Efeser 3 - North Frisian New Testament (Clemens)

Dit 3. Kapitel.

¹ Diärom ik Paulus, di Gefangener van Jesus Kristus foar di Heiden.

² Eter dat I hjert hå van Gottes Gnaden-Amt, welk mi ön ju iwen es.

³ Dat ik tö weten fing ha dit Hjemmelkheid dör Ipenbåring, alliküs ik voarhen me litjet Urder skrewwen hå.

⁴ Diärom kjen I, wan I dit lēs, min Forstand van di Hjemmelkheid ön Kristus mârk.

⁵ Wat ön di voarige Tid di Mensken-Biärner ek bekänt måket es, üs dit nü dör di Geist sin hellig Aposteler en Profeten ipenbåret es.

⁶ Nämelk dat di Heiden Meârwing sen, en ön disallew Likhäm, en Megenoten van di Tölöwing ön Kristus dör dit Evangilje.

⁷ Dat ik en Diner uden sen, eter di Gåw van Gottes Gnad, welk mi eter sin magtig Kraft iwen es.

⁸ Dös Gnad es mi, di ollerringst van alle Helligen, iwen, om mung di Heiden di ünrandsåkelik Rikdom van Kristus tö forkindjigen.

⁹ En Arkjen âptöklårin, hurön di Geminskep me di Hjemmelkheid bestånt, wat van di Warlds Begen ön Gott forborgen wessen hēd, diär alle Dinge skåpen hēd dör Jesus Kristus.

¹⁰ Omdat nü de Förstendommen en Obrigheiden ön Hemmel, dör dit Geminte Gottes mannigfoaldig Wisheid bekänt ud.

¹¹ Eter dit Voarnemmen van Warlds Begen, wat hi bewiset hēd ön Kristus Jesus, üs Herr.

¹² Dör höm ha wü Frügged en Tögang me al Fortruen dör di Glow ön höm.

¹³ Diärom bed ik, dat I ek forsage aur min Bedrüwwetheid, welk ik foar ju lid, en ju en Iär es.

¹⁴ Om di Wel büg ik min Knebiner voar di Vader van üs Herr Jesus Kristus.

¹⁵ Hi es di rogt Vader aur Alles, wat Biären hjit ön Hemmel en üp di Örd.

¹⁶ Dat hi ju Kraft jewt eter sin Rikdom van sin Herligheid, om dör sin Geist stark tö uden ön di inwendig Mensk.

¹⁷ Omdat Kristus dör di Glow ön ju Hart unet, en I dör di Lewde inwortelt en fast gründigt ud.

¹⁸ Omdat I begrip mai me alle Helligen, wat diär es di Brede, en di Längde, di Dīpte, en di Hōgte.

¹⁹ En dat I wet, dat di Lewde tö Kristus vul beter es, üs al dit Weten, omdat I Gottes Volheid ön vol Måt dilhaftig ud mai.

²⁰ Höm nü, diär magtig es, om Alles aurflödig tö dön, moar üs wü bed en forstun kjen, na di Kraft, welk ön üs wirket.

²¹ Höm alining skel di Iär wis ön dit Geminte dör Kristus Jesus, tö ark Tid van Stam tö Stam, van Ewigheid tö Ewigheid. Amen.