2 Korinther 9 - North Frisian New Testament (Clemens)

Dit 9. Kapitel.

¹ For van sa en Help foar di Helligen hå ik ek nödig ju tö skriwen.

² For ik kän ju gud Wel, hurvoar ik ju lowe bi dânen üt Macedonien, dat nämelk Achaja voar en Jår wellig wessen hēd, en ju Iwer hēd Vulen wellig måket.

³ Mar ik hå dös Brödhem stjürt, omdat üs Rum van ju ek tö nönt ud, en dat I wellig sen, alliküs ik van ju said hå.

⁴ Omdat, wan di Macedonier me mi kom, en ju ünwellig foand, dat wü, omdat ik ek si: I, tö Skand ud me sa-n Rümin.

⁵ Ik hå-t foar nödig önsen, di Brödhem tö formånin, dat ja voarof reiset tö ju, om di tösaid Gåw tö foranstaltin, omdat di törēd es üs en Segen, en ek üs Nauheid.

⁶ En dit si ik, hokken kârig sä, di skel uk karig skiär, en hokken ön Segen sä, di skel uk ön Segen skiär.

⁷ Ark na sin fri Wel, ek me Ünwelligheid, of me Twōng, for en blid Jiwer hēd Gott lew.

⁸ Mar Gott kjen-t måke, dat al Gnad ju rikkelk tö Dil ud, en dat I alle Dinge tö ju vol Töfrēdheid ha, en rik sen tö alle gud Werken.

⁹ Üs er skrewwen stånt: Hi hēd ütstrit, en di Armen iwen, sin Geregtigheid blewt ön Ewigheid.

¹⁰ Mar di, diär di Säer di Sit jewt, wel ik ja dit Broad tö iten iw, en wel ju Sit formiäre, en di Frügt van ju Guddön wugse let.

¹¹ Dat I rik sen ön al dit aprogtig Guddön, wat Danksien tö Gott dör üs wirket.

¹² For di Help van dös Såmling foar di Helligen måket et ek alining, dat ja nin Mangel ha tört, mar es uk aurflödig diärön, dat Vulen Gott Dank si foar dös üs tru Tinst.

¹³ For aur ju gudwellig Help prise ja Gott foar ju wellig Harkin eter dit Evangilje van Kristus, en aur ju gudwellig Help ön jam en ön alle.

¹⁴ En aurdat ja foar ju bödige, welk om ju läng, aur di aurflödig Gnad van Gott ön ju.

¹⁵ Mar Gott se Dank foar sin Gåw, diär ek üttöspreken es.