd es.

¹⁸ En bödige stidigs om Alles, wat ju üp-t Hart līdt, me Bedden en Fleen ön di Geist, en wåket diärtö me Önhoalden en Fleen foar alle Helligen.

¹⁹ En foar mi, omdat mi dit Urd iwen ud, en min Müd me frügged ipnet ud, om di Hjemmelkheid van dit Evangilje bekänt tö måkin.

²⁰ Huns Böd ik sen ön di Ketting, omdat ik diärön frimudig sprek en handele mai, üs-t sik gebört.

²¹ Omdat I uk wet, hur-t mi geid, en wat ik måke, dit Alles skel Tychicus, min lew en tru Brödher ön di Herr, ju wēt let.

²² Ik hå höm stjürt tö ju, om di wel, dat I tö weten fing, hur-t mi geid, en omdat hi ju Harten tröstet.

²³ Fred wis-er me di Brödhem, en Lewde me Glow, van Gott di Vader, en di Herr Jesus Kristus.

²⁴ Gnåd wis-er me ju al, welk lew hå üs Herr Jesus Kristus ünforgängelk! Amen.