2 Korinther 10 - North Frisian New Testament (Clemens)

Dit 10. Kapitel.

¹ Mar ik Paulus formåne ju dör di Sagtmudigheid en Mildheid van Kristus, wan ik bi ju sen, da sen ik wel gering, mar van ju of sen ik iärnsthaftig.

² Ik bed da, dat ik ek nödig hå, nü sträng tö forfåren, en Dristigheid tö brükken, hurfoar ik hölden ud, tögen Sommen, welk üs diärfoar hoald, dat wü na dit Flēsk wandele.

³ For wan wü uk ön dit Flesk wandele, da strid wü dag ek na dit Flēsk.

⁴ For üs Krigswåpen sen ek na dit Flēsk, mar magtig dör Gott om di Borrig djältöriwen.

⁵ Omdat wü di Önslaggen forwirre, en al Hogheid, diär sik tögen di Känels van Gott âphēwt; en alle Fornunft gefangen nem, om Kristus tö harkin.

⁶ En wü sen bi di Hund, al Wederspenstigheid tö wrögin, wan ju Harkin vor vol gelt.

⁷ Se I üp dit, wat ütterlik es? Forlet sik hokken diärüp, dat hi Kristus töhjert, di tänk uk bi höm sallew, dat alliküs hi Kristus töhjert, sa hir wü uk Kristus tö.

⁸ En wan ik uk jit moar mi rüme wild van üs Magt, welk üs di Herr iwen hed, om ju tö beterin, en ek tö fordârwin, da skel ik dag ek tö Skand ud.

⁹ Mar dit si ik, omdat ju ek tinkt, üs wan ik ju hed forskrek wild me Brewer.

¹⁰ For di Brewer (si ja) sen swår en stark; mar di Likhäm tö dös Tid es swak, en di Rede es kraftloas.

¹¹ Da mai sa en Mensk betänk, üs wü me di Urder ön di Brewer sen, wil wü ek bi ju sen, sa wel wü uk wis ön di Dåd, wan wü bi ju sen.

¹² For wü tört üs ek tö dânen rekene of tǟl, welk sik sallew lowe. Mar wil ja jam bi sik sallew mēt, en alining van sik sallew hoald, forstun ja nönt.

¹³ Mar wü rüme üs ek aur di Måt, mar na di Måt, üst Regel es, hurme Gott üs di Måt tömeten hed, uk tö ju tö kommen.

¹⁴ En wü strik üs sallew ek oltervul üt, üs wan wü ek tö ju kjemmen wiär, for wü sen ja bet tö ju kjemmen me dit Evangilje van Kristus.

¹⁵ En wü rüme üs ek aur di Måten ön Üder Lid jar Arbed, mar wü hå di Höp, wan nü uk ju Glow ön ju wugset es, dat wü, eter üs Regel, vul firder kom wel.

¹⁶ En uk dânen dit Evangilje tö forkindjigen ön di Plåtsen, diär üp di Üder Sid van ju li, mar üs ek rüme ön dit, wat ön en främed Besirk al ütrogt es.

¹⁷ Mar hokken sik rümet, di rüme sik ön di Herr.

¹⁸ For diarom es Nemmen dügtig, dat hi sik sallew lowet, mar dat di Herr höm lowet.