2 Thessaloniker 3 - North Frisian New Testament (Clemens)

Dit 3. Kapitel.

¹ Fârder, lew Brödhern! bödige foar üs, dat dit Urd van di Herr ütbredet en priset ud, üs bi ju.

² En dat wü befrit ud van di ünartig en ârig Mensken. For di Glow es ek Arkjens Såk.

³ Mar di Herr es tru, hi wel ju stark måke, en bewåre voar dit Arigs.

⁴ Wü ha dit Fortruen tö ju ön di Herr, dat I dö en dö wel, wat wü ju befälen hå.

⁵ Mar di Herr wise ju Harten tö Gottes Lewde, en tö di Standhaftigheid ön-t Kristendom.

⁶ Mar wü befjäl ju, lew Brödhern! ön üs Herr Jesus Kristus sin Nom, dat I ju van ark Brödher ofhoald diär aurdådig lewwet, en ek eter di Lirdom, welk I van üs fingen hå.

⁷ For I wēt, hurdelling I üs eterföllige skel; for wü hå ek ünordentlik mung ju lewwet.

⁸ Hå uk ek foriws dit Broad van hokken nommen, mar me Årbed en Meit ha wü Nagt en Dai årbedt, omdat wü ek hokken van ju tö Last fål måt.

⁹ Ek diärom, dat wü nin Rogt diärtö ha, mar omdat wü üs sallew ju tö en Mönster iw, om üs nåtofölligin.

¹⁰ En üs wü bi ju wiär, befoal wü ju, dat wan er hokken ek årbede wel, di skel uk ek it.

¹¹ For wü hir, dat Sommen mung ju ünordentlik lewwe, en ek årbede, mar Wanwet driw.

¹² Dânen befele wü en formane jam dör üs Herr Jesus Kristus, dat ja stel arbede, en jar ein Broad it.

¹³ En I, lew Brödhern! ud ek trät, om Guds tö dön.

¹⁴ Mar wan er hokken üs Urd ek harke wel, wat ön döt Bref skrewwen es, da tekene höm ön, en hå nönt me höm tö skaffin, omdat hi van Skåm lägroad ud.

¹⁵ Dag hoald höm ek üs en Find, mar formåne höm üs en Brödher.

¹⁶ Mar hi, di Herr aur di Frēd, iw ju Frēd allerwegen en üp ark Wis. Di Herr wis me ju al!

¹⁷ Di Grötnis me min Hund, Paulus. Dit es dit Teken ön alle Brewer, sa skriw ik.

¹⁸ Di Gnad van üs Herr Jesus Kristus wis me ju al! Amen.