1 Timotheus 6 - North Frisian New Testament (Clemens)

Dit 6. Kapitel.

¹ Di Tinstknegte, diär önder dit Jok sen, skel jår Herren ön Iären hoald, omdat Gottes Nom en di Lir ek lästert ud.

² Mar danen, diär glowige Herren ha, skel disalwigen ek foragte, aurdat ja Brödhern sen; mar ja skel vulmoar wellig tine; wil ja glowig en lew sen, en ön di Weldåden dilhaftig sen. Sok lir en formåne diärtö.

³ Mar wan er hokken üders lirt, en blewt ek bi di sünd Urder van üs Herr Jesus Kristus, en bi di Lir van di Gottseligheid.

⁴ Di es âpblögen, en wēt nönt, mar es krånk ön Fragin en Urdkrig, hurüt öntstånt Nidskheid, Håt, Lästering, slim Fordagt.

⁵ Skulkrakel van sok Mensken, diär tenhaudet sen, en di Wårheid berowet, en min, dat Gottseligheid en Wenning es. Let of van Sokken.

⁶ Mar hat es en gurt Wenning, hokken gottselig en diärbi gnügsom es.

⁷ For wü ha nönt ön di Warld brågt; diärom est ipenbar, dat wü nönt diärvan menem kjen.

⁸ Mar wan wü It en Drink en Kloader hå, da let üs gnügsom wis.

⁹ For dânen, diär rik ud wel, fål ön Forsjuk en Strik, en vul tabig, fordârwelik Begjärligheden, welk di Mensken ön Fordarew en Fordamnis stört.

¹⁰ For di Gits es di Wortel van al dit Arigs, hurtö Sommen Lest ha, en ja sen van di Glow of wildgingen, en måke jam sallew vul Wârk en We.

¹¹ Mar dü Gottes-Mensk flögt voar sok Dingen; strewe eter di Geregtigheid, di Gottseligheid, di Glow, di Lewde, di Geduld di Sagtmudigheid.

¹² Kämfe en gud Kamf ön di Glow, grip eter dit ewig Lewent, hurtö dü uk beröpen best, en bekänt hest en gud Bekänels voar vul Tjugen.

¹³ Ik befele di voar Gott, diär alle Dinge lewendig måket, en voar Kristus Jesus, diär onder Pontius Pilatus en gud Bekänels ofleid hēd.

¹⁴ Dat dü dit Gebot haltst sönder Plakken, en sönder Skildj, bet dat üs Herr Jesus Kristus ön Sjün komt.

¹⁵ Dit wel di selig en alining Gewaltig tö sin Tid wise, di Könning aur alle Könninger, en di Herr aur alle Herren.

¹⁶ Diär alining Ünsterwlikheid hed, diär unet ön en Lägt, hurtö Nemmen kom kjen, welk nin Mensk sen hed, nog se kjen; höm skel Iär en dit Rik ön Ewigheid wis. Amen.

¹⁷ Befele di Rikken üp dös Warld, dat ja ek stolt sen, uk ek höpe üp di ünwes Rikdom, mar üp di lewendig Gott, diär üs rikkelk jewt, om Allerlei tö geneten.

¹⁸ Dat ja Guds dö, rik ud ön gud Werken, hold iw, behelpelk sen.

¹⁹ Dat ja sik Skätse såmele, jam sallew tö en gud Gründ üp di Tökomst, omdat ja dit ewig Lewent fo mai.

²⁰ O Timotheus, bewåre dit, en wat di önfortrut es, en formeide dit üngeistelk, loas Snak, en di Krakel van di falsk berömt Könst.

²¹ Wat Sommen voariw, en forfeile di Glow. Di Gnad wis me di!