Efeser 1 - North Frisian New Testament (Clemens)

Dit 1. Kapitel.

¹ Paulus, en Apostel van Jesus Kristus, dör Gottes Wel, ön di Helligen, en Glowigen.

² Gnåd wis er me ju, en Fred van Gott, üs Våder, en di Herr Jesus Kristus.

³ Gott Low, en Dank, en di Våder van üs Herr Jesus Kristus, diär üs segent hed me allerlei geistelk Weldåden en Hemmels Gåwen dör Kristus.

⁴ Alliküs hi üs ütkwoart hed ön höm, jer dat di Gründ tö di Warld leid wåd, dat wü hellig en ünskildjig voar höm ön di Lewde wis skuld.

⁵ Hi hed üs tö Biärner ütwälet bi höm sallew, dör Jesus Kristus, sa üs-t sin Wel håget.

⁶ Om sin herrelk Gnåd tö prisin, hurdör hi üs begnådigt hed ön sin lew Seen.

⁷ Ön höm ha wü di Loaslising dör sin Blöd, nämelk di Foriwing van Send, eter di Rikdom van sin Gnad.

⁸ Wat üs rikkelk tö Dil uden es, dör al Wisheid en Klokheid.

⁹ Hi hed üs di Hjemmelkheid van sin Wel wet letten, üs-t höm håget, en hi dit sik Voarnemmen hed dör höm.

¹⁰ Omdat et forkindjigt wåd, üs di Tid tö folling kam, en omdat alle Dinge töhop onder jen Opperhaud såmelt wåd, bid wat ön Hemmel en üp di Örd es dör höm sallew.

¹¹ Dör höm ha wü uk dit Arfdil fingen, sa üs dir bestemmet wiär, eter sin Beslütning, diär alle Dinge wirket eter di Red van sin Wel.

¹² Omdat wü wat sen tö Low üp sin Herligheid, wü diär tövoaren üp Kristus höpe.

¹³ Dör höm ha I uk dit Urd van di Wårheid hjert, namelk dit Evangilje van ju Seligheid; dör höm sen I uk, wil I liwt ha, forsegeld uden me di hellig Geist eter di Tölowing.

¹⁴ Hi es dit Önderpoand van üs Arfdil tö üs Oflösing, omdat wü sin Eindom ud tö Pris üp sin Herligheid.

¹⁵ Diärom ha ik uk, eter dat ik hjert ha van ju Glow ön di Herr Jesus, en van ju Lewde tö alle Helligen.

¹⁶ Hir ik ek âp foar ju tö dankin, en tänk ön ju ön min Bödig.

¹⁷ Dat di Gott van üs Herr Jesus Kristus, di Våder di Herligheid, iw ju di Geist tö di Wisheid en Ipenbåring, tö di Känels van ju sallew.

¹⁸ Nämelk lägt Ogen bi ju Forstand, dat I wēt mai, wat di Höp es, hurtö hi ju röpen hēd, en welk di Rikdom es van sin herrelk Arfdil mung di Helligen.

¹⁹ En watfoar en voarskel Gurtheid van sin Kraft ön üs es, diär liw, eter di Wirking van sin magtig Starkheid.

²⁰ Wat hi wirket hēd ön Kristus, üs hi höm van Doaden apwäkt, en höm sät hēd tö sin hoger Hund ön Hemmel.

²¹ Aur alle Förstendommen, Gewalt, Magt, Herskep, en Alles, wat er nämt ud mai, en alining ön dös Warld, mar uk ön di tökommen.

²² En hed alle Dinge onder sin Fet leid, en hēd höm sät tö en Haupt aur Alles foar dit Geminte.

²³ Dit es sin Likhäm, nämelk di Volheid van dit, hurme hi Alles ön Alles volmåket.