2 Korinther 2 - North Frisian New Testament (Clemens)

Dit 2. Kapitel.

¹ Mar ik hå dit bi mi sallew mi voarnommen, omdat ik ek weder ön Bedrüwwing tö ju kam.

² For wan ik ju bedrüwwet måket, hokken est, diär mi blid måket, üs di sallew, welk van mi bedrüwwet wad.

³ En dit sallew hå ik ju skrewwen, omdat ik ek, wan ik kam, bedrüwwet wis måst, aur danen, aur hokken ik mi frügge skuld. Ik forlet mi tö ju diärüp, dat min Frügged uk Frügged foar ju al es.

⁴ For ik skrew ju ön gurt Trungheid en Benautheid ön min Hart, me vul Toaren, ek omdat I bedrüwwet ud skuld, mar omdat I di Lewde kän skuld, welk ik senderlik tö ju ha.

⁵ Wan er hokken en Bedrüwwing önrogt hed, di hed ek mi bedrüwwet üs en Dil, mar om ek tö vul tö sien, ju al.

⁶ Mar hat es nog, dat hi van sa Vulen sa strafet uden es.

⁷ Dat I höm nü metjens om sa vul lewwer foriw, en tröste, omdat hi ek dör oltergurt Kemmer ön-t Sörin komt.

⁸ Diärom bed ik ju, dat I höm di Lewde bewise.

⁹ For diärom ha ik ju uk skrewwen, om ju tö prowin, of I rogtskaffen sen, en ön alle Dingen hold harke wel.

¹⁰ Hokken I wat foriw, höm foriw ik uk. For wan ik hokken wat foriw, dit foriw ik om ju wel, ön Steid van Kristus.

¹¹ Omdat di Satan ek di Voardil diärvan faid. For sin Önslaggen sen üs ek bekänt.

¹² Mar üs ik tö Troada kam, om dit Evangilje van Kristus tö prötjin, en mi en Dür ipenmaket wiär ön di Herr,

¹³ Hed ik nin Ru ön min Geist, aurdat ik Titus, min Brödher, ek foand; mar ik nom Ofskid me jam en foar na Macedonien.

¹⁴ Mar Gott se Dank, diät üs altid Sig jewt ön Kristus, en di Harem van sin Känels dör üs aural forbredet.

¹⁵ For wü sen Gott en gud Harem van Kristus, bid mung danen, diär selig ud, en mung dânen, diär forlesen gung.

¹⁶ Dössen en Doadhârm tö di Doad, di Üdern en Hârm van Lewent tö dit Lewent. En hokken es diärtö dügtig?

¹⁷ For wü sen ek sokken, üs Sommen vul, diär Gotts-Urd forfälske, mar ön Aprogtigheid, en üt Gott, voar Gott, sprek wü ön Kristus.