2 Timotheus 1 - North Frisian New Testament (Clemens)

Dit 1. Kapitel.

¹ Paulus, en Apostel van Jesus Kristus, dör Gottes Wel, eter di Tölöwing van di ewig Lewent ön Kristus Jesus.

² Min lew Seen Timotheus, Gnad, Barnhartigheid, Fred van Gott üs Våder en Kristus Jesus, üs Herr.

³ Ik danke Gott, en tine höm alliküs min Voaråldern, ön en rin Geweten, dat ik sönder Aphoalden om di tänk ön min Bodig Nagt en Dai.

⁴ En ik läng diäreter, di tö sen, wan ik tänk om din Toaren, omdat ik vol Frügged ud.

⁵ Ik erinnere mi, dat dü en âprogtig Glow ön di hēst, welk tövoaren unet hed on din Grotmoder Loide, en ön din Moder Eunike; ik sen er wes üp, uk ön di.

⁶ Diärom wel ik di diärom tö tänken help, di Gottes-Gåw aptö wäken, welk ön di es dör min Hundüplien.

⁷ For Gott hēd üs ek di Geist ön di Fürgt iwen, mar di Kraft, en di Lewde, en di Tügt.

⁸ Diärom skåme di ek voar dit Tjügnis van üs Herr, nog voar mi, diär sin Gefangener es, mar lid Bedrük me dit Evangilje, alliküs ik dör Gottes Kraft.

⁹ Diär üs selig måket hed en beröpen tö en hellig Amt, ek eter üs Werken, mar eter sin Beslüt en Gnåde, welk üs iwen es ön Kristus Jesus, voar di Tid van di Wârld.

¹⁰ Mar nü ipenbåret es dör di Sjün van üs Seligmåker Jesus Kristus; welk di Doad di Magt nommen hed, en dit Lewent en Unsterwlikheid önt Lägt brågt dör dit Evangilje.

¹¹ Diärtö ik önsät sen tö en Pröst, en Apostel, en Liärer bi di Heiden.

¹² For di Såk lid ik sok, mar ik skamme mi ek diärvoar. For ik wēt, ön hokken ik liw, en sen er wes üp, dat hi magtig es, dit, wat ik höm auriwen ha, tö bewårin tö di jungst Dai.

¹³ Hoald fast di Form van di sünd Urder, welk dü van mi hjert hēst, van di Glōw en van di Lewde ön Kristus Jesus.

¹⁴ Bewåre di gud Poand, welk di önbetrut uden es, dör di hellig Geist, diär ön üs unet.

¹⁵ Dit wetst dü, dat alle, welk ön Asien sen, sik van mi ofwänt ha; mung dânen sen Fygellus en Hermogenes.

¹⁶ Di Herr iw Onesiforus Hüs Barnhartigheid; for hi hēd mi åft erkwikt en hed sik ek skamet aur min Kettings.

¹⁷ Mar üs hi ön Rom wiär, sågt hi mi åft ap, en foand mi.

¹⁸ Di Herr iw höm, dat hi Barmhartigheid fent bi di Herr üp di junst Dai. En hurvul hi mi ön Efesus tinet hed, wētst dü bäst.