2 Timotheus 3 - North Frisian New Testament (Clemens)

Dit 3. Kapitel.

¹ Mar dit skedt dü wēt, dat ön di lēst Dagen gefårelk Tiden kom skel.

² For hat wel Mensken iw, welk van jam sallew olter vul hoald, gitsig, gurtprålerisk, hoffârdig, Spotter, üngehōrsom tögen di Åldern, ündankbar, ünhellig.

³ Halsstarrig, ünforsönelk, fülmüdig, ünmåtig, mal, sönder en gud Wel.

⁴ Forreder, rökloas. Âpblögen, welk di Wellest moar lew hå üs Gott.

⁵ Ja ha wel din Skin van Gottseligheid, mar sin Kraft forlögne ja. Ha nin Omgang me jam.

⁶ Van sokken sen dânen, welk ön di Hüsing inslik hen en weder, en di Wüffen ön sik håle, diär me Send beleden sen, en van manning Begjärligheiden drewwen ud.

⁷ Welk altid lir, en nimmer tö di Känels van di Wårheid kom.

⁸ Alliksa üs Jannes en Jambres Moses wederstönd, sa wederstun uk dössen di Wårheid; hat sen Lidden me forrüttelt Sennen, en ündögsom tö di Glow.

⁹ Mar ja skel dit ek stidigs sa driw; for jar Dōrheid skel ipenbår ud voar Arkjen, allik üs-t me jam di Fal wiär.

¹⁰ Mar dü hēst min Lir tö weten fingen, min Wis, min Mining, min Glow, min Geduld, min Lewde, min Lidsomheid.

¹¹ Min Forfölliging, min Liden, welk ik ön Antiochien, ön Iconien, en ön Lystra erfåren hå, watfoar en Forfölliging ik leden ha, en üt dit al hēd di Herr mi erlöset.

¹² En al dânen, welk gottselig lewwe wel ön Kristus Jesus, mut Forfölliging lid.

¹³ Me di gottloas Mensken en Forförers ūdt jå lǟnger, ja ariger, ja forför, en ud forfört.

¹⁴ Mar bliw dü ön dit, wat dü lirt hēst, en di önbitrut es, eter dat dü wētst, van hokken dü lirt hēst.

¹⁵ En wil dü van din Biärenskep of ön di hellig Skreft känst, kjen disallew di önderwise tö di Seligheid, dör di Glow ön Kristus Jesus.

¹⁶ For alle Skreft, van Gott iniwen, es net tö di Lir, tö Törogtwising, tö Betering, tö Tügt ön di Rogtfardigheid.

¹⁷ Omdat sa en Gottes-Mensk volkommen es, tö alle gud Werken skekket.