1 Timotheus 3 - North Frisian New Testament (Clemens)

Dit 3. Kapitel.

¹ Dit es wes war: wan er hokken en Biskops-Amt begjärt, di forlangt en köstelk Werk.

² En Üpseer skel ünbeskildjigt wis, jen Wüfs Man, nügtern, matig, iärbar, gastfri, legtlirig.

³ Nin Winsüpper, ek pogge, ek üniärelk Handtiring driw, mar mild, nin Krakeler, ek gitsig.

⁴ Diär sin ein Hüs wel voarstånt, diär sin Biärner frai harkin lirt me al Iärbarheid.

⁵ Mar wan er hokken sin ein Hüs ek voartöstunen wēt, hur kjen hi foar dit Geminte sörrige?

⁶ Ek en Niling, omdat hi sik ek âpblogt, en ön dit Ordil van di Düwel falt.

⁷ Mar hi mut uk en gud Tjügnis van danen ha, diär bütten sen, omdat hi ek ön di Düwels Smoai en Strik falt.

⁸ Alliksa skel di Diners ön dit Geminte iärbar wis, ek me tau Tungen snakke, nin Winsüpper, ek üniärelk Handtiring driw.

⁹ Diär di Hjemmelkheid van di Glow ön en rin Geweten hå.

¹⁰ En em let jam jest forsjuk, diäreter kjen ja tine, wan ja ünbeskildjigt sen.

¹¹ Alliksa skel di Wüffen iärbar wīs, nin Lästerer, wakker, tru ön alle Dingen.

¹² Ark Diner ön dit Geminte skel jen Wüfs Man wis, welk jar Biärner gud apti en jår ein Hüsing.

¹³ Mar sokken, diär gud tine, bane jam sallew en gud Wei, en hå en gurt Frügged ön di Glow, ön Kristus Jesus.

¹⁴ Sok skriw ik di, en höpe, ön en Hast tö di tö kommen.

¹⁵ Mar wan ik tēft, omdat dü wetst, hurdelling dü wandele skedt ön Gottes Hüs, welk di lewendig Gott sin Geminte es, en Piller en Gründstin van di Wårheid.

¹⁶ En kündig gurt es di gottselig Hjemmelkheid: Gott es ipenbåret ön-t Flēsk, rogtfardigt ön di Geist, es sen uden van di Engeler, es prötjet uden bi di Heiden, es liwt uden ön di Wârld âpnommen ön di Herlikheid.