Efeser 5 - North Frisian New Testament (Clemens)

Dit 5 Kapitel.

¹ Wis nü Gottes Nåfölligers, üs di lew Biärner.

² En wandelt ön di Lewde, alliküs Kristus ju hed lew hed, en hed sik sallew heniwen foar ju tö en Gåw en Slagtåfer, foar Gott tö en dalk Hârm.

³ Mar Hureri en al Ünrinheid, of Gits, let ek van ju said ud, üs-t sik skekket foar di Helligen.

⁴ Uk gröggelk Urder en Üniärbårheid, of legtfârdig Skemp, wat sik ek skekket foar ju, mar vulmoar Danksien.

⁵ For dit skel I wēt, dat nin Hurer, of Ünrin, of Gitshals, welk en Ofgottsdiner es, Arwing hēd ön dit Könningrik van Kristus en Gott.

⁶ Let ju ek forför dör en Lir sönder Gründ, for om dös wel komt Gottes Töm aur di Biärner, diär nin Glow hå.

⁷ Diärom wis ek jår Megenoten.

⁸ For I wiär jer ön Junkens, mar nü sen I en Lägt ön di Herr.

⁹ Wandelt üs di Biärner ön Lägtens. Di Frügt van di Geist es allerlei Gudheid, Rogtfärdigheid en Wårheid.

¹⁰ En prise, wat di Herr Gott wel håget.

¹¹ En ha ek Geminskep me di ünfrügtbar Werken ön Junkens mar bestrafes vul jer.

¹² For wat hjemmelk van jam ske, dit es uk skandelk tö sien.

¹³ Mar dit ud al ipenbår, want van-t Lägt strafet ud. For Alles, wat ipenbar es, dit es Lägt.

¹⁴ Diärom sprakt hi: Wåke âp, diär släpt, en stun ap van Doaden, da wel Kristus Lägt öntjend foar ju.

¹⁵ Sa se nü tö, hurdelling I voarsigtig wandele, ek üs di Ünwissen, mar üs di Wissen.

¹⁶ En skekke ju ön di Tid, for hat es en slim Tid.

¹⁷ Diärom ud ek ünforständig, mar forständig, wat di Herr sin Wel es.

¹⁸ En süp ju ek drunken ön Win, diärüp en aurdådig Lewent fölligt, mar ud vol Geist.

¹⁹ En sprēk me arküder van Psalmen en Lowsonger, en geistelk Lieder, sjung en spölle di Herr ön ju Hart.

²⁰ En si altid Dank foar Alles, Gott en di Våder, ön üs Herr Jesus Kristus sin Nōm.

²¹ En wis arküder önderdånig ön di Gottesfürgt.

²² Di Wüffen skel jår Maner önderdånig wis üs di Herr.

²³ For di Man es dit Haupt van di Wüf, alliküs Kristus dit Haupt van dit Geminte es, en hi es sin Likhäms Seligmåker.

²⁴ Mar alliküs dit Geminte nü Kristus önderdån es, alliksa skel di Wüffen jar Måner önderdån wis ön alle Dinge.

²⁵ I Måner skel ju Wüffen lew ha, alliküs Kristus dit Geminte lew hēd, en hēd sik foar jam heniwen.

²⁶ Omdat hi jam helligt, en hēd-s rin måket, dör dit Weterbad ön-t Urd.

²⁷ Om höm sallew en Geminte hertöstellen, welk herlik wiär, diär ek en Plak of Skrumpel of desglikken hed, mar dat-s hellig en stråffri wiär.

²⁸ Alliksa skel uk di Måner jår Wüffen lew ha, üs jar ein Likhämen. Hokken sin Wüf lew hēd, di hēd sik sallew lew.

²⁹ For Nemmen hed older sin ein Flesk hatet, mar hi niäret dit, en pleget sik, alliküs di Herr dit Geminte.

³⁰ For wü sen Leden van sin Likhäm, van sin Flesk, en van sin Biner.

³¹ Om dös Wel skel en Mensk Våder en Moder forlet, en sin Wüf önhinge, en jat skel biding jen Flēsk wis.

³² Dit Hjemmelkheid es gurt; mar ik si van Kristus en sin Geminte.

³³ Dag uk I, ja Arkjen hå sin Wüf lew, üs sik sallew. Di Wüf fürgte di Man.