2 Korinther 5 - North Frisian New Testament (Clemens)

Dit 5. Kapitel.

¹ Mar wü wet, wan üs Hüs van Örd, di Hot, diälbreken ud, dat wü en Begning hå van Gott, en Hüs wat ek me Hunden måket, diär ewig es ön Hemmel.

² En ön disallew läng wü, om di Uning ön Hemmel, en hat forlangt üs, diärme bekloadet tö uden.

³ Dag sa, dat wü bekloadet fünden ud, en ek nåken.

⁴ For sa lung wü ön dös Hüt sen, läng wü, en sen beswäret, wil wü lewwer ek ofkloadet wis wel, omdat dit Sterwelik forslängt ud van dit Lewent.

⁵ Mar di, diär üs diärtö bereitet, dit es Gott, diär us di Poand, di Geist iwen hed.

⁶ Mar wü sen altid getrost, en wet, wil wü ön di Likhäm une, dat wü wandere, en sen ek ethüs bi di Herr.

⁷ For wü wandele ön di Glōw, en ek ön di Beskauing.

⁸ Mar wü ha gud Mud, en hå vulmoar Lest, bütten di Likhäm tö wandelin, en ethüs bi di Herr tö wisen.

⁹ Diärom wänd wü uk Flit ön, wü mai ethüs wis, of wü mai wandere, dat wü höm welhage.

¹⁰ For wü mut al ipenbar ud voar Kristus sin Rigterstöl, omdat Ark faid, alliküs hi handelt hed ön sin Likhäms-Lewent, hat mai gud, of ârig wis.

¹¹ Wil wü da wēt, dat di Herr tö fürgten es, sjuk wü, di Mensken sagtis tö wennen; mar voar Gott sen wü ipenbar. Mar ik höpe, dat wü uk ön ju Geweten ipenbar sen.

¹² Dat wü üs nü ek salw lowe, mar ju en Oarsåk iw, om üs tö rümin, omdat I wat tö rümin ha tögen danen, welk sik na dit Ütterlik rüme, mar ek jar Hart.

¹³ For dö wü tö vul, da dö wü dit Gott; en hoald wü Måt, da hoald wü-t sa foar ju.

¹⁴ For di Lewde tö Kristus trängt üs tö dit Ordil, dat wan er jen foar alle stürwen es, da sen ja al stürwen.

¹⁵ En diarom es hi foar alle stürwen, omdat danen, welk lewwe, nü ek länger jam sallew lewwe, mar höm, diär foar jam stürwen en apstönden es.

¹⁶ Diärom kän wü van nü of ön Nemmen eter dit Flēsk, en wan wü uk Kristus känt ha eter dit Flesk, da kam wü höm dag nü ek moar sadelling.

¹⁷ Diärom, wan er hokken ön Kristus es, da es hi en ni Skåpning, dit oald es forgingen, hat es Alles ni uden.

¹⁸ Mar dit Alles es van Gott, diär üs me höm forsonet hed dör Jesus Kristus, en üs dit Amt iwen hed, wat di Forsöning forkindjigt.

¹⁹ For Gott wiär ön Kristus, en forsönet di Warld me sik sallew, en rekent jam jar Send ek tö, en hed bi üs dit Urd van di Forsöning aprogt.

²⁰ Sa sen wü nü Bödskeppen ön Steid van Kristus, for Gott formånet dör üs, en nü bed wü on Steid van Kristus, let ju forsöne me Gott.

²¹ For hi hed di, diär van nin Send wust, for üs tö Send maket, omdat wü ön höm di Rogtfardigheid wåd, welk voar Gott gelt.